ഗൂഢാലോചന കേസില്‍ സംവിധായകന്‍ റാഫിയെയും ദിലീപിന്റെ നിര്‍മ്മാണ കമ്പനിയിലെ ജീവനക്കാരനെയും ക്രൈംബ്രാഞ്ച് വിളിച്ചുവരുത്തി ചോദ്യം ചെയ്തിരുന്നു. ദിലീപിനെയും കൂട്ടുപ്രതികളെയും ക്രൈംബ്രാഞ്ച് ഓഫീസില്‍ രണ്ടാംദിനവും ചോദ്യം ചെയ്യുന്നതിനിടെയാണ് ഇരുവരെയും വിളിച്ചുവരുത്തി മൊഴിയെടുത്തത്. ബാലചന്ദ്രകുമാര്‍ കൈമാറിയ ശബ്ദരേഖ തിരിച്ചറിയുന്നതിനു വേണ്ടിയാണ് ഇരുവരെയും വിളിച്ചുവരുത്തിയതെന്നാണ് ക്രൈംബ്രാഞ്ച് വ്യക്തമാക്കിയത്.

റാഫി നല്‍കിയ മൊഴിയില്‍ ദിലീപിനെ വച്ച് ചെയ്യാന്‍ ഉദ്ദേശിച്ച സിനിമയില്‍ നിന്ന് പിന്മാറുന്നതായി ബാലചന്ദ്രകുമാര്‍ തന്നെ വിളിച്ചറിയിച്ചതായി റാഫി പറയുന്നുണ്ട്. ഇക്കാര്യം മൊഴി നല്‍കിയതിനു ശേഷം പുറത്തിറങ്ങി മാധ്യമങ്ങളോടും റാഫി പറഞ്ഞിരുന്നു. അടുത്തിടെയാണ് ഇക്കാര്യം പറഞ്ഞ് ബാലചന്ദ്ര കുമാര്‍ തന്നെ വിളിച്ചതെന്നും ഒരു വര്‍ഷത്തിനുള്ളിലാണ് വിളിച്ചതെന്നും റാഫി പറയുന്നു. സിനിമ നീണ്ടുപോകുന്നതില്‍ ബാലചന്ദ്രകുമാറിന് മനഃപ്രയാസമുണ്ടായിരുന്നു. ദീലീപിനോട് ദേഷ്യമുള്ളതായി ബാലചന്ദ്രകുമാര്‍ തന്നോട് പറഞ്ഞിട്ടില്ലെന്നും റാഫി മാദ്ധ്യമങ്ങളോട് പറഞ്ഞു.

യഥാര്‍ത്ഥത്തില്‍ റാഫിയുടെ മൊഴി ദിലീപിന് കുരുക്കായി മാറുകയാണ്. ബാലചന്ദ്രകുമാര്‍ സിനിമ ചെയ്യാന്‍ കഴിയാത്തതിനാലും പണം ചോദിച്ചപ്പോള്‍ നല്‍കാത്തതു കൊണ്ടും തന്നോട് ദേഷ്യമുണ്ടാകുകയും അതിനെത്തുടര്‍ന്ന് തനിക്കെതിരെ ആരോപണങ്ങളുമായി എത്തുകയുമായിരുന്നു എന്നാണ് ദിലീപ് നേരത്തെ വെളിപ്പെടുത്തിയത്.

ഇതിനെ പൂര്‍ണ്ണമായും ഖണ്ഡിക്കുന്ന മൊഴിയാണ് റാഫി നല്‍കിയിട്ടുള്ളത്. സിനിമ നീണ്ടുപോകുന്നതില്‍ ബാലചന്ദ്രകുമാറിന് മനഃപ്രയാസമുണ്ടായിരുന്നുവെന്നും ദീലീപിനോട് ദേഷ്യമുള്ളതായി ബാലചന്ദ്രകുമാര്‍ തന്നോട് പറഞ്ഞിട്ടില്ലെന്നുമുള്ള റാഫിയുടെ മൊഴി, ബാലചന്ദ്ര കുമാറിന് ദിലീപിനോടു വൈരാഗ്യമില്ലെന്നു തന്നെയാണ് സൂചിപ്പിക്കുന്നതെന്നാണ് പൊലീസ് വിലയിരുത്തുന്നത്.