6 മാസം പ്രായമുള്ള പെണ്‍കുഞ്ഞിനെ ഉപദ്രവിച്ച കേസില്‍ പിതാവ് അറസ്റ്റില്‍
എറണാകുളം ജില്ലയില്‍ തിരുവാങ്കുളം കേശവന്‍പടിക്കു സമീപം മദ്യപിച്ചെത്തിയ പിതാവ്, വിശന്നു കരഞ്ഞ കുഞ്ഞിനെ എടുത്തെറിഞ്ഞതായി മാതാവ്. കുഞ്ഞിന്റെ നിര്‍ത്താതെയുള്ള കരച്ചില്‍ കേട്ട് അയല്‍വാസിയാണ് ആശാ വര്‍ക്കറെയും കൗണ്‍സിലറെയും വിവരമറിയിച്ചത്. കുട്ടിക്കെതിരെയുള്ള അക്രമത്തിനും ഭാര്യയെ ഉപദ്രവിച്ചതിനും കൊലപാതക ശ്രമത്തിനുമാണ് കേസ്. ബുധനാഴ്ച പുലര്‍ച്ചെയാണ് സംഭവമുണ്ടായത്.
കുഞ്ഞിനെ പിതാവ് സ്ഥിരമായി ഉപദ്രവിക്കാറുണ്ടെന്ന ആശ വര്‍ക്കറുടെ റിപ്പോര്‍ട്ടിനെ തുടര്‍ന്നു ശിശുക്ഷേമ സമിതി ഇടപെട്ടു. തൃപ്പൂണിത്തുറ താലൂക്ക് ആശുപത്രിയില്‍ പ്രാഥമിക പരിശോധന പൂര്‍ത്തിയാക്കി അമ്മയെയും കുഞ്ഞിനെയും സമിതി പ്രവര്‍ത്തകര്‍ വീട്ടിലേക്കു മാറ്റി. ഇവരുടെ താല്‍ക്കാലിക സംരക്ഷണം ശിശുക്ഷേമ സമിതി ഏറ്റെടുത്തു.
പിതാവ് കുഞ്ഞിനെ കട്ടിലിലേക്കു വലിച്ചെറിഞ്ഞെങ്കിലും കുഞ്ഞിന്റെ ശരീരത്തില്‍ കാര്യമായ മുറിവില്ല. ആരോഗ്യനില തൃപ്തികരമാണെന്ന് തൃപ്പൂണിത്തുറ താലൂക്ക് ആശുപത്രിയിലെ ഡോക്ടര്‍ അറിയിച്ചു. ഒരു വര്‍ഷമായി തിരുവാങ്കുളത്ത് വാടകയ്ക്കു താമസിക്കുകയാണ് കുടുംബം. 3 വയസ്സുള്ള മറ്റൊരു പെണ്‍കുട്ടിയും ദമ്പതികള്‍ക്കുണ്ട്.
ഇന്‍സ്‌പെക്ടര്‍ പി. രാജ്കുമാറിന്റെ നേതൃത്വത്തില്‍ ഹില്‍ പാലസ് പൊലീസ്, ശിശുക്ഷേമ സമിതി വൈസ് പ്രസിഡന്റ് കെ.എസ്. അരുണ്‍കുമാര്‍, സെക്രട്ടറി സുനില്‍ ഹരീന്ദ്രന്‍, ജയ പരമേശ്വരന്‍, അനൂപ് ജേക്കബ് എംഎല്‍എ എന്നിവര്‍ സ്ഥലത്തെത്തി.
കുഞ്ഞിന്റെ മോശമായ ആരോഗ്യസ്ഥിതി കണ്ട് റമ്പാന്‍കുന്ന് റസിഡന്റ്‌സ് അസോസിയേഷന്‍ ഭാരവാഹികള്‍ ലോക്ഡൗണ്‍ സമയത്ത് ഇടപെട്ടിരുന്നു. കുഞ്ഞിന്റെ കഴുത്തിനു താഴെയും പിന്‍വശത്തും വ്രണങ്ങള്‍ ഉണ്ടായിരുന്നതിനാല്‍ അന്ന് എറണാകുളം ജനറല്‍ ആശുപത്രിയില്‍ പ്രവേശിപ്പിച്ചിരുന്നു. ഒരു മാസത്തെ ചികിത്സയ്ക്കു ശേഷം തിരിച്ചെത്തിയപ്പോഴാണ് പിതാവ് പാലക്കാട് സ്വദേശി പട്ടശേരില്‍ ആനന്ദി(36) ന്റെ ഉപദ്രവം.
https://www.facebook.com/Malayalivartha
