കടല്ക്കൊല കേസ്... കേസില് നിന്ന് പിന്മാറാനുള്ള കേന്ദ്ര സര്ക്കാരിന്റെ നീക്കത്തിനെതിരെ പ്രതിഷേധിക്കുമെന്ന് മുഖ്യമന്ത്രി; വിധി മത്സ്യത്തൊഴിലാളികള്ക്ക് എതിരാണെന്ന് ചൂണ്ടിക്കാട്ടി കേരള സ്വതന്ത്ര മത്സ്യത്തൊഴിലാളി ഫെഡറേഷന് രംഗത്ത്
കടല്ക്കൊലക്കേസില് ഇറ്റാലിയന് നാവികരെ ഇന്ത്യയില് വിചാരണ ചെയ്യാന് പാടില്ലെന്ന് കോടതി നിലപാടെടുത്തത് നിര്ഭാഗ്യകരമാണെന്ന് മുഖ്യമന്ത്രി. ശക്തമായ വാദങ്ങളുയര്ത്തുന്നതില് പരാജയപ്പെട്ടെങ്കിലും ഇനി നഷ്ടപരിഹാരത്തിന്റെ കാര്യത്തില് സര്ക്കാര് തുടര്നടപടികള് സ്വീകരിക്കണമെന്ന് അദ്ദേഹം ആവശ്യപ്പെട്ടു. എന്നാല് സംഭവത്തില് അന്തര്ദ്ദേശീയ തര്ക്കപരിഹാര കോടതിയില് ഇന്ത്യയുടെ ഭാഗത്തു നിന്ന് വേണ്ടവിധം വാദങ്ങളുയര്ന്നില്ലെന്നാണ് മാധ്യമ റിപ്പോര്ട്ടുകള് പറയുന്നതെന്നും അത് നിര്ഭാഗ്യകരമായെന്നും മുഖ്യമന്ത്രി പിണറായി വിജയന് പറഞ്ഞു.
കേസില് നിന്നും പിന്നാക്കം പോകാനുള്ള കേന്ദ്ര സര്ക്കാരിന്റെ നിലപാടിനെതിരെ പ്രതിഷേധമറിയിക്കുമെന്നും അദ്ദേഹം പറഞ്ഞു. കേസ് അവസാനിപ്പിക്കുന്നുണ്ടെങ്കില് അതിനോട് യോജിപ്പില്ല. തീര്ച്ചയായും സംസ്ഥാനത്തിന്റെ വികാരം കേന്ദ്രത്തെ അറിയിക്കുമെന്ന് അദ്ദേഹം വ്യക്തമാക്കി.
ഇന്ത്യയിലെ കോടതികള്ക്ക് ഇറ്റാലിയന് നാവികരെ വിചാരണ ചെയ്ത് ശിക്ഷിക്കാന് അധികാരമില്ലെന്നാണ് ട്രിബ്യൂണല് വിധിച്ചത്. നഷ്ടപരിഹാരം സംബന്ധിച്ച് ചര്ച്ച ചെയ്യാന് ഇരുകൂട്ടരെയും കോടതി ക്ഷണിക്കുകയും ചെയ്തു. നാല്പ്പത് ദിവസം മുമ്ബ് വിധി വന്നെങ്കിലും ഇത് കേന്ദ്ര സര്ക്കാര് ഇത്രയും നാള് മൂടി വെക്കുകയായിരുന്നെന്ന് മത്സ്യത്തൊഴിലാളികളുടെ സംഘടനകള് പറയുന്നു. അതെസമയം മത്സ്യത്തൊഴിലാളികള് ഈ വിധി പരാജയമാണെന്ന് പറയുന്നുണ്ടെങ്കിലും ദേശീയ മാധ്യമങ്ങള് വിധിയെ വിജയമെന്ന തരത്തിലാണ് കഴിഞ്ഞദിവസം റിപ്പോര്ട്ട് ചെയ്തിരുന്നത്.
ഇറ്റാലിയന് നാവികര് ഇന്ത്യന് കടലില് നടത്തിയ കൊലപാതകം സംബന്ധിച്ച് അന്താരാഷ്ട്ര ട്രിബ്യൂണലില് വന്ന വിധി ഇന്ത്യക്ക് അനുകൂലമല്ലെന്നും, അത് മത്സ്യത്തൊഴിലാളികള്ക്ക് എതിരാണെന്നും ചൂണ്ടിക്കാട്ടി കേരള സ്വതന്ത്ര മത്സ്യത്തൊഴിലാളി ഫെഡറേഷന് രംഗത്തെത്തിയിട്ടുണ്ട്. ഇറ്റാലിയന് സൈനികരെ വിചാരണ ചെയ്ത് ജയിലിലടയ്ക്കുകയെന്നത് തുടക്കം മുതലേ മത്സ്യത്തൊഴിലാളികളുടെ ആവശ്യമായിരുന്നെന്ന് സംഘടന ചൂണ്ടിക്കാട്ടി. എന്നാല് സംഭവം നടന്ന 2012 മുതല് ഇന്ത്യ ഭരിച്ചവരെല്ലാം കേസില് ഇറ്റാലിയന് സൈനികര്ക്ക് അനുകൂലമായി പഴുതുകള് സൃഷ്ടിച്ചു കൊടുക്കുകയാണ് ചെയ്തതെന്നും മത്സ്യത്തൊഴിലാളി ഫെഡറേഷന് ചൂണ്ടിക്കാട്ടി.
https://www.facebook.com/Malayalivartha