കോട്ടയം: വീട്ടുസാധനങ്ങൾ വാങ്ങാൻ വള്ളത്തിൽ കായലിലൂടെ സഞ്ചരിക്കുന്നതിനിടെ വള്ളം മുങ്ങി യുവാവിനെ കാണാതായി. നീണ്ടിശ്ശേരിൽ രാജന്റെ മകൻ രതീഷി് (36)നെയാണ് വള്ളത്തിൽ നിന്നും കായലിലേക്ക് വീണത്.

തിങ്കളാഴ്ച ഉച്ചകഴിഞ്ഞു 3മണിയോടെ ആയിരുന്നു സംഭവം. പഴുക്കാനില കായലിൽ ആറായിരം ചിറ ഭാഗത്തുനിന്നും വീട്ടു സാധനങ്ങൾ വാങ്ങാനായി കരിമ്പുംകാല ഭാഗത്തേക്ക് വള്ളത്തിൽ വന്ന രതീഷ് അപകടത്തിൽ പെടുകയായിരുന്നു.

നാട്ടുകാർ വിവരമറിയിച്ചതിനെ തുടർന്ന് കോട്ടയത്ത് നിന്നുള്ള ഫയർഫോഴ്‌സും, ചിങ്ങവനം പൊലീസും രതീഷിനായി തെരച്ചിൽ തുടരുകയാണ്. വള്ളം മറിഞ്ഞത് അടിയൊഴുക്ക് കൂടുതൽ ഉള്ള ഭാഗത്താണെന്നാണ് നാട്ടുകാർ പറഞ്ഞു. രണ്ട് ദിവസമായി പെയ്യുന്ന മഴയെ തുടർന്ന് കായലിൽ വെള്ളവും കൂടുതലാണ്.

കെ.പി.സി.സി സെക്രട്ടറി നാട്ടകം സുരേഷ്, നഗരസഭ അംഗം ടിനോ കെ.തോമസ് എന്നിവർ സ്ഥലത്ത് എത്തിയിട്ടുണ്ട്. വള്ളം മുങ്ങിയ സ്ഥലത്ത് അഗ്നിരക്ഷാ സേന എത്തി റബർ ഡിങ്കിയിൽ തിരച്ചിൽ നടത്തുന്നുണ്ട്.