തിരുവനന്തപുരം അന്താരാഷ്‌ട്ര വിമാനത്താവളം വഴി നടന്ന സ്വർണക്കടത്ത് കേസ് സംസ്ഥാന സര്‍ക്കാറിനെയും സിപിഎം നേതാക്കളേയും ഒന്നടങ്കം പ്രതിസന്ധിയിലാക്കിയിരിക്കുകയാണ്. സ്വര്‍ണകള്ളക്കടത്ത് കേസ് പ്രതി സ്വപ്‌നയുടേയും മുഖ്യമന്ത്രിയുടെ മുൻ പ്രിന്‍സിപ്പല്‍ സെക്രട്ടറി ശിവശങ്കര്‍ ഐഎഎസിന്റേയും വെളിപ്പെടുത്തലുകളും സംസ്ഥാന സര്‍ക്കാറിനെ പ്രതിരോധത്തിലാക്കിയിരിക്കുകയാണ്. സ്വപ്‌നയ്ക്ക് വേണ്ടി പൊലീസും കസ്റ്റസും കേരളം ഒന്നടങ്കം അരിച്ചുപെറുക്കുമ്പോൾ സ്വപ്‌ന താമസിച്ചത് ആലപ്പുഴയിലെ തുറവൂരിലുള്ള സിപിഎം നേതാക്കള്‍ക്ക് ഏറെ ബന്ധമുള്ള വീട്ടിലാണെന്ന ആരോപണവുമായി രംഗത്തെത്തിയിരിക്കുകയാണ് സന്ദീപ് വചസ്പതി. ഫേസ്ബുക്‌പോസ്റ്റിലൂടെയാണ് അദ്ദേഹം ഇക്കാര്യം ചൂണ്ടിക്കാണിക്കുന്നത്.

ഫേസ്ബുക് കുറിപ്പ് ഇങ്ങനെ;

അറ്റാഷേ പോയത് പോകട്ടെ. അത് ഇന്ത്യയും യു.എ.ഇ.യും തമ്മിൽ പരിഹരിക്കും. നമ്മുടെ വിഷയം അതല്ലല്ലോ. സ്വപ്ന കേരളം വിട്ടപ്പോൾ ആലപ്പുഴയിലെ തുറവൂരിൽ ഒരിടത്ത് താമസിച്ചല്ലോ?. ആ വീട് ആർക്കെങ്കിലും അറിയാമോ?. സിപിഎം നേതാക്കൻമാരും മന്ത്രിമാരുമൊക്കെ സ്ഥിരം കരിമീൻ കഴിക്കാൻ പോകാറുള്ള നമ്മുടെ പയ്യന്‍റെ അതേ വീട്. അവിടെയാണ് ചേച്ചി ഈ 7-ാം തിയതി രാത്രി തങ്ങിയത്. അന്നു രാത്രിയിൽ തലയിൽ നീല വെളിച്ചമുള്ള വണ്ടി ഈ വീട്ടിൽ വന്നതായും അയൽക്കാർ പറയുന്നുണ്ട്.