പറവൂര്‍ പുത്തന്‍വേലിക്കര മോളി വധത്തില്‍ പ്രതിയായ അസാം സ്വദേശി പരിമള്‍ സാഹുവിന് (24, മുന്ന) വധശിക്ഷ. ഒരു ലക്ഷം രൂപ പിഴയുമടയ്ക്കണം.

പറവൂര്‍ പുത്തന്‍വേലിക്കര പാലാട്ടി വീട്ടില്‍ പരേതനായ ഡേവിസിന്റെ ഭാര്യ മോളിയെ (61) ലൈംഗികമായി പീഡിപ്പിച്ച് കൊലപ്പെടുത്തിയ കുറ്റത്തിനാണ് പറവൂര്‍ അഡി. ജില്ലാ സെഷന്‍സ് കോടതി വധശിക്ഷ വിധിച്ചത്. ഇതുകൂടാതെ കൊലക്കുറ്റത്തിന് ജീവപര്യന്തം തടവും ഒരു ലക്ഷം രൂപ പിഴയും, തെളിവു നശിപ്പിക്കലിന് മൂന്നു വര്‍ഷം തടവും, 10,000 രൂപ പിഴയും, വീട്ടില്‍ അതിക്രമിച്ചു കയറിയതിന് 10,000 രൂപ പിഴയും ശിക്ഷ വിധിച്ചിട്ടുണ്ട്.

പിഴത്തുക മോളിയുടെ ഭിന്നശേഷിക്കാരനായ മകന്‍ ഡെന്നിയുടെ രക്ഷിതാവിന് നല്‍കണമെന്നും അഡി. ജില്ലാ സെഷന്‍സ് കോടതി ജഡ്ജി മുരളീ ഗോപാല പണ്ഡാല വിധിച്ചു.

2018 മാര്‍ച്ച് 18 നായിരുന്നു സംഭവം നടന്നത്. കോഴിക്കടയിലെ ഡ്രൈവറായിരുന്ന പരിമള്‍ സാഹു മോളിയുടെ വീടിന്റെ ഔട്ട് ഹൗസിലെ വാടകക്കാരനായിരുന്നു. ഭര്‍ത്താവ് മരിച്ചതോടെ അപ്പുവെന്നു വിളിക്കുന്ന മകന്‍ ഡെന്നിക്കൊപ്പം (32) പഞ്ചായത്ത് ഓഫീസിന് സമീപത്തെ വീട്ടിലായിരുന്നു താമസം.

രാവിലെ ഡെന്നിയാണ് അയല്‍പക്കത്തെ വീട്ടിലെത്തി അമ്മയെ ആശുപത്രിയില്‍ കൊണ്ടുപോകണമെന്നു പറഞ്ഞത്. അയല്‍വാസികളെത്തിയപ്പോഴാണ് മൃതദേഹം കണ്ടത്. ഡെന്നി പലതവണ മുന്നയുടെ പേരു പറഞ്ഞതിനെത്തുടര്‍ന്ന് പൊലീസ് ഇയാളെ ചോദ്യം ചെയ്തു. തുടര്‍ന്നാണ് സംഭവത്തിന്റെ ചുരുളഴിഞ്ഞത്.

ഡെന്നിയെ പ്രതിയാക്കാന്‍ നോക്കിപുലര്‍ച്ചെ വീടിനു മുന്നിലെ ലൈറ്റ് അഴിച്ച ശേഷം മുന്ന കോളിംഗ് ബെല്‍ അടിച്ചു. വാതില്‍ തുറന്ന മോളിയെ പീഡിപ്പിക്കാന്‍ ശ്രമിച്ചു. എതിര്‍ത്തതോടെ തലയ്ക്കടിച്ചു വീഴ്ത്തി.

തുടര്‍ന്ന് ബെഡ് റൂമിലേക്ക് വലിച്ചിഴച്ചുകൊണ്ടുപോയി പീഡിപ്പിച്ചു. പിന്നീട് കഴുത്തില്‍ കുരുക്കിട്ട് ശ്വാസം മുട്ടുച്ചു കൊന്നു.ഡെന്നിയുടെ മുന്നില്‍ വച്ചാണ് മോളിയെ ആക്രമിച്ചത്. കൊലപ്പെടുത്തിയത് ഡെന്നിയാണെന്ന് വരുത്താന്‍ മോളിയുടെ രക്തം ഡെന്നിയുടെ ടീ ഷര്‍ട്ടില്‍ പുരട്ടിയെന്നും പൊലീസ് കണ്ടെത്തിയിരുന്നു