കേന്ദ്ര സര്‍ക്കാര്‍ ദീപാവലിത്തലേന്ന് പെട്രോളിനും ഡീസലിനും വില കുറച്ചു കൊണ്ട് എക്‌സൈസ് നികുതി വെട്ടിക്കുറച്ചത് വലിയ ആശ്വാസത്തോടെയാണ് എല്ലാവരും കാണുന്നത്. വിലക്കുറവ് പ്രാബല്യത്തില്‍ വരികയും ചെയ്തു. ചില സംസ്ഥാനങ്ങളിലെ ഉപതിരഞ്ഞെടുപ്പ് ഫലം കയ്പുനീരായതിന് പിന്നാലെ ജനങ്ങളെ കയ്യിലെടുക്കാനാണ് വില കുറച്ചത്.

എന്നാല്‍ ജോജു ജോര്‍ജിന് രണ്ടടി കൊടുത്തത് നരേന്ദ്ര മോദി അറിഞ്ഞതിനാലാണ് വില കുറച്ചതെന്നാണ് കേരളത്തിലെ കോണ്‍ഗ്രസ് നേതാക്കള്‍ പറയുന്നത്. പെട്രോളിന് അഞ്ച് രൂപയും ഡീസലിന് പത്ത് രൂപയും എക്‌സൈസ് നികുതി കുറച്ചതിന് പിന്നാലെ കുറച്ചതിലുള്ള പിതൃത്വം ഏറ്റെടുത്തു കൊണ്ട് ബിന്ദുകൃഷ്ണ, രമേശ് ചെന്നിത്തല, കെ സുധാകരന്‍, വിഡി സതീശന്‍ തുടങ്ങി വമ്പന്‍മാര്‍ മുതല്‍ ലോക്കല്‍ കോഗ്രസുകാര്‍ വരെ രംഗത്തെത്തി.

ഡീസല്‍ വിലയിലെ 10 രൂപ കുറവ് ജോജു ജോര്‍ജ്ജിനും ലഭിക്കുമെന്നാണ് ബിന്ദു കൃഷ്ണ പറയുന്നത്. അത് ജോജുവിന്റെയും അവകാശമാണ്. ആ അവകാശം നേടിയെടുക്കാനാണ് കോണ്‍ഗ്രസ് പാര്‍ട്ടി സമരം ചെയ്തത്. ഡീസല്‍ അടിച്ചിട്ട് പണം എണ്ണിക്കൊടുക്കുമ്പോഴെങ്കിലും ആ തിരിച്ചറിവ് ഉണ്ടാകും എന്ന് ഉറച്ച് വിശ്വസിക്കുന്നു. കിറ്റ് വാങ്ങി നക്കിക്കോ എന്ന് സഖാക്കന്മാര്‍ പറഞ്ഞതു പോലെ ഒരു കോണ്‍ഗ്രസുകാരനും പറയില്ല.

കോണ്‍ഗ്രസ് ഇവിടെക്കിടന്ന് സമരം ചെയ്താല്‍ ഇന്ധന വില കുറയുമോ എന്ന് ചോദിച്ചവര്‍ക്കുള്ള മറുപടി. കണ്ടിപ്പാ കുറയും... പെട്രോള്‍ വില 5 രൂപയും ഡീസല്‍ വില 10 രൂപയും ഇന്ന് അര്‍ദ്ധരാത്രി മുതല്‍ കുറയും. രാജ്യവ്യാപകമായി സമരം ചെയ്ത കോണ്‍ഗ്രസ് പാര്‍ട്ടിയുടെ സമര വിജയം... എന്നാണ് ബിന്ദു കൃഷ്ണ പറഞ്ഞ് നിര്‍ത്തുന്നത്.

ബിന്ദു കൃഷ്ണ രണ്ട് പോസ്റ്റിട്ടപ്പോള്‍ രമേശ് ചെന്നിത്തല ഒരു പോസ്റ്റെങ്കിലുമിടണ്ടേ. ശ്രീമതി സോണിയാ ഗാന്ധിയുടെയും, ശ്രീ രാഹുല്‍ ഗാന്ധിയുടെയും നേതൃത്വത്തില്‍ കോണ്‍ഗ്രസ് പാര്‍ട്ടി രാജ്യ വ്യാപകമായി നടത്തിയ തുടര്‍ സമരങ്ങളുടെ ഫലമായി കേന്ദ്ര സര്‍ക്കാര്‍ പെട്രോള്‍, ഡീസല്‍ എന്നിവയുടെ വില കുറയ്ക്കുവാന്‍ തീരുമാനിച്ചിരിക്കുന്നു. ഇത് പ്രതിഷേധിച്ച ജനങ്ങളുടെ വിജയമാണ്.

ഇനി സംസ്ഥാന സര്‍ക്കാരിന്റെ ഊഴമാണ്. പെട്രോള്‍ , ഡീസല്‍ വില ഇനിയും നമുക്ക് കുറച്ചു ജനങ്ങളുടെ ഭാരം കുറയ്ക്കുവാന്‍ കഴിയും. സംസ്ഥാന സര്‍ക്കാരും നികുതി വെട്ടിക്കുറച്ച് ജനങ്ങളെ സഹായിക്കണം. കോണ്‍ഗ്രസ് പാര്‍ട്ടി നിയമസഭയ്ക്കകത്തും പുറത്തും ഏറെക്കാലമായി സര്‍ക്കാരിനോട് ഇക്കാര്യം അഭ്യര്‍ത്ഥിക്കുകയാണെന്നും ചെന്നിത്തല പറഞ്ഞു.

സാക്ഷാല്‍ കെ സുധാകരന്‍ പറയുന്നത് രാജ്യവ്യാപകമായി കോണ്‍ഗ്രസ് നടത്തിയ ചെറു സമരങ്ങള്‍ ഫലം കണ്ടു എന്നാണ്. ഇന്ധനവിലയില്‍ ജനത്തിന് താല്‍ക്കാലിക ആശ്വാസം. കോണ്‍ഗ്രസിന്റെ സമരത്തെ തകര്‍ക്കാന്‍ ശ്രമിച്ചവര്‍ക്കും നാളെ മുതല്‍ കുറഞ്ഞ വിലയില്‍ ഇന്ധനം ലഭ്യമാകും. ഇന്ധന വില ഇനിയും കുറയേണ്ടതുണ്ട്. അവകാശ സമരങ്ങളെ അടിച്ചമര്‍ത്താന്‍ ഏത് തമ്പുരാന്‍ വന്നാലും അതിന് വഴങ്ങി കൊടുക്കാന്‍ കോണ്‍ഗ്രസിന് സൗകര്യമില്ല. കരുത്തുറ്റ പ്രതിഷേധങ്ങളുമായി കോണ്‍ഗ്രസ് ജനങ്ങള്‍ക്കൊപ്പം തെരുവിലുണ്ടാകും എന്ന ഭീഷണിയും സുധാകരന്റെ വകയുണ്ട്.

വിഡി സതീശന്‍ കുറച്ച് പക്വമായിട്ടാണ് പറയുന്നത്. ഉപതിരഞ്ഞെടുപ്പുകളില്‍ ഉണ്ടായ തിരിച്ചടിയും ഉയര്‍ന്ന് വരുന്ന ജനകീയ പ്രക്ഷോഭങ്ങളുടെ സമ്മര്‍ദ്ദവും ആണ് സര്‍ക്കാരിനെ ഇപ്പോള്‍ ഈ നടപടിക്ക് പ്രേരിപ്പിച്ചിരിക്കുന്നതെന്നാണ് സതീശന്‍ പറയുന്നത്.



ഇതൊക്കെ കണ്ടാല്‍ എങ്ങനെ ചിരിക്കാതിരിക്കും. ഇവിടെ ജോജുവിനെ വളഞ്ഞിട്ട് തല്ലി, ജനങ്ങളുടെ യാത്ര തടസപ്പെടുത്തിയത് കൊണ്ടാണ് പെട്രോള്‍ വില കുറഞ്ഞതത്രെ. സാക്ഷാല്‍ മോദി പോലും ഞെട്ടിക്കാണും. ജോജു പറഞ്ഞതു പോലെ കോണ്‍ഗ്രസുകാരോട് ജനങ്ങള്‍ക്കും ഒന്നേ പറയാനുള്ളൂ. ഞങ്ങളാണോ പെട്രോള്‍ വില കൂട്ടിയത്. കൂട്ടിയവരുടെ വഴി തടഞ്ഞ് സമരം ചെയ്യൂ. നല്ല കഥ എന്നാല്‍ വിവരമറിയും.