പ്രതിഫലത്തുക ഒത്തുവരാത്തതിനെ തുടര്ന്ന് പിടിച്ച പാമ്പിനെ ഉപേക്ഷിച്ച് പാമ്പുപിടുത്തക്കാരന് സ്ഥലംവിട്ടു
ഇന്നലെ ഉച്ചയോടെ കൊല്ലം പ്രതിഭ ജംക്ഷന് കുന്നേല് മുക്കിനു സമീപത്തെ പുരയിടത്തില് 2 അണലികളെ കണ്ട നാട്ടുകാര് മുന് കൗണ്സിലര് എന്.മോഹനനെ വിവരം അറിയിച്ചു. സ്ഥലത്ത് എത്തിയ മുന് കൗണ്സിലര് വനംവകുപ്പ് ഉദ്യോഗസ്ഥരെ വിവരമറിയിച്ചു. അവിടെ നിന്നും ലഭിച്ച ഫോണ് നമ്പറിലൂടെ പാമ്പുപിടുത്തക്കാരനെ വിളിച്ചു വരുത്തി.
ഇയാള് എത്തി രണ്ടു പാമ്പുകളില് ഒരെണ്ണത്തിനെ പിടികൂടിയപ്പോഴേക്കും മറ്റേ പാമ്പ് രക്ഷപ്പെട്ടിരുന്നു. പാമ്പുപിടുത്തക്കാരനു വണ്ടിക്കൂലിയായി മുന് കൗണ്സിലര് 500 രൂപ നല്കി. എന്നാല്, ഈ തുക പോരാ, 1500 രൂപ വേണമെന്നായി പാമ്പ് പിടുത്തക്കാരന്. തര്ക്കം രൂക്ഷമായതോടെ പിടികൂടിയ പാമ്പിനെ തുറന്നു വിടുമെന്നായി ഇയാള്.
2 പാമ്പിനെയും പിടികൂടിയാല് 1000 രൂപ നല്കാമെന്നായി കൗണ്സിലറും നാട്ടുകാരും. പക്ഷേ അയാള് ഇതിനു വഴങ്ങിയില്ല. ഒടുവില് പിടികൂടിയ പാമ്പിനെ കുപ്പിയോടെ സ്ഥലത്ത് ഉപേക്ഷിച്ച് അയാള് സ്ഥലംവിട്ടു. ഇതോടെ കൗണ്സിലറും നാട്ടുകാരും വെട്ടിലായി. പാമ്പിനെ എന്തു ചെയ്യും?
ഒടുവില് സമീപത്തെ വീട്ടില്നിന്ന് ഒരു ചാക്ക് സംഘടിപ്പിച്ചു പാമ്പിനെ കുപ്പിയോടെ ഇതിനുള്ളിലാക്കി മുന് കൗണ്സിലറും സുഹൃത്തും കൂടി വനം വകുപ്പ് ഓഫിസില് എത്തിച്ചു. ഇതിനിടെ എന്ടിവി നഗറിലെ വീട്ടില് നിന്ന് ഒരു പാമ്പിനെയും കൂടി ഇന്നലെ ഉച്ചയോടെ പിടികൂടി.
https://www.facebook.com/Malayalivartha
