ടീം സോളാര്‍ കമ്പനി ഉമ്മന്‍ ചാണ്ടിയുടേതാണെന്നും സരിതയുടെ സോളാര്‍ തട്ടിപ്പില്‍ ഉമ്മന്‍ ചാണ്ടിക്കും പങ്കുണ്ടെന്നും വി എസ് അച്ചുതാനന്ദന്‍ ചാനലില്‍ പറഞ്ഞത് തനിക്ക് അപകീര്‍ത്തികരമാണെന്ന് ആരോപിച്ച് യു ഡി എഫ് മുന്‍ മുഖ്യമന്ത്രി ഉമ്മന്‍ ചാണ്ടി സമര്‍പ്പിച്ച മാനനഷ്ട കേസില്‍ വി.എസ് അച്ചുതാന്ദന്‍ നഷ്ടപരിഹാരം നല്‍കാന്‍ തിരുവനന്തപുരം പ്രിന്‍സിപ്പല്‍ സബ് കോടതി വിധി പ്രസ്താവിച്ചു.


അന്യായ സംഖ്യയായ 10.10 ലക്ഷം രൂപക്ക് അന്യായ തീയതി മുതല്‍ 6% പലിശയും കോടതിച്ചെലവും ചേര്‍ത്ത് വി.എസ് അച്ചുതാനന്ദന്‍ ഉമ്മന്‍ ചാണ്ടിക്ക് നല്‍കാന്‍ കോടതി വിധി പ്രഖ്യാപിച്ചു.

2013 ജൂലൈ 6 ന് റിപ്പോര്‍ട്ടര്‍ ന്യൂസ് ചാനല്‍ ഇന്റര്‍വ്യൂവില്‍ പങ്കെടുത്ത് വി.എസ് നടത്തിയ പരാമര്‍ശമാണ് മാനനഷ്ട കേസിനാധാരമായത്. സംസ്ഥാനത്തെ മൂന്നര കോടി ജനങ്ങളെ വഞ്ചിച്ച സരിതയുടെ സോളാര്‍ കമ്പനി ഉമ്മന്‍ ചാണ്ടിയുടേതാണെന്നുള്ള പരാമര്‍ശം വി.എസ് നടത്തിയിരുന്നു.

കേസ് വിസ്താര വേളയില്‍ ചാനല്‍ ചര്‍ച്ചയില്‍ ഉന്നയിച്ച ആരോപണം തെളിയിക്കാന്‍ വി. എസിന് ആയില്ലെന്ന് കണ്ടെത്തിയാണ് കോടതി നഷ്ടപരിഹാര ഉത്തരവ് പുറപ്പെടുവിച്ചത്.

2014 മാര്‍ച്ച് 29 നാണ് അഡ്വ.എ. സന്തോഷ് കുമാര്‍ മുഖേന ഉമ്മന്‍ ചാണ്ടി മാനനഷ്ടകേസ് ഫയല്‍ ചെയ്തത്.