പാലാരിവട്ടം പാലം അഴിമതിക്കേസില്‍ നടപടി നേരിടുന്ന മുന്‍മന്ത്രി വി.കെ ഇബ്രാഹിംകുഞ്ഞിനെ വീണ്ടും ചോദ്യം ചെയ്യാന്‍ വിജിലന്‍സിന് അനുമതി. അറസ്റ്റ്​ ചെയ്​ത ശേഷവും ഇബ്രാഹിം കുഞ്ഞ്​ ചികിത്സയില്‍ കഴിയുന്ന കൊച്ചിയിലെ ആശുപത്രിയിലെത്തി ഡിസംബര്‍ 28ന് ചോദ്യം ചെയ്യാനാണ് മൂവാറ്റുപുഴ വിജിലന്‍സ് കോടതി ഉപാധികളോടെ അനുമതി നല്‍കിയത്.

അടുത്ത തിങ്കളാഴ്ച രാവിലെ 9 മുതല്‍ ഉച്ചയ്ക്ക് 12 വരെയും ഉച്ചകഴിഞ്ഞ് മൂന്ന് മണി മുതല്‍ വൈകീട്ട് അഞ്ച് മണി വരെയും ചോദ്യം ചെയ്യാം. ഓരോ മണിക്കൂറിനിടയിലും 15 മിനിറ്റ് വിശ്രമം അനുവദിക്കണം. കോവിഡ് മാനദണ്ഡം അനുസരിച്ചായിരിക്കണം ചോദ്യം ചെയ്യലെന്നും കോടതി നിര്‍ദ്ദേശിച്ചു.

ഇബ്രാഹിം കുഞ്ഞിനെ അറസ്​റ്റ്​ ചെയ്​തെങ്കിലും വിജിലന്‍സ്​ കസ്റ്റ്​ഡി കോടതി അനുവദിച്ചിരുന്നില്ല. ആരോഗ്യസ്​ഥിതി മോശമായ ഇബ്രാഹിം കുഞ്ഞ്​ കൊച്ചിയിലെ സ്വകാര്യ ആശുപത്രിയില്‍ ചികിത്സയില്‍ കഴിയുകയാണ്​. കസ്റ്റഡിയില്‍ വിടുന്നത്​ അദ്ദേഹത്തിന്‍റെ ആരോഗ്യ സ്​ഥിതി ഗുരുതരമാക്കുമെന്ന മെഡിക്കല്‍ റിപ്പോര്‍ട്ടിന്‍റെ അടിസ്​ഥാനത്തിലാണ്​ കസ്റ്റഡി അപേക്ഷ കോടതി നിരസിച്ചിരുന്നത്​. ഇബ്രാഹിം കുഞ്ഞിന്‍റെ ജാമ്യാപേക്ഷയും കോടതി അനുവദിച്ചിരുന്നില്ല.

നേരത്തെയും ആശുപത്രിയിലെത്തി ചോദ്യം ചെയ്യാന്‍ കോടതി വിജിലന്‍സിനെ അനുവദിച്ചിരുന്നു. അന്നും ഉപാധികളോടെയാണ്​ അനുവാദം നല്‍കിയിരുന്നത്​.