ഇനിയൊരു സ്ത്രീയെ കുറിച്ചും പറയരുത്... സ്ത്രീകളെ അപമാനിച്ചുകൊണ്ടുള്ള വീഡിയോ പോസ്റ്റ് ചെയ്ത ഡോ.വിജയ് പി.നായരുടെ മുഖത്തടിച്ച് ഭാഗ്യലക്ഷ്മി; സ്ത്രീകളെ തന്റെ വീഡിയോ വഴി അറിഞ്ഞോ അറിയാതെയോ വേദനിപ്പിച്ചിട്ടുണ്ടെങ്കില്‍ താന്‍ മാപ്പുപറയുന്നുവെന്ന് വിജയ് പി.നായര്‍
സ്ത്രീകളെ അപമാനിച്ചുകൊണ്ടുള്ള വീഡിയോ സാമൂഹ്യമാധ്യമങ്ങളില്‍ പ്രചരിപ്പിച്ച സംഭവത്തില്‍ ഡോ.വിജയ് പി.നായരെക്കൊണ്ട് മാപ്പ് പറയിപ്പിച്ചു. ഡബിങ് ആര്‍ട്ടിസ്റ്റ് ഭാഗ്യലക്ഷ്മി, ആക്ടിവിസ്റ്റുകളായ ദിയ സന, ശ്രീലക്ഷ്മി അറയ്ക്കല്‍ എന്നിവരാണ് വിജയ് പി.നായരുടെ താമസസ്ഥലത്തെത്തി മാപ്പ് പറയിപ്പിച്ചത്. ഇനിയൊരു സ്ത്രീയെ കുറിച്ചും പറയരുത്' എന്ന് പറഞ്ഞ് പ്രതിഷേധിച്ച ഇവര്‍ വിജയ് പി.നായരുടെ ശരീരത്തില്‍ കരി ഓയില്‍ ഒഴിച്ചു. ഭാഗ്യലക്ഷ്മി വിജയ് പി.നായരുടെ മുഖത്തടിച്ചു. തുടര്‍ന്നാണ് ഇയാളെക്കൊണ്ട് മാപ്പ് പറയിച്ചത്. ഗാന്ധാരിയമ്മന്‍ കോവില്‍ റോഡിലെ വിജയ് പി.നായരുടെ താമസസ്ഥലത്തെത്തിയായിരുന്നു ആക്രമണം. മലയാള സിനിമയിലെ ഡബിങ് ആര്‍ട്ടിസ്റ്റിനെയും മറ്റ് നിരവധി ഫെമിനിസ്റ്റുകളെയും അപമാനിച്ചുകൊണ്ട് വീഡിയോ തയാറാക്കി വിജയ് പി.നായര്‍ സാമൂഹ്യമാധ്യമങ്ങളില്‍ പങ്കുവച്ചതാണ് പ്രതിഷേധത്തിനിടയാക്കിയത്. ഇയാള്‍ യൂടൂബില്‍ പോസ്റ്റ് ചെയ്ത വീഡിയോക്കെതിരെ സമൂഹമാധ്യമങ്ങളില്‍ വന്‍ പ്രതിഷേധമാണ് ഉയര്‍ന്നത്. നിരവധി പേര് വീഡിയോക്കെതിരെ യൂടൂബിന് റിപ്പോര്‍ട്ട് ചെയ്തിരുന്നു. കേരളത്തിലെ സ്ത്രീകളെ തന്റെ വീഡിയോ വഴി അറിഞ്ഞോ അറിയാതെയോ വേദനിപ്പിച്ചിട്ടുണ്ടെങ്കില്‍ താന്‍ മാപ്പുപറയുന്നുവെന്ന് വിജയ് പി.നായര്‍ പ്രതിഷേധകരോട് പറയുന്നുണ്ട്. ഇയാള്‍ സ്ത്രീകള്‍ക്കെതിരായി പരാമര്‍ശങ്ങള്‍ നടത്തിയ വീഡിയോകള്‍ പ്രതിഷേധക്കാര്‍ യുട്യൂബില്‍ നിന്ന് നീക്കം ചെയ്യിപ്പിക്കുന്നതും വീഡിയോയില്‍ കാണാം. ദിയ സന, ശ്രീലക്ഷ്മി എന്നിവര്‍ ഈ വീഡിയോ അവരുടെ ഫെയ്‌സ്ബുക്ക് അക്കൗണ്ടില്‍ ലൈവായി നല്‍കിയിരുന്നു. നിമിഷങ്ങള്‍ക്കകം വീഡിയോ വലിയ ചര്‍ച്ചയായി.
https://www.facebook.com/Malayalivartha
