സംസ്ഥാനത്ത് കടല്ക്ഷോഭം അതിരൂക്ഷം... വലിയതുറ കടല്പാലത്തിന്റെ ഒരു ഭാഗം വിള്ളലുണ്ടായതിനെ തുടര്ന്നു താഴ്ന്നു, അപകട സാധ്യത ഉള്ളതിനാല് ഗേറ്റ് പൂട്ടി, തീരമേഖലകളിലെ പ്രദേശങ്ങളിലെ വീടുകളില് വെള്ളം കയറി
വിള്ളലുണ്ടായതിനെത്തുടര്ന്ന് വലിയതുറ കടല്പാലത്തിന്റെ ഒരു ഭാഗം താഴ്ന്നു. കടല്പാലം ഇപ്പോള് ചെരിഞ്ഞ നിലയിലാണ്.
അപകട സാധ്യത ഉള്ളതിനാല് ഗേറ്റ് പൂട്ടിയിരിക്കുകയാണ്. പൊലീസ് കാവലും ഏര്പ്പെടുത്തിയിട്ടുണ്ട്.
സംസ്ഥാനത്ത് കടല്ക്ഷോഭം അതിരൂക്ഷമാണ്. തൃശ്ശൂരില് രാത്രി ശക്തമായ കാറ്റും മഴയും ഉണ്ടായതിന് പിന്നാലെ, തീരമേഖലകളായ എറിയാട്, ചാവക്കാട്, കൈപ്പമംഗലം എന്നിവിടങ്ങളില് കടല് ആക്രമണം ഉണ്ടായി. നൂറില് അധികം വീടുകളില് വെള്ളം കയറി.
ചാവക്കാട്, കൊടുങ്ങല്ലൂര് മേഖലയില് കടല്ക്ഷോഭം രൂക്ഷമാണ്. ഇതുവരെ 105 പേരെ ക്യാമ്പുകളിലേക്ക് മാറ്റി പാര്പ്പിച്ചു. കാസര്കോട് മുസോടി കടപ്പുറത്തെ നാല് വീടുകള് ഭാഗികമായി തകര്ന്നു.
കടല്ക്ഷോഭം രൂക്ഷമായ എറണാകുളം ചെല്ലാനത്ത് പതിനഞ്ചോളം പേരെ ക്യാമ്പുകളിലേക്ക് മാറ്റി പാര്പ്പിച്ചു. രോഗികളെയും ഗര്ഭിണികളെയും ഇന്നലെ പൊലീസിന്റെ നേതൃത്വത്തില് സുരക്ഷിത ഇടങ്ങളിലേക്ക് മാറ്റിയിരുന്നു.
അഞ്ചടി പൊക്കത്തില് വെള്ളം ഉയര്ന്നിട്ടും ഭൂരിഭാഗം ആളുകളും ക്യാമ്പിലേക്ക് മാറാന് തയ്യാറല്ല. ഈ സാഹചര്യത്തില് 28 പേരടങ്ങുന്ന എന്ഡിആര്എഫ് സംഘം ചെല്ലാനത്ത് ക്യാമ്പ് ചെയ്തിട്ടുണ്ട്. മേഖലയില് നിന്ന് ആളുകളെ ഒഴിപ്പിക്കാനായി അഞ്ച് ടോറസ് ലോറികളും സജ്ജമാക്കിയിട്ടുണ്ട്.
നിലവില് ക്യാംപുകളിലേക്ക് മാറ്റുന്നവരെയെല്ലാം കൊവിഡ് പരിശോധനയ്ക്ക് വിധേയരാക്കുന്നുണ്ട്. ഇതില് പോസിറ്റീവ് ആയവരെ കടവന്ത്രയിലെ എഫ്എല്ടിസിയിലേക്ക് മാറ്റും.
https://www.facebook.com/Malayalivartha