ഡീസല്‍ വിലവര്‍ധനയും യാത്രക്കാരുടെ കുറവും കനത്ത സാമ്പത്തിക നഷ്ടമുണ്ടാക്കുന്നതിനാല്‍ ഓഗസ്റ്റ് ഒന്നു മുതല്‍ സര്‍വീസ് നിര്‍ത്തിവയ്ക്കുകയാണെന്നു സ്വകാര്യ ബസ് ഉടമകള്‍. ബസ് ഓടിക്കാത്ത സമയങ്ങളില്‍ നികുതിയിളവ് ആവശ്യപ്പെട്ടുകൊണ്ടം ഓഗസ്റ്റ് ഒന്നു മുതല്‍ സര്‍വീസ് നിര്‍ത്തിവയ്ക്കുകയാണെന്ന് അറിയിച്ചുകൊണ്ടും സര്‍ക്കാരിന് കത്തു നല്‍കുമെന്നു ബസ് ഉടമകളുടെ സംയുക്ത സമിതി അറിയിച്ചു.

കോവിഡ് മൂലം യാത്രക്കാരുടെ എണ്ണം ഗണ്യമായി കുറഞ്ഞതിനാല്‍ യാത്രക്കൂലി വര്‍ധിപ്പിച്ചെങ്കിലും വരുമാനത്തെ ബാധിച്ചെന്നു കേരള ബസ് ഓപ്പറേറ്റേഴ്സ് ഫെഡറേഷന്‍, കേരള ബസ് ഓപ്പറേറ്റേഴ്സ് ഓര്‍ഗനൈസേഷന്‍ എന്നിവര്‍ ഓണ്‍ലൈന്‍ യോഗത്തിനു ശേഷം അറിയിച്ചു.

ഡീസല്‍ നിറയ്ക്കാനുള്ള പണം പോലും ടിക്കറ്റ് വരുമാനമായി കിട്ടുന്നില്ല. അതിനു പുറമേ നികുതിയടയ്ക്കാന്‍ മാസം 10,000 രൂപ വേണം. ഏപ്രില്‍, മേയ്, ജൂണ്‍ മാസങ്ങളില്‍ ലഭിച്ച നികുതിയിളവ് മൂന്നുമാസത്തേക്കു കൂടി ദീര്‍ഘിപ്പിക്കണമെന്ന് ആവശ്യപ്പെട്ടിട്ടും സര്‍ക്കാര്‍ അനുവദിച്ചില്ല. ഈ സാഹചര്യത്തിലാണു സര്‍വീസ് നിര്‍ത്തിവയ്ക്കാന്‍ തീരുമാനിച്ചത്.

ലോക്ക്ഡൗണിനു മുമ്പ് 12,600 ബസുകളാണു സര്‍വീസ് നടത്തിയിരുന്നത്. നിരക്ക് വര്‍ധിപ്പിച്ചെങ്കിലും രണ്ടായിരത്തോളം ബസുകള്‍ മാത്രമേ സര്‍വീസ് നടത്തിയിരുന്നുള്ളൂ.