അഞ്ച് വയസ്സുകാരി അനുഷ്കയുടെ രക്തഗ്രൂപ് ആർക്കും അത്ര പരിചിതമാകാൻ ഇടയില്ല. 'പി നള്‍ ' എന്ന ഗ്രൂപ്പിൽ പെട്ടതാണ് അനുഷ്കയുടെ രക്തം .. മനുഷ്യ ശരീരത്തിൽ സാധാരണയായി എ, ബി, ഒ, എ ബി എന്നീ രക്തഗ്രൂപ്പുകളാണുള്ളത്. ഒരു വ്യക്തിയുടെ രക്തത്തിൽ 345 ആൻറിജനുകളിൽ 160 എണ്ണമെങ്കിലും കാണും. ഇവയിൽ ആർഎച്ച് സിസ്റ്റത്തിൻറെ 61 ആൻറിജനുകളുണ്ടാകും. ഇവ മുഴുവൻ ഇല്ലാത്ത രക്തഗ്രൂപ്പാണ് ആർഎച്ച് നൾ രക്ത ഗ്രൂപ്പ് അഥവ സ്വർണ്ണരക്തം.

1974 ൽ ജനീവ യൂണിവേഴ്സ്റ്റി ആശുപത്രിയിൽ എത്തിയ തോമസ് എന്ന പത്തുവയസ്സുകാരനിലാണ് ആദ്യമായി ഈ രക്തഗ്രൂപ്പ് കണ്ടെത്തിയത്. രക്തത്തിലെ ആന്റിജന്റെ സാന്നിധ്യവും അസാന്നിധ്യവുമാണ് അപൂര്‍വ ഗ്രൂപ്പുകളുണ്ടാക്കുന്നത്. ഒരു രക്തഗ്രൂപ്പില്‍പെടുന്ന എല്ലാവരുടെയും രക്തത്തിലുള്ള ഏതെങ്കിലും ഒരു ആന്റിജന്‍ ഒരാളുടെ രക്തത്തില്‍ ഇല്ലെങ്കില്‍ അത് പൊതു ഗ്രൂപ്പിന്റെ പേരിനൊപ്പം ആ ആന്റിജന്‍ ‘നള്‍’ എന്നുകൂടി ചേര്‍ക്കും.

ഇവിടെ ‘എ പോസിറ്റീവ്’ ഗ്രൂപ്പ് രക്തമുള്ളവരിലുള്ള ‘പി ആന്റിജന്‍’ ഇല്ലാത്ത അപൂര്‍വ രക്തഗ്രൂപ്പാണ് കുട്ടിയുടെത് .. അതിനാൽ 'എ പോസീറ്റീവ്- പി നള്‍'. ഈ ഗ്രൂപ്പുകാർക്ക് ആർക്കു വേണമെങ്കിലും രക്തം നൽകാമെങ്കിലും, ഇവർക്ക് രക്തം സ്വീകരിക്കണമെങ്കിൽ സമാന ഗ്രൂപ്പിലുള്ളവരിൽ നിന്നേ സാധിക്കൂ. ഈ രക്തഗ്രൂപ്പുമായി 40 പേർ ലോകത്തുണ്ടെന്നാണ് കണക്കുകൾ

ഈ പ്രത്യേക ഗ്രൂപ്പിനായുയുള്ള ആരോഗ്യപ്രവര്‍ത്തകരുടെയും സന്നദ്ധ സംഘടനകളുടെയും തിരച്ചില്‍ വിഫലമായില്ല. കൊച്ചി അമൃത ആശുപത്രിയില്‍ ചികിത്സയിലുള്ള അനുഷ്ക്കയുടെ ശസ്ത്രക്രിയക്കായി ‘പി നള്‍’ ഫെനോടൈപ്പ് എന്ന അത്യപൂർവ്വ രക്ത ഗ്രൂപ്പ് കൊച്ചിയിലെത്തിച്ചു. ലോകമെമ്പാടുമുള്ള തിരച്ചിലിനൊടുവില്‍ മഹാരാഷ്ട്രയിലെ നാസിക്കില്‍ നിന്നാണ് പി നള്‍ രക്തഗ്രൂപ്പുള്ളയാളെ കണ്ടെത്തിയത്. ഇതോടെ അനുഷ്കയുടെ നിര്‍ണായക ശസ്ത്രക്രിയ നാളെ നടക്കും.

ഗുജറാത്തിൽ സ്ഥിര താമസമായ മലയാളി ദമ്പതികളുടെ അഞ്ച് വയസ്സ് പ്രായമായ മകള്‍ അനുഷ്ക കഴിഞ്ഞ വര്‍ഷമാണ് കെട്ടിടത്തിന്‍റെ മുകളില്‍ നിന്ന് വീണ് തലയ്ക്ക് സാരമായി പരുിക്കേറ്റത്. തുടർ ശസ്ത്രക്രിയക്ക് ഡോക്ടർമാർ നിർദേശിക്കുകയും കൊച്ചി അമൃത ആശുപത്രിയിൽ ചികിത്സ ആരംഭിക്കുകയും ചെയ്തു. ആദ്യഘട്ട ശസ്ത്രക്രിയ വിജയകരമായി പൂർത്തീയാക്കുകയും ചെയ്തിരുന്നു.

രണ്ടാം ഘട്ട ശസ്ത്രക്രിയക്ക് വേണ്ടിയായിരുന്നു അനുഷ്കയുടെ അപൂര്‍വ്വ രക്തഗ്രൂപ്പായ പി നളളിന് വേണ്ടി തെരച്ചില്‍ ആരംഭിച്ചത്. നാസികിൽ നിന്ന് മുംബൈയിലെത്തിച്ച് അവിടെ നിന്ന് വിമാനമാർഗമാണ് രക്തം കൊച്ചിയിലെത്തിച്ചത്. അത്യപൂർവ രക്തഗ്രൂപ്പായ പി നൾ അനുഷ്കക്ക് പുറമേ മംഗലാപുരം സ്വദേശിക്ക് മാത്രമാണ് ഉള്ളതെന്നായിരുന്നു കരുതിയിരുന്നത്. സമൂഹ മാധ്യമങ്ങൾ വഴിയുള്ള അന്വേഷണത്തോടെയാണ് നാസിക് സ്വദേശിയെ കണ്ടെത്തിയത്.