ദുരൂഹ സാഹചര്യത്തില്‍ വാഹനാപകടത്തില്‍ കൊല്ലപ്പെട്ട മിസ് കേരള മത്സര ജേതാക്കളായ മോഡലുകളെ സംബന്ധിച്ച കൂടുതല്‍ വാര്‍ത്തകള്‍ പുറത്ത്. അപകടത്തിനു മുന്‍പുള്ള ദിവസങ്ങളിലും അജ്ഞാത വാഹനം പിന്തുടര്‍ന്നതായി ക്രൈംബ്രാഞ്ചിനു വിവരം ലഭിച്ചു. ഫോര്‍ട്ട്‌കൊച്ചിയിലെ നമ്പര്‍ 18 ഹോട്ടലിനു മുന്‍പില്‍ ഇതേ വാഹനം കണ്ടു ഭയന്നാണു പാര്‍ട്ടി പൂര്‍ത്തിയാകും മുന്‍പു സുഹൃത്തുക്കള്‍ക്കൊപ്പം മോഡലുകള്‍ ഹോട്ടല്‍ വിട്ടുപോയതെന്നും അന്വേഷണ സംഘത്തിനു സൂചന ലഭിച്ചു.

അന്ന് ഇവരെ പിന്‍തുടര്‍ന്ന സൈജു തങ്കച്ചന്റെ വാഹനം തന്നെയാണോ മുന്‍പുള്ള ദിവസങ്ങളിലും മോഡലുകളെ പിന്തുടര്‍ന്നതെന്നു ഉറപ്പാക്കാനാണ് അന്വേഷണ സംഘത്തിന്റെ ശ്രമം. തൃശൂര്‍ കൊടകരയ്ക്കു സമീപം അഞ്ജനയുടെ കാറിനെ അജ്ഞാതവാഹനം പിന്തുടര്‍ന്നതു ശ്രദ്ധയില്‍പെട്ടതായി തൃശൂരിലെ തദ്ദേശ സ്ഥാപന ജനപ്രതിനിധി പൊലീസിനു മൊഴി നല്‍കിയിട്ടുണ്ട്.

കൊല്ലപ്പെട്ട തൃശൂര്‍ സ്വദേശി അഞ്ജന ഷാജന്റെ ബന്ധുക്കള്‍ ഇക്കാര്യങ്ങള്‍ വിശദീകരിച്ചു ക്രൈംബ്രാഞ്ചിനു പരാതി നല്‍കിയിട്ടുണ്ട്. അഞ്ജനയെ പിന്തുടര്‍ന്ന വാഹനത്തിന്റെ ദൃശ്യങ്ങളും ക്രൈംബ്രാഞ്ച് ശേഖരിച്ചിട്ടുണ്ട്. മിസ് കേരള പട്ടം നേടിയ അന്‍സി കബീറിനെ കൊല്ലപ്പെടുന്നതിന് ഒരാഴ്ച മുന്‍പ് ഇതേ വാഹനം പിന്‍തുടര്‍ന്നതായി വിവരം ലഭിച്ചിട്ടുണ്ട്.

പാര്‍ട്ടി നടന്ന ഒക്ടോബര്‍ 31 നു രാത്രിയില്‍ ഇതേ വാഹനം നമ്പര്‍ 18 ഹോട്ടലില്‍ എത്തിയതിനു തെളിവാകുന്ന നിരീക്ഷണ ക്യാമറ ദൃശ്യങ്ങളടക്കമാണു ഹോട്ടലുടമയും ജീവനക്കാരും ചേര്‍ന്നു നശിപ്പിച്ചത്.

അന്‍സിയും അഞ്ജനയും ഉപയോഗിച്ചിരുന്ന ഫോണ്‍നമ്പറുകളിലേക്കു 2 മാസത്തിനിടയില്‍ വിളിച്ച മുഴുവന്‍ നമ്പറുകളും പൊലീസ് പരിശോധിക്കുന്നുണ്ട്. മോഡലുകളെ പിന്തുടര്‍ന്ന വാഹനത്തിന്റെ ഉടമയെ കണ്ടെത്തുന്നതോടെ ഈ കേസിലെ നിര്‍ണായക അറസ്റ്റുണ്ടാവും.

മോഡലുകളുടെ അപകടമരണത്തിന്റെ വസ്തുതകള്‍ പുറത്തുവരാന്‍ ഇവര്‍ സഞ്ചരിച്ച കാറിന്റെ ഫൊറന്‍സിക് പരിശോധനയ്ക്ക് അന്വേഷണസംഘം ഒരുങ്ങുന്നു. ഡ്രൈവര്‍ മദ്യപിച്ചു വണ്ടിയോടിച്ചുണ്ടായ സാധാരണ അപകടമരണത്തേക്കാള്‍ ഗൗരവം കേസിനു ലഭിച്ചതോടെയാണു വൈകിയാണെങ്കിലും പൊലീസിന്റെ നീക്കം.

കൊല്ലപ്പെട്ട മോഡലുകള്‍ അടക്കം 4 പേര്‍ സഞ്ചരിച്ച കാറോടിച്ചിരുന്ന തൃശൂര്‍ മാള സ്വദേശി അബ്ദുല്‍ റഹ്മാന്‍ പരുക്കുകളോടെ രക്ഷപ്പെട്ടിരുന്നു. റഹ്മാന്റെ മൊഴികളില്‍ പൊരുത്തക്കേടുണ്ടോയെന്നു കണ്ടെത്താന്‍ ഫൊറന്‍സിക് പരിശോധന നിര്‍ണായകമാണ്.

ഓട്ടത്തിനിടയില്‍ കാറിന്റെ ബ്രേക്ക് ഫ്‌ലൂയിഡ് ചോര്‍ന്നതായി സംശയമുണ്ട്. ഹോട്ടലിന്റെ പാര്‍ക്കിങ് യാഡില്‍ ഈ കാര്‍ കിടന്ന സ്ഥലത്തിന്റെ പരിശോധനയും നിര്‍ണായകമാണ്.

മോഡലുകള്‍ പങ്കെടുത്ത പാര്‍ട്ടി നടന്ന ഫോര്‍ട്ട്‌കൊച്ചി നമ്പര്‍ 18 ഹോട്ടലിലെ നിരീക്ഷണ ക്യാമറയിലെ ദൃശ്യങ്ങള്‍ നശിപ്പിക്കപ്പെട്ട സാഹചര്യത്തില്‍ സംഭവം നടന്ന ഒക്ടോബര്‍ 31നു രാത്രിയില്‍ ഹോട്ടലില്‍ ഉണ്ടായിരുന്ന മുഴുവന്‍ പേരുടെയും മൊഴി രേഖപ്പെടുത്താനുള്ള നീക്കത്തിലാണു ക്രൈംബ്രാഞ്ച്.

പാര്‍ട്ടി നടന്ന സമയം ഹോട്ടലിലെ മുറികളിലൊന്നില്‍ വിഐപി താമസിച്ചിരുന്നെന്ന വാര്‍ത്ത പൊലീസ് സ്ഥിരീകരിച്ചിട്ടില്ല. ഈ വിഐപി ഉന്നത പൊലീസ് ഉദ്യോഗസ്ഥനാണെന്ന റിപ്പോര്‍ട്ടുകള്‍ ശക്തമാണ്. ഈ ഉദ്യോഗസ്ഥന്റെ സാന്നിധ്യം മറയ്ക്കുന്നതിനാണു ഹോട്ടലുടമ റോയ് നിരീക്ഷണ ക്യാമറ ദൃശ്യങ്ങളടങ്ങിയ ഹാര്‍ഡ് ഡിസ്‌കുകള്‍ നീക്കം ചെയ്യാന്‍ നിര്‍ദേശം നല്‍കിയതെന്നും സൂചനയുണ്ട്.