തൃശൂര്‍ പൂരത്തിന് ആനകളെ എഴുന്നള്ളിക്കുന്നത് അവസാനിപ്പിക്കണമെന്ന് ആവശ്യപ്പെട്ട് മുഖ്യമന്ത്രി ഉമ്മന്‍ ചാണ്ടിക്ക് ഹോളിവുഡ് നടി പമേല ആന്‍ഡേഴ്‌സന്റെ കത്ത്. പൂരത്തിനു ജീവനുള്ള ആനകളെ ഒഴിവാക്കി, മുളകൊണ്ടോ കടലാസുകൊണ്ടോ നിര്‍മിച്ച ആനകളെ എഴുന്നള്ളിക്കണമെന്നും പമേല മുഖ്യമന്ത്രിക്ക് അയച്ച ഇമെയിലില്‍ പറയുന്നു. അതിനുള്ള മുഴുവന്‍ ചെലവും വഹിക്കാമെന്ന ഓഫറും പമേല ആന്‍ഡേഴ്‌സണ്‍ മുന്നോട്ടുവെച്ചിട്ടുണ്ട്.
തൃശൂര്‍ പൂരത്തിന് ആനകളെ ഉപയോഗിക്കരുതെന്ന് കേന്ദ്ര മൃഗസംരക്ഷണവകുപ്പ് കേരള സര്‍ക്കാരിന് ഉപദേശം നല്‍കിയിരുന്നു. പൂരത്തിന്റെ പേരില്‍ ആനകളെ പീഡിപ്പിക്കുന്നത് തടയണമെന്ന് ആവശ്യം ഉയരുന്ന സാഹചര്യത്തിലാണ് പമേല ഇത് സംബന്ധിച്ച് മുഖ്യമന്ത്രിക്ക് കത്തെഴുതിയിരിക്കുന്നത്. മൃഗസംരക്ഷക സംഘടനയായ പെറ്റയുടെ(പീപ്പിള്‍ ഫോര്‍ എത്തിക്കല്‍ ട്രീറ്റ്‌മെന്റ് ഓഫ് ആനിമല്‍സ്) ഇന്ത്യയിലെ രക്ഷാധികാരി കൂടിയാണ് പമേല. രണ്ട് ദിവസം മുമ്പ് അയച്ച ഇമെയിലിന് മറുപടി ലഭിച്ചിട്ടില്ലെന്ന് പെറ്റ അറിയിച്ചു.

കേരളത്തിന്റെയും അന്താരാഷ്ട്ര സമൂഹത്തിന്റെയും വികാരം ആനകളെ ഉപയോഗിക്കുന്നതിന് എതിരാണെന്നാണ് അറിയുന്നത്. ചങ്ങലക്കിട്ട ആനകളെ ഉപയോഗിക്കുന്നത് ജനങ്ങളുടെ ആഘോഷങ്ങളെ നശിപ്പിക്കുകയാണ് ചെയ്യുക. കഴിഞ്ഞ 15 വര്‍ഷത്തിനിടെ അഞ്ചൂറോളം പേര്‍ ആനയുടെ പ്രതികാരത്തിന് ഇരയായിട്ടുണ്ടെന്ന കാര്യം ഓര്‍ക്കണമെന്ന കാര്യവും പമേല ഇമെയില്‍ പറയുന്നുണ്ട്.

തൃശൂര്‍ പൂരത്തിന് ആനകളെ എഴുന്നള്ളിക്കുന്നതിനെതിരെ ഹൈക്കോടതിയില്‍ പെറ്റ ഹര്‍ജി നല്‍കിയിട്ടുണ്ട്. നാഷണല്‍ ആനിമല്‍ വെല്‍ഫയര്‍ ബോര്‍ഡിനെ എതിര്‍കക്ഷിയാക്കിയാണ് ഹര്‍ജി. ചട്ടങ്ങളും നിയമങ്ങലും ലംഘിച്ചാണ് പൂരത്തിന് ആനകളെ എഴുന്നള്ളിക്കുന്നത് എന്ന് ചൂണ്ടിക്കാട്ടിയാണ് സംഘടന കോടതിയെ സമീപിച്ചിരിക്കുന്നത്. ഹൈക്കോടതി ഇന്ന് ഹര്‍ജി പരിഗണിച്ചേക്കും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha