സ്വപ്‌നേ വേണ്ടിയിരുന്നോ... സംശയ നിഴലില്‍ മാത്രമായിരുന്ന ശിവശങ്കറില്‍ കൂടുതല്‍ സംശയം തോന്നിപ്പിച്ചത് തിരുവനന്തപുരത്തെ ഫ്‌ളാറ്റിലെ മൊഴിയെടുപ്പിനിടയില്‍; എന്തിന് ശിവശങ്കരന്‍ റൂമെടുത്ത് തന്നൂ എന്ന ചോദ്യത്തിന് ഉത്തരം നല്‍കാനാകാതെ സ്വപ്ന; ശിവശങ്കറിനും പങ്കെന്ന് സ്വപ്നയും സരിത്തും സാക്ഷ്യപ്പെടുത്തുമ്പോള്‍...
തിരുവനന്തപുരത്തെ സ്വപ്നയുടേയും സന്ദീപ് നായരുടേയും മൊഴിയെടുപ്പിലാണ് സ്വര്‍ണക്കടത്തിലെ കാണാച്ചരടുകള്‍ കൂടുതല്‍ വ്യക്തമായത്. അമ്പലംമുക്കിലെ സ്വന്തം ഫ്‌ളാറ്റിലേയും സെക്രട്ടറിയേറ്റിന് സമീപത്ത് ശിവശങ്കര്‍ എടുത്ത് നല്‍കിയ ഫ്‌ളാറ്റിലേയും മൊഴിയെടുപ്പിലാണ് കാര്യങ്ങള്‍ കൂടുതല്‍ വ്യക്തമായത്. അമ്പലംമുക്കിലെ തന്റെ ഫ്‌ളാറ്റില്‍ വച്ച് മൊഴിയെടുക്കുമ്പോള്‍ എന്‍ഐഎയുടെ ചോദ്യം കേട്ട് സ്വപ്നയുടെ കണ്ണ് നിറയുകയായിരുന്നു. ഒരിക്കല്‍ പോലും ഇങ്ങനെയൊരു ദുര്‍വിധിയുണ്ടാകുമെന്ന് പ്രതീക്ഷിച്ചിരുന്നില്ല. എന്തിന് ശിവശങ്കര്‍ ഫ്‌ളാറ്റെടുത്ത് തന്നെന്ന എന്‍ഐയുടെ ചോദ്യത്തിന് മുമ്പില്‍ സ്വപ്ന പതറി. ആ പതറല്‍ ശിവശങ്കറില്‍ കുരുക്ക് മുറുകുകയായിരുന്നു. സ്വര്‍ണക്കടത്തില്‍ ശിവശങ്കറിനും പങ്കെന്ന് നേരത്തെ തന്നെ സരിത്ത് മൊഴി നല്‍കിയിരുന്നു.
സ്വപ്നയെയും സന്ദീപിനെയും എന്‍.ഐ.എ ഇന്നലെ തിരുവനന്തപുരത്തെത്തിച്ച് ശിവശങ്കര്‍ ഏര്‍പ്പാടാക്കിയ സ്റ്റാച്യുവിലെ ഫ്‌ളാറ്റിലടക്കം എട്ടിടത്ത് തെളിവെടുത്തു. സ്വര്‍ണക്കടത്തിന്റെ ഗൂഢാലോചന ഈ ഫ്‌ളാ റ്റ് കേന്ദ്രീകരിച്ചായിരുന്നു. സ്വര്‍ണം ഒളിപ്പിച്ചതും ഇവിടെയാണെന്നാണ് പ്രതികളുടെ മൊഴി.തെളിവെടുപ്പിനു ശേഷം ചോദ്യം ചെയ്തപ്പോഴാണ് ശിവശങ്കറിന്റെ കുരുക്ക് മുറുക്കുന്ന മൊഴികള്‍ സ്വപ്ന നല്‍കിയത്. ഔദ്യോഗിക സംവിധാനങ്ങള്‍ സ്വര്‍ണക്കടത്തിന് ഉപയോഗിച്ചെന്നും സ്വപ്ന വെളിപ്പെടുത്തിയതോടെ ശിവശങ്കറിനെ ഉടന്‍ ചോദ്യം ചെയ്യേണ്ട സാഹചര്യമായി. ഇനി കടുത്ത നടപടികളിലേക്ക് എന്‍.ഐ.എയ്ക്കും കസ്റ്റംസിനും കടക്കാം. ഒമ്പതര മണിക്കൂര്‍ നീണ്ട കസ്റ്റംസിന്റെ ആദ്യ ചോദ്യം ചെയ്യല്‍ സൗഹാര്‍ദ പരമായിരുന്നു. ശാസ്ത്രീയവും മനശാസ്ത്രപരവുമായ രീതികളൊക്കെ ഉള്‍പ്പെടുത്തിയുള്ളതാവും എന്‍.ഐ.എയുടെ ചോദ്യം ചെയ്യല്‍. ഇത് ദിവസങ്ങള്‍ നീളാം.
നയതന്ത്ര ചാനല്‍ വഴിയുള്ള സ്വര്‍ണക്കടത്ത് ശിവശങ്കറിന് അറിയാമായിരുന്നെന്ന് കേസിലെ സരിത്തും സ്വപ്നയും എന്‍.ഐ.എയോട് സമ്മതിച്ചതോടെ ശിവശങ്കറിനെ ഉടന്‍ കസ്റ്റഡിയിലെടുക്കുമെന്നറിയുന്നു. ഐ. എ. എസ് ഉദ്യോഗസ്ഥനെ അറസ്റ്റ് ചെയ്താല്‍ അതിന് ശേഷം കേന്ദത്തിലും ചീഫ്‌സെക്രട്ടറിയെയും അറിയിക്കണമെന്നേയുള്ളൂ. വീണ്ടും ചോദ്യം ചെയ്യുമെന്ന് കസ്റ്റംസും വ്യക്തമാക്കിയതോടെ ഏത് ഏജന്‍സിയാണ് ആദ്യം ഇടപെടുകയെന്ന ആകാംക്ഷയാണ് ഇനിയുള്ളത്. കസ്റ്റഡിയിലെടുത്ത് കൊച്ചിയില്‍ കൊണ്ടുപോയി പ്രതിചേര്‍ത്ത് കോടതിയില്‍ റിപ്പോര്‍ട്ട് നല്‍കാനാണ് സാദ്ധ്യത.
സ്വപ്നയുടെ ഒരു ഫോണിലെ വിളികള്‍ മാത്രമാണ് പുറത്തു വന്നത്. നാല് സിംകാര്‍ഡുകള്‍ കൂടി ഉപയോഗിച്ചിരുന്നെന്നാണ് കണ്ടെത്തല്‍. ഉന്നതരുമായുള്ള വിളികളാണ് ഈ നമ്പരുകളിലുള്ളത്. ഫോണിലെ കാള്‍ വിവരങ്ങള്‍ ചൂണ്ടിക്കാട്ടിയുള്ള ചോദ്യംചെയ്യലിലാണ് സ്വപ്നയും സരിത്തും ശിവശങ്കറിനെതിരെയടക്കമുള്ള വിവരങ്ങള്‍ കസ്റ്റംസിന് നല്‍കിയത്. സന്ദീപിന്റെ വീട്ടില്‍ ഒളിച്ചുവച്ചിരുന്ന രണ്ട് ഫോണുകള്‍ എന്‍.ഐ.എ പിടിച്ചെടുത്തിരുന്നു. ഇതില്‍ നിന്ന് നിര്‍ണായക വിവരങ്ങള്‍ കിട്ടിയെന്നറിയുന്നു. കസ്റ്റംസ് പിടിച്ചെടുത്ത ശിവശങ്കറിന്റെ ഫോണിലെ മായ്ച്ചു കളഞ്ഞ ഡാറ്റ വീണ്ടെടുക്കാന്‍ സിഡാക്കിന്റെ സഹായം തേടിയിട്ടുണ്ട്.
സ്വര്‍ണക്കടത്തുമായി ബന്ധപ്പെട്ട് എന്‍.ഐ.എയും കസ്റ്റംസും ഇതുവരെ അറസ്റ്റു ചെയ്തത് 15 പേരെയാണ്. സ്വര്‍ണം വാങ്ങുകയും സ്വര്‍ണക്കടത്തിന് പണം നിക്ഷേപിക്കുകയും ചെയ്ത മലപ്പുറം കോട്ടയ്ക്കല്‍ വലക്കുളം പട്ടത്തോടില്‍ പി.ടി. അബ്ദു, കോഴിക്കോട് അരക്കിണര്‍ ഹെസ ജുവലറി പാര്‍ട്ണര്‍മാരായ കൊടുവള്ളി മാനിപുരം കൈവേലിക്കല്‍ കെ.വി. മുഹമ്മദ് അബ്ദു ഷമീം, വട്ടക്കിണര്‍ കൊങ്കിണിപ്പറമ്പ് ജാസ്മഹലില്‍ സി.വി. ജിഫ്‌സല്‍, എന്നിവരെ കസ്റ്റംസ് ഇന്നലെ അറസ്റ്റു ചെയ്തു. ജുവലറിയില്‍ നിന്ന് 3.72 കിലോഗ്രാം സ്വര്‍ണം കഴിഞ്ഞ ദിവസം പിടികൂടിയിരുന്നു.
https://www.facebook.com/Malayalivartha
