ഫെയ്സ്ബുക്കിലൂടെ ഗാര്ഹിക പീഡനം തുറന്നു പറഞ്ഞ യുവതിക്ക് സഹായവുമായി സംസ്ഥാന വനിതാ കമ്മിഷന്
കാക്കനാട് പ്രിയദര്ശിനി ഹാളില് നടന്ന വനിതാ കമ്മിഷന് മെഗാ അദാലത്തില് ഫെയ്സ്ബുക്കിലൂടെ ഗാര്ഹിക പീഡനം തുറന്നു പറഞ്ഞ യുവതിക്കു കൈത്താങ്ങുമായി സംസ്ഥാന വനിതാ കമ്മിഷന്. ഫെയ്സ്ബുക്കില് പരാതി ചര്ച്ചയായതോടെയാണ് കമ്മിഷനംഗങ്ങള് യുവതിയെ നേരില്ക്കണ്ട് വിശദാംശങ്ങള് ആരാഞ്ഞത്. ഇന്നലെ നടന്ന അദാലത്തില് കേസ് പരിഗണിച്ച കമ്മിഷന് പൊലീസിനോട് റിപ്പോര്ട്ട് ആവശ്യപ്പെട്ടു. യുവതിക്ക് സംരക്ഷണം നല്കാനും ഉത്തരവിട്ടു.
ചോറ്റാനിക്കരയില് ഒരു വ്യക്തി സ്ഥിരമായി സ്ത്രീകളെ ശല്യം ചെയ്യുന്നതായി 13 സ്ത്രീകളാണ് വനിതാ കമ്മിഷന് പരാതി നല്കിയത്. ഇയാള്ക്കെതിരെ അന്വേഷണം നടത്താനും കമ്മിഷന് പൊലീസിനു നിര്ദേശം നല്കി. പ്രദേശത്തെ പല പൊലീസ് സ്റ്റേഷനുകളിലും ഇയാള്ക്കെതിരെ ഇതേ പ്രശ്നത്തില് കേസുണ്ട്. ഇവിടങ്ങളില് നിന്നെല്ലാം റിപ്പോര്ട്ട് ലഭ്യമാക്കി നടപടിയെടുക്കാനാണ് കമ്മിഷന്റെ തീരുമാനം.
പ്രായമായ അമ്മയെ സ്വത്ത് കൈക്കലാക്കിയ ശേഷം ഒറ്റയ്ക്കാക്കിയ മകനെതിരെയുള്ള പരാതി ആര്ഡിഒ അന്വേഷിക്കും. ലഹരി വില്പന സംഘം നാട്ടില് ചിലരെ അപകീര്ത്തിപ്പെടുത്തുന്ന ലഘുലേഖകള് വിതരണം ചെയ്യുന്നുവെന്ന പരാതിയും അന്വേഷിക്കും.
ഇന്നലെ 55 കേസുകളാണ് പരിഗണിച്ചത്. വനിത കമ്മിഷന് അധ്യക്ഷ എം.സി.ജോസഫൈന്, അംഗങ്ങളായ എം.എസ്.താര, ഇ.എം.രാധ, ഷിജി ശിവജി, ഡോ.ഷാഹിദ കമാല്, ഡയറക്ടര് വി.യു.കുര്യാക്കോസ് തുടങ്ങിയവരാണ് പരാതികള് കേട്ടത്.
https://www.facebook.com/Malayalivartha
