ഒരു റാങ്ക് പട്ടികയുടേയും കാലാവധി ദീര്‍ഘിപ്പിക്കില്ലെന്ന് കേരള പിഎസ്‌സി
സിവില്‍ പൊലീസ് നിയമനം ഉള്‍പ്പെടെ ഒരു റാങ്ക് പട്ടികയുടേയും കാലാവധി ദീര്‍ഘിപ്പിക്കില്ലെന്ന് കേരള പബ്ലിക് സര്‍വീസ് കമ്മീഷന്‍. ഈ മാസം 30 നാണ് സിവില്‍ പൊലീസ് നിയമനത്തിനുള്ള റാങ്ക് പട്ടികയുടെ കാലാവധി അവസാനിക്കുന്നത്. വനിതാ ബെറ്റാലിയന്‍ ഉള്‍പ്പെടെ ഏഴ് ബെറ്റാലിയനുകളിലേക്കായിരുന്നു പരീക്ഷ .
കുപ്രസിദ്ധമായ കോപ്പിയടി വിവാദത്തില്‍പ്പെട്ടതിനെ തുടര്‍ന്ന് നാലു മാസത്തോളം ഈ പട്ടികയിലെ നിയമനടപടികള്‍ തടസപ്പെട്ടിരുന്നു. ലോക്ഡൗണിനെ തുടര്‍ന്ന് മൂന്നുമാസത്തേക്ക് റാങ്ക് പട്ടികകള്‍ നീട്ടി നല്‍കിയെങ്കിലും അതിന്റെ ആനുകൂല്യം സിവില്‍ പൊലീസ് പട്ടിക ലഭിച്ചില്ലെന്നാണ് ഉദ്യോഗാര്‍ഥികളുടെ പരാതി.
എന്നാല്‍ വനിതാ ബറ്റാലിയന്‍ ഒഴികെയുള്ള ആറു പട്ടികയില്‍നിന്നും പരമാവധി നിയമനം നടത്തി കഴിഞ്ഞെന്നാണ് പിഎസ് സിയുടെ നിലപാട്. വനിതാ പൊലീസിന്റെ കാര്യത്തില്‍ ശാരീരിക ക്ഷമതാ പരിശോധന കഴിഞ്ഞ ശേഷമേ റാങ്ക് പട്ടിക പ്രസിദ്ധീകരിക്കാനാകൂ. കോടതി വിധിയുടെ അടിസ്ഥാനത്തിലാണിത്. പട്ടികയില്‍ ഉള്‍പ്പെട്ട 17 ഉദ്യോഗാര്‍ത്ഥികള്‍ ഗര്‍ഭിണികളായതിനാല്‍ ശാരീരിക ക്ഷമത പരിശോധന മാറ്റിവെക്കണമെന്ന് കോടതിയെ സമീപിക്കുകയായിരുന്നു. അതിന്റെ അടിസ്ഥാനത്തിലാണ് അവരുടെ പട്ടിക പ്രസിദ്ധീകരിക്കാതിരുന്നത്. മാര്‍ച്ച്‌ 23 ന് ശാരീരിക ക്ഷമതാ പരിശോധന തീരുമാനിച്ചെങ്കിലും ലോക്ക് ഡൗണ്‍ തുടങ്ങിയതോടെ അതു നീണ്ടുപോകുകയായിരുന്നു.
https://www.facebook.com/Malayalivartha
