ചട്ടം ലംഘിച്ച് കോണ്‍സുലേറ്റ് ജനറലിന് ഗണ്‍മാന്‍; ബെഹ്‌റയുടെ നടപടി വിദേശകാര്യ മന്ത്രാലയത്തിന്റെ അനുമതിയില്ലാതെ; സേവനം നല്‍കിയത് 2017 മുതല്‍; സുരക്ഷാ ഉദ്യോഗസ്ഥന്റെ നിയമിനത്തില്‍ വിഴ്ചയെന്ന് കോണ്‍ഗ്രസ്
യു.എ.ഇ കോണ്‍സുലേറ്റ് ജനറലിന്റെ സുരക്ഷയ്ക്ക് പോലീസുകാരെ വിട്ടു നല്‍കിയ സര്‍ക്കാര്‍ നടപടി ഗുരുതരമായ ചട്ടലംഘനം. കോണ്‍സുല്‍ ജനറലിന്റെ ചുമതല വഹിക്കുന്ന അറ്റാഷെക്കാണ് സംസ്ഥാന സര്‍ക്കാര്‍ ഗണ്‍മാനെ അനുവദിച്ചത്. ഡി.ജി.പിയുടെ പ്രത്യേക താത്പര്യമാണ് ഇതിനു പുറകില്‍ എന്നാണ് ഫയലുകളില്‍ നിന്ന് വ്യക്തമാവുന്നതെന്ന് കോണ്‍ഗ്രസ് എം.എല്‍.എ വി.ടി ബല്‍റാം പറഞ്ഞിരുന്നു. കോണ്‍സുലേറ്റ് ജനറല്‍ സുരക്ഷ വേണമെന്ന് ആവശ്യപ്പെട്ട് ഡി.ജി.പി ലോക്‌നാഥ് ബെഹ്‌റയ്ക്കു കത്തു നല്‍കിയിരുന്നു. നിയമപ്രകാരം ഡി.ജി.പി ആ കത്ത് വിദേശകാര്യ മന്ത്രാലയത്തിന് അയച്ച് അംഗീകാരം വാങ്ങണം. എന്നാല്‍, വിദേശകാര്യ മന്ത്രാലയത്തിന്റെ അനുമതിയില്ലാതെയാണ് പോലീസുകാരനെ സുരക്ഷയ്ക്കായി നിയമിച്ചതെന്നാണ് പുറത്തുവരുന്ന വിവരം.
വിദേശ നയതന്ത്ര പ്രതിനിധികളുടെ ഇന്ത്യയിലെ പെരുമാറ്റത്തേക്കുറിച്ചും അവര്‍ക്കുള്ള ഡിപ്ലോമാറ്റിക് പരിഗണനകളേക്കുറിച്ചും കേന്ദ്ര വിദേശകാര്യ വകുപ്പ് വിശദമായ പ്രോട്ടോക്കോള്‍ പുറത്തിറക്കിയിട്ടുണ്ട്. അതിലെ 22-ാം അധ്യായത്തില്‍ നയതന്ത്ര പ്രതിനിധികളുടെ സുരക്ഷയേക്കുറിച്ചുള്ള മാര്‍ഗ്ഗ നിര്‍ദ്ദേശങ്ങളുണ്ട്. കേന്ദ്ര വിദേശകാര്യ മന്ത്രാലയത്തിനാണ് സുരക്ഷയുടെ ഉത്തരവാദിത്തം. ഫോറിന്‍ റെപ്രസെന്റേഷന്‍സ് അവരുടെ ഔദ്യോഗിക പരിധിക്ക് പുറത്ത് സ്വന്തം നിലക്ക് സുരക്ഷാ ക്രമീകരണങ്ങള്‍ തേടുന്നത് വിദേശകാര്യ വകുപ്പ് കര്‍ശനമായി വിലക്കുന്നുണ്ട്. വകുപ്പിലെ പ്രോട്ടോക്കോള്‍ രണ്ടാം സെക്ഷനാണ് നയതന്ത്ര പ്രതിനിധികള്‍ക്ക് ആവശ്യാനുസരണം സുരക്ഷ നല്‍കാനുള്ള ചുമതല. എന്നാല്‍ ഇതിന്റെ പൂര്‍ണ ലംഘനമാണ് കേരളത്തിലെ യു.എ.ഇ കോണ്‍സുലേറ്റിലെ അറ്റാഷെക്ക് സംസ്ഥാന പോലീസ് നേരിട്ട് ഗണ്‍മാനെ അനുവദിച്ച നടപടി.
ഏതെങ്കിലും നയതന്ത്ര പ്രതിനിധിക്ക് സുരക്ഷാ ഭീഷണി ഉണ്ടെങ്കില്‍ അത് ഔദ്യോഗികമായി വിദേശകാര്യ മന്ത്രാലയത്തിലെ പ്രോട്ടോകോള്‍ വിഭാഗത്തെ അറിയിക്കണം. സംസ്ഥാന സര്‍ക്കാരുമായി നേരിട്ട് ആശയവിനിമയം നടത്തുന്നതിന് വിലക്കുണ്ട്. സുരക്ഷാ ഭീഷണിയുള്ളതിനാല്‍ ചൈനീസ് എംബസിയിലും, പാക്കിസ്ഥാന്‍ ഹൈകമ്മിഷന്‍ ഓഫിസിലും സുരക്ഷ ഏര്‍പ്പെടുത്തിയിട്ടുണ്ട്. ഇന്ത്യന്‍ ഓഫിസുകള്‍ക്ക് ആ രാജ്യങ്ങളിലും സുരക്ഷയുണ്ട്.
ബെഹ്‌റയുടെ നടപടി വിദേശ നയതന്ത്ര പ്രതിനിധികളുമായി സിവില്‍ സര്‍വീസ് ഉദ്യോഗസ്ഥര്‍ നേരിട്ട് ആശയവിനിമയം നടത്തരുതെന്ന 1968 ലെ ഓള്‍ ഇന്ത്യ സര്‍വീസ് റൂളിന്റെ ലംഘനമാണെന്ന് നയതന്ത്ര മേഖലയില്‍ പ്രവര്‍ത്തിക്കുന്നവര്‍ പറയുന്നു. 2017 ജൂണില്‍ കോണ്‍സുലേറ്റിലെ ചില ഉദ്യോഗസ്ഥര്‍ ആവശ്യപ്പെട്ടതനുസരിച്ച് കോണ്‍സുല്‍ ജനറലിന്റെ സുരക്ഷയ്ക്കായി പോലീസുകാരനെ വിട്ടുനല്‍കി. പിന്നീട്, കോണ്‍സുലേറ്റ് ജനറല്‍ ആവശ്യപ്പെട്ടപ്രകാരം ഓരോ വര്‍ഷവും സേവനം നീട്ടി. സ്വര്‍ണക്കടത്തുകേസ് വിവാദമായതോടെ യു.എ.ഇ കോണ്‍സുലേറ്റ് ജനറലിന്റെ സുരക്ഷാ ഡ്യൂട്ടിയിലുണ്ടായിരുന്ന ജയഘോഷിന്റെ നീക്കങ്ങള്‍ എന്‍.ഐ.എ പരിശോധിക്കുന്നുണ്ട്.
https://www.facebook.com/Malayalivartha
