ചെറ്റക്കുടിലില്‍ നിന്നും ഇന്ത്യയുടെ പ്രധാനമന്ത്രിയിലേക്ക് നരേന്ദ്രമോഡി, കൊട്ടാരത്തില്‍ നിന്നും കര്‍ഷകരിലേക്ക് രാഹുല്‍ ഗാന്ധിയുടെ യാത്ര
ചെറ്റക്കുടിലില്‍ നിന്നും ഇന്ത്യയുടെ പ്രധാനമന്ത്രിയായി തീര്‍ന്ന മോഡിയും കൊട്ടാരത്തില്‍ വളര്‍ന്ന് സാധാരണക്കാരന്റെ പ്രശ്‌നങ്ങളറിയാന്‍ ശ്രമിക്കുന്ന രാഹുല്‍ ഗാന്ധിയും തമ്മിലാണ് ഇപ്പോഴത്തെ മത്സരം. മാധ്യമ ശ്രദ്ധ തങ്ങളില്‍ എത്തിക്കാനുള്ള പെടാപാടിലാണ് രണ്ടുപേരും. രാഹുല്‍ ഗാന്ധി മോഡിയെ തോല്‍പ്പിക്കാന്‍ ശ്രമിക്കുകയാണോ അതോ മോഡിയെ അനുകരിക്കാന്‍ ശ്രമിക്കുകയാണോവെന്നുമാണ് ജനങ്ങളുടെ സംശയം. എന്നും മാധ്യമ ശ്രദ്ധയാകര്‍ഷിക്കുന്ന കാര്യങ്ങളിലായിരുന്നു മോഡിയുടെ ശ്രദ്ധ. മോഡിയെ പ്രധാനമന്ത്രിയാക്കിയതും അരവിന്ദ് കെജ്രിവാളിനെ മുഖ്യമന്ത്രിയാക്കിയതും ഇന്ത്യയുടെ മാധ്യമങ്ങളാണ്. ഈ കാര്യം നേരത്തെ തിരിച്ചറിഞ്ഞ് പ്രവര്‍ത്തിച്ചതാണ് സാധാരണക്കാരനായ മോഡിയെ ഇന്ത്യയുടെ പ്രധാനമന്ത്രിയാക്കിയത്. രാഹുല്‍ ഗാന്ധിക്ക് ഇത് മനസിലാക്കാന്‍ 56 ദിവസത്തെ അജ്ഞാതവാസം വേണ്ടി വന്നു. അത് കൊണ്ടാണ് രാഹുല്‍ഗാന്ധി ഇപ്പോള്‍ തന്റെ പിറകേ മാധ്യമങ്ങളെ ചുറ്റിക്കുന്നത്. എന്തായാലും മോഡിക്കെതിരെ യുദ്ധപ്രഖ്യാപനവുമായാണ് 56ദിവസത്തെ അജ്ഞാതവാസത്തിന് ശേഷം രാഹുല്‍ എത്തിയത്. മോഡി വിദേശ സന്ദര്‍ശനം കഴിഞ്ഞ് ഇന്ത്യയിലെത്തിയപ്പോള്‍ തന്നെ രാഹുലും എത്തി.
സാധാരണക്കാരായ കൃഷിക്കാരും തൊഴിലാളികളുമാണ് തന്റെ ശക്തിയെന്ന് പ്രഖ്യാപിച്ച രാഹുല്‍ഗാന്ധി കര്‍ഷകരുടെ ഭൂമി ഏറ്റെടുക്കാന്‍ താന്‍ ഉള്ളപ്പോള്‍ അനുവദിക്കില്ലെന്നും പാര്‍ലമെന്റില്‍ വീറോടെ പറഞ്ഞപ്പോള്‍ അത് പഴയരാഹുലല്ലെന്ന് വിദേശമാധ്യമങ്ങള്‍ എഴുതി. പാര്‍ലമെന്റില്‍ കേന്ദ്രസര്‍ക്കാരിന്റെ നയങ്ങള്‍ക്കെതിരെ വീറോടെ വാദിച്ചു. കേഥാര്‍നാഥ് ക്ഷേത്ര ദര്‍ശനം കഴിഞ്ഞ തിരിച്ചെത്തിയ രാഹുല്‍ ഗാന്ധി ഇന്നലെ പഞ്ചാബിലേക്ക് പോയത് ലോക്കല്‍ ട്രെയില്‍ സാധാരണക്കാരോടൊപ്പം യാത്രചെയ്ത്. ഇതും മാധ്യമ ശ്രദ്ധയാകര്‍ഷിച്ചു. മോഡിയില്‍ നിന്നുതന്നെ പാഠമുള്‍കൊണ്ടുകൊണ്ടാണ് രാഹുല്‍ ഗാന്ധിയുടെ പ്രവര്‍ത്തനം. മാധ്യമങ്ങളുടെ ശ്രദ്ധ തങ്ങളില്‍ കേന്ദ്രീകരിക്കാനാണ് രാഹുല്‍ഗാന്ധിയും മോഡിയും മത്സരിക്കുന്നത്. മോഡിയെപ്പോലെ തന്നെ വിദശ സന്ദര്‍ശനം നടത്തി മോഡിയുടെ നയങ്ങള്‍ പൊള്ളയാണെന്ന് വരുത്തിതീര്‍ക്കാനും രാഹുലിന് പദ്ധതിയുണ്ട്. അതിന്റെ ഭാഗമായാണ് ഇന്ത്യയുടെ സാംസ്‌കാരിക നഗരങ്ങള്‍ രാഹുല്‍ഗാന്ധി സന്ദര്‍ശിക്കുന്നത്.
കര്‍ഷകരുടെ അവസ്ഥ നേരില്‍ കണ്ടറിയാനാണ് കഴിഞ്ഞ ദിവസം ട്രെയിനില്‍ കയറി യാത്രയെന്ന് രാഹുല്‍ ഗാന്ധി മാധ്യമപ്രവര്‍ത്തകരോട് പറഞ്ഞു. ഭൂമിയേറ്റെടുക്കല്‍ ബില്ലിന്റെ പേരില്‍ കൃഷിഭൂമി തട്ടിയെടുക്കുകയാണ്. കര്‍ഷകരുടെ പ്രശ്‌നങ്ങള്‍ അവര്‍ക്കൊപ്പം നിന്ന് അറിയാനാണ് തന്റെ ആഗ്രഹം. മഗോവിന്ദ്ഗഡ്, ഖന്ന മണ്ഡി, അംബാല ഗ്രാമങ്ങളാണ് രാഹുല്‍ സന്ദര്‍ശിക്കുക. ലോക്‌സഭയിലും പുറത്തും ഭൂമിയേറ്റെടുക്കല്‍ ബില്ലിന്റെ പേരില്‍ സര്‍ക്കാരിനെതിരേ ശക്തമായ നിലപാട് എടുത്തതിന്റെ തുടര്‍ച്ചയായാണ് രാഹുലിന്റെ യാത്ര. പഞ്ചാബിലെത്തിയ രാഹുല്‍ കര്‍ഷകരുമായി സംവദിച്ചു.ഖന്നയിലെ കര്‍ഷക കുടുംബത്തിനൊപ്പം രാഹുല്‍ ഒരു രാത്രി തങ്ങുമെന്നും സൂചനയുണ്ട്. എന്നാല്‍ രാഹുല്‍ ഗാന്ധിയും കോണ്‍ഗ്രസും രാഷ്ട്രീയം കളിക്കുകയാണെന്നാണ് ബിജെപിയുടെ ആരോപണം.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
