എല്ലാ എതിര്‍പ്പുകളേയും അതിജീവിച്ച് ചരിത്രത്തിന്റെ ഭാഗമായി ഇന്ന് അയോധ്യയില്‍ രാമക്ഷേത്രത്തിന് തുടക്കമാകുകയാണ്. നൂറ്റാണ്ടുകളായുള്ള ഭാരതീയരുടെ കാത്തിരിപ്പിനാണ് പ്രധാനമന്ത്രി നരേന്ദ്രമോദി വിരാമമിടുന്നത്. ശ്രീരാമ ചന്ദ്രന്‍ എന്ന അവതാര പുരുഷനെ പ്രതിഷ്ഠിക്കാനുള്ള ചരിത്ര നിയോഗം ലഭിച്ചത് നരേന്ദ്ര മോദിക്കുമാണ്. യാതൊരു രക്തച്ചൊരിച്ചിലുമില്ലാതെ ബാബറി മസ്ജിത് തര്‍ക്കത്തിനൊടുവില്‍ അയോധ്യയില്‍ ക്ഷേത്രമുയരുമ്പോള്‍ മഹാത്ഭുതമെന്നല്ലാതെ എന്ത് പറയാന്‍. ശ്രീരാമന്റെ ധര്‍മ്മ യുദ്ധം പോലെ രാമ ക്ഷേത്രവും ഇനി ചരിത്രത്തിനന്റെ ഭാഗം. ആ ചരിത്ര നിമിഷത്തിന് ഇനി മണിക്കൂറുകള്‍ മാത്രമാണ് ഇനിയുള്ളത്.

രാമമന്ത്രധ്വനികള്‍ മുഴങ്ങുന്ന ക്ഷേത്ര നഗരിയായ അയോദ്ധ്യയില്‍ ഇന്ന് ഉച്ചയ്ക്ക് 12.30ന് രാമക്ഷേത്ര നിര്‍മ്മാണത്തിന് തുടക്കം കുറിച്ച് ഭൂമിപൂജ നടക്കും. പ്രധാനമന്ത്രി നരേന്ദ്ര മോദി രാമനാമം ആലേഖനം ചെയ്ത വെള്ളി കൊണ്ടുള്ള ശില സ്ഥാപിക്കുന്നതോടെ ക്ഷേത്ര നിര്‍മ്മാണത്തിന് തുടക്കമാവും.

കൊവിഡ് നിയന്ത്രണങ്ങള്‍ നിലവിലുണ്ടെങ്കിലും അയോദ്ധ്യ പതിറ്റാണ്ടുകള്‍ നീണ്ട തര്‍ക്കങ്ങളുടെയും സംഘര്‍ഷത്തിന്റെയും നിയമയുദ്ധത്തിന്റെയും കാറും കോളും ഒഴിഞ്ഞ് ആഘോഷ ലഹരിയിലാണ്.ശക്തമായ സുരക്ഷാസന്നാഹങ്ങള്‍ക്ക് നടുവില്‍ കൊവിഡ് പ്രോട്ടോക്കോള്‍ പ്രകാരമായിരിക്കും ചടങ്ങുകള്‍. അയോദ്ധ്യ നഗരത്തിലേക്കുള്ള പ്രവേശനം കര്‍ശനമായി നിയന്ത്രിച്ചിട്ടുണ്ട്. പുറത്തുനിന്ന് ക്ഷണിക്കപ്പെട്ടവര്‍ക്ക് മാത്രമാണ് ചടങ്ങില്‍ പ്രവേശനം. ഹനുമാന്‍ ഗഢി മുതല്‍ രാമക്ഷേത്രം വരെയുള്ള പ്രദേശത്തെ തദ്ദേശീയര്‍ക്ക് പ്രത്യേക പാസ് നല്‍കിയിട്ടുണ്ട്.ഭൂമിപൂജയ്ക്ക് മുന്നോടിയായുള്ള ഗണേശ പൂജയും മറ്റ് ചടങ്ങുകളും ഇന്നലെ നടന്നു. താത്കാലിക ശ്രീകോവിലില്‍ സൂക്ഷിച്ചിട്ടുള്ള രാംലല്ല വിഗ്രഹത്തില്‍ രണ്ട് ദിവസമായി നടക്കുന്ന പ്രത്യേക പൂജ ഇന്നും തുടരും. ഇന്നത്തെ പൂജയ്ക്ക് വിഗ്രഹത്തെ പച്ചനിറമുള്ള വസ്ത്രം ധരിപ്പിക്കുന്നതിനെ ചൊല്ലി വിവാദവുമുയര്‍ന്നു.

രാജ്യമെമ്പാടും നിന്നുള്ള 36 ആദ്ധ്യാത്മിക പ്രസ്ഥാനങ്ങളുടെ പ്രതിനിധികളായി 135 സന്യാസിവര്യന്മാര്‍ ഉള്‍പ്പെടെ 175 പേര്‍ക്കാണ് ഭൂമിപൂജാ ചടങ്ങിന് ക്ഷണക്കത്ത് നല്‍കിയിട്ടുള്ളത്. രാജ്യത്തിന് പുറത്തുനിന്നുള്ള പ്രതിനിധിയായി നേപ്പാളിലെ ജാനകീ ക്ഷേത്രത്തിന്റെ പുരോഹിതനും ഉണ്ട്. 1990ല്‍ പൊലീസ് വെടിവയ്പില്‍ കൊല്ലപ്പെട്ട കര്‍സേവകരുടെ ബന്ധുക്കളെയും ക്ഷണിച്ചിട്ടുണ്ട്.രാംലല്ലയുടെ ചിത്രം ആലേഖനം ചെയ്ത ക്ഷണക്കത്തില്‍ പ്രധാനമന്ത്രി നരേന്ദ്രമോദിയും ആര്‍.എസ്.എസ് ദേശീയ അദ്ധ്യക്ഷന്‍ മോഹന്‍ ഭാഗവതും ഉള്‍പ്പെടെ അഞ്ച് പേരേ ഉള്ളൂ. രാമജന്മഭൂമി ട്രസ്റ്റ് അദ്ധ്യക്ഷന്‍ മഹന്ത് നൃത്യഗോപാല്‍ ദാസ്, ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ്, യു.പി ഗവര്‍ണര്‍ ആനന്ദി ബെന്‍ പട്ടേല്‍ എന്നിവരാണ് മറ്റുള്ളവര്‍. ഈ അഞ്ച് പേര്‍ മാത്രമാവും വേദിയില്‍ ഉണ്ടാവുക. സുരക്ഷ ഉറപ്പാക്കാന്‍ ക്ഷണക്കത്തില്‍ സെക്യൂരിറ്റി കോഡ് ഉണ്ട്.

രാവിലെ 10.35ന് ലക്‌നൗ വിമാനത്താവളത്തില്‍ എത്തുന്ന മോദി 11.30ന് അയോദ്ധ്യയില്‍ ഹെലികോപ്ടറില്‍ എത്തും. 11.40ന് ഹനുമാന്‍ ഗഢി ക്ഷേത്രത്തില്‍ ദര്‍ശനം നടത്തി 12ന് രാമജന്മഭൂമിയില്‍ എത്തും. രാംലല്ല ദര്‍ശനത്തിന് ശേഷം 12.15ന് വൃക്ഷത്തൈ നടും. 12.30ന് ഭൂമിപൂജയും 12.40ന് വെള്ളി ശില സ്ഥാപിക്കുകയും ചെയ്യും. തുടര്‍ന്ന് രാമക്ഷേത്രത്തിന്റെ ചിത്രമുള്ള സ്റ്റാമ്പ് പ്രകാശനം ചെയ്യും. മഹന്ത് നൃത്യഗോപാല്‍ ദാസുമായും മറ്റ് ട്രസ്റ്റ് അംഗങ്ങളുമായും കൂടിക്കാഴ്ച നടത്തിയതിന് ശേഷം മോദി ഡല്‍ഹിക്ക് മടക്കം.

ലോക രാഷ്ട്രങ്ങള്‍ പോലും ഉറ്റു നോക്കുകയാണ് ഈ ഭൂമി പൂജ. ലോകത്തിലെ തന്നെ മഹാത്ഭുതമായി ഈ മഹാക്ഷേത്രം മാറും. ലോകത്തിലെ മൂന്നാമത്തെ വലിയ ക്ഷേത്രമാണ് അയോധ്യയില്‍ ഉയരുന്നത്. മൂന്ന് വര്‍ഷം കൊണ്ട് ആദ്യഘട്ട നിര്‍മ്മാണം പൂര്‍ത്തിയാക്കും. പത്ത് വര്‍ഷത്തോളമെടുക്കും ക്ഷേത്രം പൂര്‍ണമായി പണി തീരാന്‍. അങ്ങനെ അവതാര പുരുഷനായ ശ്രീരാമ ചന്ദ്രനായുള്ള ക്ഷേത്രമുയരുമ്പോള്‍ ഭക്തരുടെ മനസ് സന്തോഷത്താല്‍ ആറാടുകയാണ്. അയോധ്യ ഉത്സവ ലഹരിയിലാണ്. എവിടേയും രാമനാമ മന്ത്ര ധ്വനികള്‍ മാത്രം.