കോട്ടയം, ഇടുക്കി ജില്ലകളില്‍ കനത്ത മഴ തുടരുന്നു. കോട്ടയത്ത് കിഴക്കന്‍ മേഖലകളിലും, ഇടുക്കിയില്‍ ചിലയിടങ്ങളിലുമാണ് മഴ തുടരുന്നത്. വീണ്ടും മഴ ശക്തമാകുന്ന സാഹചര്യത്തില്‍ ജനങ്ങള്‍ സുരക്ഷിത സ്ഥാനങ്ങളിലാണോ എന്നത് ഉറപ്പുവരുത്താനുള്ള ക്രമീകരണങ്ങള്‍ ജില്ലാ ഭരണകൂടം ആരംഭിച്ചു. കനത്ത മഴയുടെ പ്രഭാവത്താല്‍ മണിമലയാറ്റില്‍ നീരൊഴുക്ക് ക്രമാതീതമായി ഉയര്‍ന്നിട്ടുണ്ട്. കോട്ടയത്ത് കൂട്ടിക്കല്‍, മുണ്ടക്കയം, എരുമേലി, ഈരാറ്റുപേട്ട എന്നീ സ്ഥലങ്ങളിലാണ് മഴ തുടരുന്നത്. ഈ മേഖലകളില്‍ മണ്ണിടിച്ചില്‍ ഭീഷണിയും നിലനില്‍ക്കുകയാണ്. കോട്ടയം ജില്ലയിലെ 33 കേന്ദ്രങ്ങള്‍ അപകടാവസ്ഥയിലാണ്. തിങ്കളാഴ്ച മുതല്‍ എല്ലാ ജില്ലകളിലും ശക്തമായ മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചിട്ടുണ്ട്. തമിഴ്‌നാട് തീരത്ത് രൂപം കൊണ്ട ചക്രവാത ചുഴി ഇപ്പോഴും തുടരുകയാണ്. മലയോര പ്രദേശങ്ങളില്‍ കഴിയുന്നവര്‍ അതീവ ജാഗ്രത പുലര്‍ത്തണമെന്നും ജില്ലാ ഭരണകൂടം മുന്നറിയിപ്പ് നല്‍കി.