ഇന്ധനവില വര്‍ധനവിനെ എതിര്‍ക്കുന്ന രാഹുല്‍ ​ഗാന്ധി എന്ത് കൊണ്ട് കോണ്‍​ഗ്രസ് ഭരിക്കുന്ന സംസ്ഥാനങ്ങളില്‍ ഇന്ധനവില കുറക്കാന്‍ ആവശ്യപ്പെടുന്നില്ലെന്ന് കേന്ദ്ര പെട്രോളിയം മന്ത്രി ധര്‍മേന്ദ്ര പ്രധാന്‍.

രാഹുല്‍ ​ഗാന്ധിക്ക് ഇന്ധനവിലയില്‍ ആശങ്കയുണ്ടെങ്കില്‍ കോണ്‍​ഗ്രസ് ഭരിക്കുന്ന രാജസ്ഥാന്‍, പഞ്ചാബ്, മഹാരാഷ്ട്ര എന്നീ സംസ്ഥാനങ്ങളില്‍ ഇന്ധനവില കുറക്കാന്‍ ആവശ്യപ്പെടണം. ഇന്ധനവില കുതിച്ചുയര്‍ന്നു എന്നത് ശരിതന്നെയാണ്. എന്നാല്‍ ഒരു വര്‍ഷം 35000 കോടി രൂപയാണ് വാക്സിനേഷന് വേണ്ടി സര്‍ക്കാര്‍ ചെലവഴിക്കുന്നത്. ഇന്ധന നികുതി വരുമാനത്തിലൂടെ ക്ഷേമപ​ദ്ധതികള്‍ക്ക് വേണ്ട പണം കണ്ടെത്തുകയണെന്നും അദ്ദേഹം പറഞ്ഞു.

രാജ്യത്ത്​ ഇന്ന് പെട്രോള്‍, ഡീസല്‍ വില വര്‍ധിപ്പിച്ചില്ലെങ്കിലും പെട്രോളിന്​ ഡല്‍ഹിയില്‍ ലിറ്ററിന്​ 96.12 രൂപയും ഡീസലിന്​ 86.98 രൂപയുമാണ് വില​. മുംബൈയില്‍ 102.30 രൂപയാണ്​ പെട്രോള്‍ വില. ഡീസലിന്​ 94.39 രൂപയുമാണ്. രാജ്യത്തെ പ്രധാന നഗരങ്ങളിലെല്ലാം പെട്രോള്‍ വില നൂറുകടന്നിരുന്നു. മുംബൈയില്‍ മേയ്​ 29നാണ്​ ​പെട്രോള്‍ വില നൂറുതൊട്ടത്​.

2014 ല്‍ മോദി സര്‍ക്കാര്‍ അധികാരമേറ്റ കാലത്ത് പെട്രോള്‍ ലിറ്ററിന് എക്സൈസ് നികുതി 9.48 രൂപയും ഡീസല്‍ ലിറ്ററിന് 3.56 രൂപയായിരുന്നു. എന്നാല്‍ ഇന്ന് പെട്രോളിന് 32.90 രൂപയും 31.80 രൂപയാണ്. കരളമടക്കമുള്ള സംസ്ഥാനങ്ങളിലെ നിയമസഭാ തെരഞ്ഞെടുപ്പ് വേളയില്‍ ഇന്ധനവില കൂടിയിരുന്നില്ല.