നാളെ മുതല്‍ അഞ്ചുദിവസം ഒറ്റപ്പെട്ട കനത്ത മഴയ്ക്കു സാധ്യത... അഞ്ച് ജില്ലകളില്‍ യെല്ലോ അലര്‍ട്ട്, മലയോര ജില്ലകളില്‍ ഓറഞ്ച് അലര്‍ട്ടിനു തുല്യമായ ജാഗ്രത തുടരണമെന്ന് സംസ്ഥാന ദുരന്തനിവാരണ അതോറിറ്റി.

കാലാവസ്ഥാ വ്യതിയാനത്തിന്റെ സൂചനയായി ഏതാനും ദിവസംകൊണ്ട് വന്‍തോതില്‍ മഴപെയ്യുന്ന പ്രതിഭാസം കേരളത്തില്‍ ആവര്‍ത്തിക്കുകയാണ്. ഈ ദിവസങ്ങളില്‍ 36.8 മില്ലീമീറ്ററാണ് പെയ്യേണ്ടിയിരുന്നത്. പെയ്തത് 159.6 മില്ലീമീറ്ററും.

ഒക്ടോബര്‍ ഒന്നുമുതല്‍ നവംബര്‍ 17 വരെയുള്ള ദിവസങ്ങളെടുത്താല്‍ പെയ്തത് 107 ശതമാനം അധികമഴയും. തിങ്കളാഴ്ച മുതല്‍ അഞ്ചുദിവസം ഒറ്റപ്പെട്ട കനത്ത മഴയ്ക്കു സാധ്യതയുണ്ട്.

തിങ്കളാഴ്ച ഒറ്റപ്പെട്ട കനത്തമഴയ്ക്ക് സാധ്യതയുള്ളതിനാല്‍ അഞ്ച് ജില്ലകളില്‍ മഞ്ഞജാഗ്രത പ്രഖ്യാപിച്ചു. പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിലാണിത്. 23-നും 24-നും തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി എന്നിവിടങ്ങളിലും മഞ്ഞജാഗ്രത പ്രഖ്യാപിച്ചു.




്അതേസമയം രണ്ട് സ്പില്‍വേ ഷട്ടറുകള്‍ തുറന്ന് ജലം പുറത്തേക്ക് ഒഴുക്കിയിട്ടും മുല്ലപ്പെരിയാര്‍ അണക്കെട്ടില്‍ ജലനിരപ്പ് 141.10 അടിയില്‍ തുടരുന്നു. അണക്കെട്ടിലേക്കുള്ള നീരൊഴുക്കില്‍ കുറവുണ്ടായിട്ടില്ല. സെക്കന്‍ഡില്‍ 3240 ഘനയടി വീതം ജലമാണ് അണക്കെട്ടിലേക്ക് ഒഴുകിയെത്തുന്നത്. 2300 ഘനയടി വീതം ജലമാണ് തമിഴ്നാട് കൊണ്ടുപോകുന്നത്.

ഇന്നലെ അണക്കെട്ടിന്റെ വൃഷ്ടിപ്രദേശത്തും പരിസര പ്രദേശങ്ങളിലും മഴ ഇല്ലാതെയിരുന്നിട്ടും കാട്ടരുവികളില്‍ നിന്നും അണക്കെട്ടിലേക്കുള്ള നീരൊഴുക്ക് തുടരുകയാണ്.

അണക്കെട്ടിലെ ജലനിരപ്പ് 141 അടിയില്‍ നിന്നും താഴ്ന്നു പോകാതെ നിലനിര്‍ത്താനാണ് ഉദ്യോഗസ്ഥര്‍ക്ക് തമിഴ്നാട് നിര്‍ദേശം നല്‍കിയിട്ടുള്ളത്. അതേസമയം ഇടുക്കി അണക്കെട്ടിന്റെ ഷട്ടര്‍ ഒരുമീറ്റര്‍ ഉയര്‍ത്തിയിട്ടും ജലനിരപ്പുയരുകയാണ്. ഇന്നലെ രാവിലെ പത്തിനാണ് ഷട്ടര്‍ ഒരുമീറ്ററായി ഉയര്‍ത്തിയത്. രാവിലെ 2399.98 അടിയായിരുന്നു. വൈകിട്ട് 2400 അടിയിലെത്തി.മലയോര മേഖലകളില്‍ ഒറ്റപ്പെട്ട ശക്തമായ ഇടിയോടു കൂടിയ മഴക്ക് സാധ്യതയുണ്ട്.