പന്തികേട് സ്പീക്കര്‍ക്ക് മണത്തില്ല പക്ഷേ സി.പി.ഐകാരനായ സ്ഥലം എം.എല്‍.എക്ക് മണത്തു; സന്ദീപിന്റെ കാര്‍ ഡോക്ടര്‍ വര്‍ക്ക്‌ഷോപ്പ് ഉദ്ഘാടനത്തില്‍ നിന്നും മാറി നിന്ന് സി.ദിവകാരന്‍ എം.എല്‍.എ; സി.പി.ഐ നേതാക്കളും പങ്കെടുത്തില്ല; സി.പി.എമ്മുകാര്‍ പങ്കെടുത്തു; ബി.ജെ.പി പ്രവര്‍ത്തകനോട് താല്‍പര്യം സി.പി.എമ്മുകാര്‍ക്ക് മാത്രമോ?
സ്വപ്‌ന വിളിച്ച വര്‍ക്ക്‌ഷോപ്പ് ഉദ്ഘാടനത്തില്‍ പങ്കെടുത്തില്‍ വിഴ്ചപറ്റിയെന്ന് സ്പീക്കര്‍ പി. ശ്രീരാമകൃഷ്ണന്‍ സമ്മതിക്കുന്നുണ്ട്. എന്നാല്‍ ഈ പരിപാടിയുടെ പന്തികേട് നേരത്തെ തന്നെ സ്ഥലം എം.എല്‍.എയായ സി. ദിവാകരന്‍ തിരിച്ചറിഞ്ഞു. അദ്ദേഹത്തെയും അദ്ദേഹത്തിന്റെ പാര്‍ട്ടിയിലെ മറ്റു നേതാക്കളെയും ചടങ്ങിലേക്ക് ക്ഷണിച്ചെങ്കിലും പോയില്ല. ഇന്റലിജന്‍സ് റിപ്പോര്‍ട്ട് കിട്ടിയില്ലെങ്കിലും സ്വന്തം ഇന്റലിജന്‍സ് ഉപയോഗിക്കാന്‍ കഴിഞ്ഞതിനാല്‍ സി.ദിവാകരനും സി.പി.ഐ സഖാക്കളും വിവാദത്തില്‍ നിന്നും രക്ഷപ്പെട്ടു. എന്നാല്‍ ആ ഇന്റലിജന്‍സിന്റെ അഭാവം സ്പീക്കര്‍ പി. ശ്രീരാമകൃഷ്ണനെ പെടുത്തുകയും ചെയ്തു.
സ്വര്‍ണക്കടത്തിലെ മുഖ്യ ആസൂത്രകനെന്ന് എന്‍.ഐ.എ വിലയിരുത്തുന്ന സന്ദീപ് നായരുടെ കാര്‍ ഡോക്ടര്‍ എന്ന വര്‍ക്ക്‌ഷോപ്പ് ഉദ്ഘാടനത്തിന്റെ വിവാദങ്ങള്‍ അവസാനിക്കുന്നില്ല. മന്ത്രിമാരോ സ്പീക്കറോ പങ്കെടുക്കുന്ന ചടങ്ങില്‍ സ്ഥലം എം.എല്‍.എ അധ്യക്ഷനായിരിക്കണമെന്ന പ്രോട്ടോക്കോള്‍ പാലിച്ചാണു നെടുമങ്ങാട്ടെ വര്‍ക്‌ഷോപ് ഉദ്ഘാടനച്ചടങ്ങിലേക്ക് സി. ദിവാകരനെ ക്ഷണിച്ചത്. എന്നാല്‍ തന്റെ സൗകര്യം മുന്‍കൂട്ടി ചോദിക്കാതെ തീയതിയും സമയവും തീരുമാനിച്ചതിനാലും പന്തികേടു മണത്തതിനാലും അദ്ദേഹം പോയില്ല. സി.പി.ഐ മണ്ഡലം സെക്രട്ടറി പാട്ടത്തില്‍ ഷെറീഫും പങ്കെടുത്തില്ല. സി.പി.എം ഏരിയ സെക്രട്ടറി ആര്‍. ജയദേവന്‍, നെടുമങ്ങാട് മുനിസിപ്പല്‍ ചെയര്‍മാനും ജില്ലയിലെ മുതിര്‍ന്ന സിപിഎം നേതാവുമായ ചെറ്റച്ചല്‍ സഹദേവന്‍ എന്നിവരും വിട്ടുനിന്നു.
സി.പി.എം ജില്ലാ കമ്മിറ്റി അംഗം കെ.എസ്. സുനില്‍കുമാര്‍, ജില്ലാ പഞ്ചായത്ത് അംഗം എല്‍.പി. മായാദേവി എന്നിവരാണു പങ്കെടുത്ത സി.പി.എം പ്രതിനിധികള്‍. സ്ഥാപനത്തെയും അതിനു നേതൃത്വം കൊടുക്കുന്നവരെയും കുറിച്ചു പാര്‍ട്ടി തലത്തില്‍ ഭിന്നാഭിപ്രായമുണ്ടായിരുന്നുവെന്നാണു സി.പി.എം ഏരിയ സെക്രട്ടറിയും സി.പി.ഐ മണ്ഡലം സെക്രട്ടറിയും ഒഴിവായി നിന്നതു വ്യക്തമാക്കുന്നത്. വിവാദം ഉയര്‍ന്നപ്പോള്‍ കാര്യങ്ങള്‍ വിശദീകരിക്കാനായി സി.പി.എം ഏരിയ സെക്രട്ടറി വാര്‍ത്താസമ്മേളനം നടത്താന്‍ മുതിര്‍ന്നെങ്കിലും ജില്ലാ നേതൃത്വം വിലക്കി.
സന്ദീപ് നായര്‍ ബി.ജെ.പി അനുഭാവിയും പ്രവര്‍ത്തകനുമാണെന്നാണ് സി.പി.എമ്മിന്റെ ന്യായികരണം. എന്നാല്‍ ബി.ജെ.പി പ്രവര്‍ത്തകന്റെ വര്‍ക്ക്‌ഷോപ്പ് ഉദ്ഘാടനത്തില്‍ സ്പീക്കറും സി.പിഎം നേതാക്കളും കൂട്ടതോടെ പങ്കെടുത്ത് എന്തിനെന്ന് വിശദീകരിക്കാന്‍ ഇതുവരെ സി.പി.എമ്മിന് സാധിച്ചിട്ടുമില്ല. ഇതിന് പിന്നില്‍ എന്തെങ്കിലും സാമ്പത്തിക നേട്ടം സി.പി.എമ്മിന് ലഭിച്ചിട്ടോയെന്നും വ്യക്തമല്ല. സാമ്പത്തികമായ നേട്ടവുമില്ലെങ്കില്‍ പിന്നെന്തിന് ബി.ജെ.പി പ്രവര്‍ത്തകന്റെ പരിപാടിയില്‍ പങ്കെടുക്കണമെന്ന ചോദ്യം പ്രസക്തമാണ്.
https://www.facebook.com/Malayalivartha
