സ്വപ്ന കാരണം ജീവിതം പച്ച പിടിക്കുകയും അതുപോലെ ജീവിതം തകരുകയും ചെയ്തയാളാണ് തിരുവല്ലം സ്വദേശി സരിത്ത്. നാട്ടിലെല്ലാവരും സ്‌നേഹിക്കുകയും ബഹുമാനിക്കുകയും ചെയ്യുന്ന കുടുംബത്തിലാണ് സരിത്ത് ജനിച്ചത്. സരിത്തിനെക്കുറിച്ച് നാട്ടുകാര്‍ക്കോ ബന്ധുക്കള്‍ക്കോ അങ്ങനെ കുറ്റങ്ങളൊന്നും പറയാനുണ്ടായിരുന്നില്ല. അതുകൊണ്ടുതന്നെ സ്വര്‍ണക്കടത്തുകേസില്‍ കസ്റ്റംസ് പിടിയിലായപ്പോള്‍ പലരും അതിശയിച്ചു. അതുകൊണ്ടുതന്നെ തുടക്കത്തില്‍ പലരും ആ വാര്‍ത്ത വിശ്വസിക്കാനും തയാറായിരുന്നില്ല. പക്ഷേ, തെളിവുകള്‍ നിരത്തി കസ്റ്റംസും എന്‍.ഐ.എയും ചോദ്യം ചെയ്യുന്നതിന്റെ വിവരങ്ങള്‍ ഇപ്പോള്‍ ഒന്നൊന്നായി പുറത്തുവന്നുകൊണ്ടിരിക്കുകയാണ്. യു.എ.ഇ കോണ്‍സുലേറ്റില്‍ ജോലി ലഭിച്ചശേഷം അവിടെ വച്ച് പരിചയപ്പെട്ട സ്വപ്ന സുരേഷുമായുള്ള സൗഹൃദമാണ് സരിത്തിന്റെ ജീവിതം തകര്‍ത്തതെന്നാണ് ചില ബന്ധുക്കള്‍ വിശ്വസിക്കുന്നത്.

യു.എ.ഇ കോണ്‍സുലേറ്റിലെ പരിചയത്തെതുടര്‍ന്ന് സരിത്തിന്റെ വീട്ടില്‍ സ്ഥിരമായി വന്നുപോകാറുണ്ടായിരുന്ന സ്വപ്ന തനിക്ക് പിറക്കാതെപോയ അനുജനായാണ് സരിത്തിനെ വിശേഷിപ്പിച്ചിരുന്നത്. സഹോദര തുല്യമായ സ്‌നേഹവാല്‍സല്യവും കരുതലും തന്നോട് കാട്ടിയിരുന്ന സ്വപ്നയെ ചേച്ചിയെന്നോ മാഡമെന്നോ മാത്രം വിശേഷിപ്പിച്ചിരുന്ന സരിത്ത് അതേനിലയില്‍ ബഹുമാനം തിരിച്ച് കൊടുക്കുകയും ചെയ്തിരുന്നു. സ്‌നേഹം നടിച്ച് സരിത്തിനെ സ്വപ്ന വശത്താക്കിയപ്പോള്‍ ഒരറ്റത്ത് സരിത്തിന്റെ കുടുംബത്തിനും വിള്ളല്‍ വീണു.

റിട്ടയേര്‍ഡ് സര്‍ക്കാര്‍ ജീവനക്കാരാണ് സരിത്തിന്റെ മാതാപിതാക്കള്‍. പ്ലസ് ടുവിന് ശേഷം സരിത്തിന് വിദ്യാഭ്യാസം വിജയപ്രദമായി മുന്നോട്ട് കൊണ്ടുപോകാന്‍ ആയില്ല. പഠനം പാതിവഴിയില്‍ നിലച്ചതോടെ, സര്‍വീസില്‍ നിന്ന് അവധിയെടുത്ത് ഗള്‍ഫില്‍ പോയിരുന്ന സരിത്തിന്റെ പിതാവ്, മകനെ ഗള്‍ഫിലേക്ക് കൂട്ടിക്കൊണ്ടുപോയി. അവിടെ ധനകാര്യസ്ഥാപനത്തില്‍ ജോലി തരപ്പെടുത്തി നല്‍കി. ഏതാനും വര്‍ഷം അവിടെ ജോലിയില്‍ തുടര്‍ന്ന സരിത്ത് നാട്ടിലെ വീട് പുതുക്കിപ്പണിത് രണ്ട് നിലയാക്കി. ഇതിനിടെ അച്ഛന്റെ സുഹൃത്തായ കൈതമുക്ക് സ്വദേശിയുടെ മകളുമായി വിവാഹം തീരുമാനിച്ചു. വിവാഹത്തിന് നാട്ടിലെത്തിയ സരിത്ത് മധുവിധുവിന് ശേഷം ഭാര്യയുമായി ഗള്‍ഫിലേക്ക് മടങ്ങി.

ഗള്‍ഫിലെ കുടുംബജീവിതം പലവിധ കാരണങ്ങളാല്‍ സംതൃപ്തമാകാതിരുന്നതിനാല്‍ സരിത്ത് ഭാര്യയുമായി നാട്ടിലേക്ക് മടങ്ങിയെത്തി. ഇതിനിടെ ഒരു കുഞ്ഞും ജനിച്ചു. ജോലിയില്ലാതെ നാട്ടില്‍ വിഷമിച്ച് കഴിയുമ്പോഴാണ് ചില പരിചയങ്ങള്‍വച്ച് കോണ്‍സുലേറ്റില്‍ താല്‍ക്കാലിക ജോലി ലഭിച്ചത്. സരിത്ത് ജോലിയില്‍ പ്രവേശിച്ച് കുറച്ച് നാളുകള്‍ക്കുശേഷമാണ് സ്വപ്ന അവിടെ ജോലിക്കെത്തിയത്.

അറബി ഉള്‍പ്പെടെ എല്ലാ ഭാഷകളും നന്നായി കൈകാര്യം ചെയ്യാനും ആരെയും വശീകരിക്കാനുമുള്ള കഴിവും കാരണം ചുരുങ്ങിയ കാലം കൊണ്ട് സ്വപ്ന കോണ്‍സുലേറ്റിലെ കാര്യക്കാരിയായി. കോണ്‍സുലേറ്റിലെ അറബ് പ്രതിനിധികളുമായും ഉയര്‍ന്ന ഉദ്യോഗസ്ഥരുമായുമെല്ലാം അടുത്ത ബന്ധം സ്ഥാപിച്ച സ്വപ്ന സരിത്തിന് ഒരു അതിശയമായിരുന്നു. ഭാര്യയോടും കുടുംബാംഗങ്ങളോടും സ്വപ്നയുടെ കഴിവുകളെപ്പറ്റി വാതോരാതെ സംസാരിച്ചിരുന്ന സരിത്തിന്റെ ഒരു കുടുംബ സുഹൃത്തായി സ്വപ്നമാറി. സ്വപ്ന സംഘടിപ്പിച്ച ചടങ്ങുകളിലടക്കം സരിത്തിന്റെ സാന്നിദ്ധ്യം എപ്പോഴുമുണ്ടായിരുന്നു.

ഇതിനിടെ സരിത്തിന്റെ ദാമ്പത്യബന്ധവും തകര്‍ന്നു. ഭാര്യ വിവാഹ മോചനം ആവശ്യപ്പെട്ട് കോടതിയെ സമീപിച്ചു. ദാമ്പത്യപ്രശ്‌നത്തിലെ നിയമയുദ്ധങ്ങളൊന്നും പക്ഷേ, സരിത്തിന്റെ ജോലിയേയോ വ്യക്തി ജീവിതത്തെയോ ബാധിച്ചില്ല. സ്വപ്നയുമായുള്ള അടുപ്പവും സ്വപ്നയുടെ ഉന്നത സ്വാധീനം പകര്‍ന്ന് നല്‍കിയ ധൈര്യവും സരിത്തിനെയും അരുതാത്ത പ്രവൃത്തികളിലേക്ക് നയിച്ചു. സ്വപ്നയ്‌ക്കൊപ്പം ഉന്നതരായ ചില ബന്ധങ്ങള്‍ സരിത്തും നേടിയെടുത്തു. സ്വര്‍ണക്കടത്ത് കേസില്‍ പിടിക്കപ്പെടുംവരെ ആ ബന്ധം കണ്ണി മുറിയാതെ നോക്കാനും സരിത്തിനായി. യു.എ.ഇ കോണ്‍സുലേറ്റിലെത്തുന്ന നയതന്ത്ര ബാഗേജുകളില്‍ കടത്തിയിരുന്ന സ്വര്‍ണം സ്വപ്നയെ വിശ്വസിച്ച് കൈപ്പറ്റി സുരക്ഷിത സ്ഥാനങ്ങളിലെത്തിക്കാന്‍ തുടങ്ങി. ഓരോ കടത്തിനും കമ്മിഷനായി ഏഴ് ലക്ഷത്തോളം രൂപ സരിത്തിന് പ്രതിഫലമായി ലഭിച്ചിട്ടുണ്ടെന്നും പറയപ്പെടുന്നു. സ്വപ്നയിന്‍മേലുള്ള സരിത്തിന്റെ വിശ്വാസം വലുതായിരുന്നു. അതാണ് കസ്റ്റംസുകാര്‍ വിളിച്ചിട്ട് അവസാനവും സരിത് പോയത്.