ഇന്റർനെറ്റ് സൗകര്യമൊരുക്കാൻ നാട്ടിലൊരുപാട് കുത്തക കമ്പനികളുള്ളപ്പോൾ സംസ്ഥാന സർക്കാർ എന്തിന് അതേറ്റെടുക്കണമെന്നാണ് കെ-ഫോൺ പദ്ധതിക്കെതിരായ അന്വേഷണത്തിലൂടെ കേന്ദ്ര അന്വേഷണ ഏജൻസികൾ പരോക്ഷമായി ചോദിക്കുന്നതെന്ന് മുഖ്യമന്ത്രി പിണറായി വിജയൻ പറഞ്ഞു. 'അവരോട് അതേ നാണയത്തിൽ പറയുകയാണ്, അതങ്ങ് മനസിൽ വച്ചാൽ മതി. ഒരു കുത്തകയുടെയും വക്കാലത്തുമെടുത്ത് ഇങ്ങോട്ട് വരേണ്ട. നിങ്ങൾക്കെന്തിനാണ് കെ-ഫോൺ, അതിനൊക്കെ ഇവിടെ വേറെയാളുകളില്ലേ എന്ന താത്പര്യവും വച്ചാണ് നീക്കങ്ങൾ. ആ താല്പര്യവും വച്ച് അവിടെയിരുന്നാൽ മതി.

ഇങ്ങോട്ട് വരേണ്ട"- കടുത്ത സ്വരത്തിൽ മുഖ്യമന്ത്രി പറഞ്ഞു. വികസനപ്രവർത്തനങ്ങളോട് നാടും ജനങ്ങളും അനുകൂലമാണ്. എന്നാൽ ചിലർക്കുള്ള പ്രയാസം, അത് എൽ.ഡി.എഫ് സർക്കാരിന്റെ കാലത്താണല്ലോ നടക്കുന്നത് എന്നതിലാണ്. നാടിന്റെ വികസനം ഉറപ്പുവരുത്തുകയാണ് സർക്കാരിന്റെ ധർമ്മം. കേരളത്തിന് മികച്ച ഗവേണൻസിനുള്ള അവാർഡ് തുടർച്ചയായി ലഭിക്കുന്നതിൽ വിപുലമായ പങ്ക് നിർവഹണോദ്യോഗസ്ഥർക്കുണ്ട്. ആ ഉദ്യോഗസ്ഥർക്കെതിരെ ഇന്ത്യാരാജ്യത്തെ ഒരേയൊരു അന്വേഷണ ഏജൻസിയൊഴിച്ച് എല്ലാ ഏജൻസികളും വട്ടമിട്ട് പറക്കുകയാണ്.

സർക്കാരിന്റെ വികസന പദ്ധതികൾക്ക് നേതൃത്വം നൽകുന്ന ഉദ്യോഗസ്ഥരെ നിസ്സംഗരാക്കുന്ന നിലയിൽ ഇടപെടുന്നതിന്റെ ഉദ്ദേശ്യമെന്താണ്? ലൈഫ് പദ്ധതി കൊണ്ട് ഗുണം കിട്ടുന്നത് വീടൊരു സ്വപ്നമായി മാത്രം കണ്ട് മണ്ണടിഞ്ഞ് പോകുന്ന ലക്ഷങ്ങൾക്കാണ്. അതിന്റെ ചുമതലക്കാരനായ ഉദ്യോഗസ്ഥനെ, ഒന്നിന് പിറകെ ഒന്നായി ഏജൻസികൾ വിളിച്ചുവരുത്തി ചോദ്യം ചെയ്യുന്നതെന്തിനാണ്? യുവതയുടെ പ്രതീക്ഷയായ കെ-ഫോൺ ചിലർക്ക് പ്രയാസമുണ്ടാക്കും. ദീർഘകാലമായി ഷെൽഫിൽ കിടന്നിരുന്ന ടോറസ് പദ്ധതിയോട് സർക്കാർ താത്പര്യം കാട്ടിയത് പതിനയ്യായിരം യുവാക്കൾക്ക് തൊഴിൽ ലഭിക്കുമെന്നതിനാലാണ്.

നാടിനോട് താത്പര്യമുള്ള സർക്കാർ ഇതിനോടും താത്പര്യം കാട്ടുക സ്വാഭാവികമല്ലേ.ഏതാനും വികലമനസുകളുടെ താത്പര്യത്തിനൊത്ത് തുള്ളിക്കളിക്കേണ്ടവരായി അന്വേഷണ ഏജൻസികൾ മാറരുത്. 2016ൽ എന്താണോ ഉണ്ടായിരുന്നത്, അവിടെ നിന്ന് മുന്നോട്ട് കൊണ്ടുപോകേണ്ട ഉത്തരവാദിത്വമാണ് നിറവേറ്റുന്നത്.

അതിനോട് രാഷ്ട്രീയ വിയോജിപ്പുള്ളവരുണ്ട്. ആരൊക്കെ എതിർത്താലും നാടും ജനങ്ങളും ഏല്പിച്ച ഉത്തരവാദിത്വം സർക്കാർ ഇനിയും നിറവേറ്റും. ശിവശങ്കറിന്റേതായി ഇന്നലെ പുറത്തുവന്ന മൊഴിയിലേക്ക് താനിപ്പോൾ കടക്കുന്നില്ലെന്നും മുഖ്യമന്ത്രി വ്യക്തമാക്കി.

എന്നാൽ സ്വര്‍ണക്കടത്ത്, ലൈഫ്‌മിഷന്‍ തുടങ്ങിയ കേസുകളില്‍ രാഷ്‌ട്രീയ നേതാക്കളുടെ പേരു പറയാത്തതുകൊണ്ടാണ് എന്‍ഫോഴ്‌സ്മെന്റ് ഡയറക്‌ടറേറ്റ് തന്നെ അറസ്‌റ്റ് ചെയ‌്തതെന്ന് എം. ശിവശങ്കര്‍ ആരോപിച്ചു. രാഷ്ട്രീയ ലക്ഷ്യങ്ങളുടെ ഇരയാണ് താനെന്നും, കുറ്റകൃത്യങ്ങളുമായി യാതൊരു ബന്ധവുമില്ലെന്നും ശിവശങ്കര്‍ കോടതിയെ അറിയിച്ചു. എറണാകുളം പ്രിന്‍സിപ്പല്‍ സെഷന്‍സ് കോടതിയില്‍ നല്‍കിയ വിശദീകരണ പത്രികയിലാണ് ശിവശങ്കര്‍ ഇക്കാര്യങ്ങള്‍ പറയുന്നത്.

എന്‍ഫോഴ്‌സ്മെന്റിന്റെ സമ്മര്‍ദ്ദങ്ങള്‍ വഴങ്ങാത്തതതാണ് അറസ്‌റ്റിന്റെ പ്രധാനകാരണം. സ്വപ്നയും തന്റെ ചാര്‍ട്ടേര്‍ഡ് അക്കൗണ്ടന്റായ വേണുഗോപാലും തമ്മിലുള്ള വാട്സാപ്പ് സന്ദേശത്തിന്റെ പൂര്‍ണ്ണരൂപവും ശിവശങ്കര്‍ രേഖമൂലം കോടതിയില്‍ സമര്‍പ്പിച്ചിട്ടുണ്ട്. ഈ വാട്സാപ്പ് സന്ദേശങ്ങള്‍ പരിശോധിക്കണം. താന്‍ ഒരു കസ്റ്റംസ് ഓഫീസറേയും സ്വര്‍ണക്കടത്തിന് വേണ്ടി വിളിച്ചിട്ടില്ലെന്നും അദ്ദേഹം വിശദീകരണത്തില്‍ പറയുന്നു. ശിവശങ്കറിന്റെ ജാമ്യഹര്‍ജിയില്‍ കോടതി നാളെ വിധി പറയാനിരിക്കെയാണ് വിശദീകരണം.