കൊവിഡ് വ്യാപനതോതില്‍ കുതിപ്പ്.... ടിപിആര്‍ 19.03%.... രണ്ട് മാസത്തിനുശേഷം രോഗികള്‍ മുപ്പതിനായിരവും മരണം 200ഓളവും കടന്നു, പരിശോധന കൂട്ടാന്‍ ഊര്‍ജിത പദ്ധതി.

സാമൂഹിക അകലം പാലിക്കാതെ ഓണം ആഘോഷിച്ചപ്പോള്‍ കൊവിഡ് കൈവിട്ട് കുതിച്ചു. ഇന്നലെ 31,445 പേര്‍ക്ക് രോഗം സ്ഥിരീകരിച്ചു. 215 മരണവും. മേയ് 20ന് ശേഷം ആദ്യമാണ് പ്രതിദിന രോഗികള്‍ മുപ്പതിനായിരം കടക്കുന്നത്.

ടെസ്റ്റ് പോസിറ്റിവിറ്റി നിരക്ക് 19.03%.1,65,273 സാമ്പിളുകള്‍ പരിശോധിച്ചപ്പോഴാണ് ഇത്രയും രോഗികള്‍. ആകെ മരണം 19,972 ആയി. പരിശോധന കൂട്ടുന്നതിനാല്‍ വരും ദിവസങ്ങളില്‍ രോഗബാധിതരുടെ എണ്ണം കൂടാം.

എറണാകുളം ജില്ലയിലാണ് ഏറ്റവും കൂടുതല്‍ 4048. തൃശൂര്‍ 3865, കോഴിക്കോട് 3680, മലപ്പുറം 3502, പാലക്കാട് 2562, കൊല്ലം 2479, കോട്ടയം 2050, കണ്ണൂര്‍ 1930, ആലപ്പുഴ 1874, തിരുവനന്തപുരം 1700, ഇടുക്കി 1166, പത്തനംതിട്ട 1008, വയനാട് 962, കാസര്‍കോട് 619.

29,608 പേര്‍ക്ക് സമ്പര്‍ക്കത്തിലൂടെയാണ് രോഗം ബാധിച്ചത്. 74 തദ്ദേശസ്വയംഭരണ പ്രദേശങ്ങളിലായി 414 വാര്‍ഡുകള്‍ ഡബ്ല്യു.ഐ.പി.ആര്‍ എട്ടിന് മുകളിലായതിനാല്‍ ഇവിടെ കര്‍ശന നിയന്ത്രണമുണ്ടാകും.മേയ് 12നാണ് സംസ്ഥാനത്ത് ഏറ്റവും കൂടുതല്‍ പേര്‍ക്ക് രോഗം ബാധിച്ചത്, 43,529. ജൂലായ് 28ന് രോഗബാധിതരുടെ എണ്ണം 8063 ലേക്ക് താഴ്ന്നിരുന്നു.

പിന്നെ ക്രമേണ കൂടി. 2020 ജനുവരി ഒന്നിന് ഒരാളില്‍ തുടങ്ങിയ രോഗം ഇതുവരെ 38,83,429 പേര്‍ക്കാണ് ബാധിച്ചത്.

കേരളത്തില്‍ നിന്നുള്ളവര്‍ക്ക് കര്‍ണാടകയും തമിഴ്നാടും പരിശോധന കടുപ്പിക്കുകയാണ്. രണ്ട് ഡോസ് വാക്സിനെടുത്തവര്‍ക്കും കര്‍ണാടകയിലെത്താന്‍ ആര്‍.ടി.പി.സി.ആര്‍ നെഗറ്റീവ് സര്‍ട്ടിഫിക്കറ്റ് വേണം.

കേരള അതിര്‍ത്തികളില്‍ ഇരുസംസ്ഥാനങ്ങളും കൂടുതല്‍ പൊലീസിനെ വിന്യസിച്ചു. രണ്ട് ഡോസ് വാക്സിനെടുത്ത് 14 ദിവസം പിന്നിട്ടവര്‍ക്ക് തമിഴ്നാട്ടില്‍ ഇളവുണ്ടെങ്കിലും കേരളത്തില്‍ നിന്നെത്തുവരുടെ സാമ്പിള്‍ ശേഖരിക്കാന്‍ പ്രത്യേക സജ്ജീകരണം ഒരുക്കികഴിഞ്ഞു.

അതേസമയം  സംസ്ഥാനത്ത് കോവിഡ് കേസുകള്‍ ഉയര്‍ന്നതോടെ പരമാവധി പേരെ പരിശോധിക്കാനായി ആരോഗ്യ വകുപ്പ് ഊര്‍ജിത പദ്ധതി ആവിഷ്‌ക്കരിച്ചതായി ആരോഗ്യ വകുപ്പ് മന്ത്രി വീണാ ജോര്‍ജ്. കോവിഡ് പോസിറ്റീവായവരെ എത്രയും വേഗം കണ്ടെത്തി രോഗ വ്യാപനം കുറയ്ക്കുന്നതിനാണ് ഊര്‍ജിത പരിശോധന നടത്തുന്നത്. വാക്‌സിനേഷന്‍ കുറഞ്ഞ ജില്ലകളില്‍ ടെസ്റ്റിംഗ് കൂടുതല്‍ വ്യാപകമാക്കും. രോഗവ്യാപനം കണ്ടെത്തുന്ന സ്ഥലങ്ങളും ക്ലസ്റ്ററുകള്‍ കേന്ദ്രീകരിച്ചും പരമാവധി പേരെ പരിശോധിക്കുന്നതാണ്. ആരോഗ്യ പ്രവര്‍ത്തകര്‍, കോവിഡ് മുന്നണി പോരാളികള്‍, കച്ചവടക്കാര്‍, വിവിധ ഹോമുകള്‍ എന്നിവ കേന്ദ്രീകരിച്ച് പരിശോധനകള്‍ നടത്തും. പരിശോധനയ്ക്കായി അവരവര്‍ തന്നെ മുന്‍കയ്യെടുക്കേണ്ടതാണ്. തുടക്കത്തിലേ രോഗം കണ്ടെത്തിയാല്‍ തങ്ങളേയും കുടുംബത്തേയും ഒരുപോലെ രക്ഷിക്കാനാകും. എല്ലാ സര്‍ക്കാര്‍ ആശുപത്രികളിലും സൗജന്യ കോവിഡ് പരിശോധന നടത്താനുള്ള സൗകര്യമുണ്ടെന്നും മന്ത്രി വ്യക്തമാക്കി.