വീടിനുള്ളിൽ കളിക്കുന്നതിനിടെ ജനലിൽ ഉടക്കി നിന്ന ഷോൾ കഴുത്തിൽക്കുരുങ്ങി പതിനൊന്നുകാരിയ്ക്കു ദാരുണാന്ത്യം. സഹോദരനൊപ്പം കളിക്കുന്നതിനിടെയാണ് കുട്ടിയുടെ കഴുത്തിൽ ഷോൾ കുരുങ്ങിയത്.പാത്താമുട്ടം കരിമ്പനക്കുന്നേൽ സനീഷിന്റെയും സൗമ്യയുടെയും മകൾ അതുല്യ സനീഷാണ് (11) ദാരുണമായി മരിച്ചത്. വെള്ളുത്തുരുത്തി ഗവ.യു.പി സ്‌കൂളിലെ ആറാം ക്ലാസ് വിദ്യാർത്ഥിനിയാണ് കുട്ടി.

പാത്താമുട്ടം കരിമ്പനക്കുന്നേൽ ഭാഗത്തെ വീട്ടിൽ ഇന്ന് ഉച്ചയ്ക്ക് ഒന്നരയോടെയായിരുന്നു സംഭവം. കളിക്കുന്നതിനിടെ വീടിനു പുറത്തേയ്ക്കിറങ്ങിയ സഹോദരനൊപ്പമെത്താൻ പുറത്തേയ്ക്കു ഓടുകയായിരുന്നു കുട്ടി. ഇതിനിടെ ഷോൾ കുട്ടിയുടെ കഴുത്തിൽ കുടുങ്ങി. മുറിയ്ക്കുള്ളിൽ നിന്നും അസ്വാഭാവികമായ ശബ്ദം കേട്ടാണ് കുട്ടിയുടെ അമ്മയുടെ സഹോദരന്റെ ഭാര്യ ഓടിയെത്തിയത്. ഇവരാണ് കുട്ടിയുടെ കഴുത്തിൽ ഷോൾ കുടുങ്ങിയത് കണ്ടത്. തുടർന്നു,

തുടർന്ന് , ഇവർ ബഹളം വച്ചതോടെ നാട്ടുകാർ ഓടിയെത്തി കുട്ടിയെ ആശുപത്രിയിൽ എത്തിച്ചു. അപ്പോഴേയ്ക്കും മരണം സംഭവിച്ചിരുന്നു. കുട്ടിയുടെ പിതാവ് സനീഷ് ഓട്ടോ ഡ്രൈവറാണ്. അമ്മ റബർ കമ്പനിയിൽ ജീവനക്കാരിയാണ്. മൃതദേഹം ചെത്തിപ്പുഴ ആശുപത്രി മോർച്ചറിയിൽ. ചിങ്ങവനം പൊലീസ് കേസെടുത്തു.