സംസ്ഥാനത്ത് ഇന്നലെ മാത്രം 791 പേര്‍ക്കാണ് കൊവിഡ് സ്ഥിരീകരിച്ചത്. അതില്‍ 532 പേര്‍ക്ക് സമ്പര്‍ക്കത്തിലൂടെയാണ് രോഗബാധ ഉണ്ടായത് എന്നതാണ് ഏറെ പരിഭ്രാന്തി ഉണ്ടാക്കുന്നത് . ഇന്നലെ രോഗം സ്ഥിരീകരിച്ചവരില്‍ 42 പേരുടെ ഉറവിടം വ്യക്തമല്ല.

തിരുവനന്തപുരം, എറണാകുളം എന്നീ ജില്ലകളിൽ കൊവിഡ് വ്യാപനം രൂക്ഷമായി തുടരുന്ന സാഹചര്യത്തില്‍ സ്വകാര്യ ആശുപത്രികളില്‍ ചികിത്സയാകാമെന്ന് വ്യക്തമാക്കിയിരിക്കുകയാണ് സര്‍ക്കാര്‍. കോവിഡ് പോസിറ്റീവാണെങ്കിലും സ്വകാര്യ ആശുപത്രികളില്‍ തന്നെ ചികിത്സിക്കാം. ഇക്കാര്യത്തില്‍ തടസങ്ങളില്ലെന്ന് സര്‍ക്കാര്‍ വ്യക്തമാക്കി. എല്ലാ സൗകര്യങ്ങളും ഒരുക്കാന്‍ തയ്യാറാണെന്ന് സ്വകാര്യ ആശുപത്രികളും അറിയിച്ചിട്ടുണ്ട്

നേരത്തെ സ്വകാര്യ ആശുപത്രികളിലേക്ക് സര്‍ക്കാര്‍ റഫര്‍ ചെയ്യുന്ന രോഗികള്‍ക്ക് ആര്‍ ടിപിസിആര്‍ പരിശോധനയ്ക്ക് 2750 രൂപ തുടങ്ങി പരിശോധനാ നിരക്കുകൾ നിശ്ചയിച്ചിരുന്നു. ഇത് സര്‍ക്കാര്‍ റഫര്‍ ചെയ്യുന്ന രോഗികളില്‍ നിന്ന് ഈടാക്കുന്ന നിരക്കാണ്. എന്നാല്‍, നേരിട്ട് ചികിത്സ തേടുന്ന രോഗികളില്‍ നിന്ന് ഈടാക്കുന്ന തുക സംബന്ധിച്ച് വ്യക്തതയില്ല.

കൊവിഡ് കേസുകള്‍ ഉയരുന്ന സാഹചര്യത്തില്‍ മുഴുവന്‍ പേരെയും സര്‍ക്കാര്‍ ചെലവില്‍ സര്‍ക്കാര്‍ കേന്ദ്രങ്ങളില്‍ ചികിത്സിക്കുക പ്രായോഗികമാകാതെ വരും . ജൂലായ് അവസാനം രോഗികള്‍ '2700' കടന്നേക്കും എന്ന ശങ്ക നിലനിൽക്കുന്ന സാഹചര്യത്തിൽ നിലവില്‍ സര്‍ക്കാര്‍ ആശുപത്രികളില്‍ കഴിയുന്നവരില്‍ പകുതിയിലേറെ പേര്‍ക്കും സ്വകാര്യ ആശുപത്രികളില്‍ ചികിത്സ തേടാനുള്ള ശേഷിയുള്ളതിനാൽ ഈ മാറ്റം ഗുണകരമാകുമെന്നാണ് വിലയിരുത്തൽ