കോവിഡ് വ്യാപനത്തെ തുടർന്ന് ചെക്ക് പോസ്റ്റുകളിലുള്ള നിയന്ത്രണം മോട്ടോർവാഹന വകുപ്പ് ശക്തമാക്കി. ഇതനുസരിച്ച് അതിർത്തികളിൽ കർശന നിയന്ത്രണങ്ങൾ ഉണ്ടായിരിക്കും . എല്ലാ വാഹനങ്ങളും കോവിഡ് മാർഗ്ഗനിർദേശങ്ങൾ പാലിക്കണം. അല്ലാത്ത വാഹനങ്ങളെ അതിർത്തി കടത്തി വിടരുത് എന്നാണു മോട്ടോർ വാഹന വകുപ്പിന് ലഭിച്ചിട്ടുള്ള നിർദ്ദേശം .

വാഹനങ്ങളിൽ സാനിറ്റൈസർ, മാസ്ക്, ഗ്ലൗസ് എന്നിവ ഉണ്ടെന്ന് ഉറപ്പാക്കണം. മോട്ടോർ വാഹനവകുപ്പ് ഉദ്യോഗസ്ഥർ എല്ലാ വാഹനങ്ങളിലും പരിശോധന നടത്തണം. തെർമൽ സ്കാനർ ഉപയോഗിച്ച് യാത്രക്കാരുടെ ശരീര ഊഷ്മാവ് പരിശോധിക്കണം. ഊഷ്മാവ് കൂടുതലാണെങ്കിൽ അതിർത്തി കടത്തി വിടരുത്.

വാഹനത്തിലെ യാത്രക്കാർ പോകുന്ന സ്ഥലം എഴുതി സൂക്ഷിക്കാനും മോട്ടോർവാഹന വകുപ്പിന് നിർദ്ദേശമുണ്ട്. കൂടാതെ എല്ലാ വാഹനങ്ങളിലും കോവിഡ് ലോഗ് ബുക്ക് നിർബന്ധമാക്കും. യാത്രക്കാരുടെ വിവരങ്ങളും യാത്ര ചെയ്യുന്ന സ്ഥലങ്ങളും കോവിഡ് ലോഗ് ബുക്കിൽ എഴുതി സൂക്ഷിക്കണം.

സംസ്ഥാനത്ത് ടാക്സി വാഹനങ്ങളിലും കോവിഡ് മുൻകരുതൽ മാർഗ നിർദേശം ശക്തമാക്കി. ഓട്ടൊ ടാക്സി, സ്റ്റേജ് ഗ്യാരേജ് ബസുകളിലും ഡ്രൈവറും യാത്രക്കാരും തമ്മിൽ പ്ലാസ്റ്റിക് ഷീറ്റോ, ആക്രലിക്ക് ഷീറ്റോ കൊണ്ട് വേർതിരിക്കണം എന്നും നിബന്ധനയുണ്ട് . യാത്രക്കാരുടെ വിവരങ്ങളും യാത്രാ വിവരങ്ങളും ഉൾപ്പെടുത്തിയ ലോഗ് ബുക്ക് വാഹനങ്ങളിൽ നിർബന്ധമാക്കി. ഇതിൽ യാത്രക്കാരുടെ ഫോൺ നമ്പറും അഡ്രസ്സും നിർബന്ധമായി എഴുതണം. നിർദ്ദേശങ്ങൾ പാലിക്കുന്നുണ്ടോ എന്നറിയാൻ മോട്ടോർ വാഹന വകുപ്പിന്റെ പരിശോധന ശക്തമാക്കും.