ദിലീപിന്റെ പ്രിയ സുഹൃത്തായ പ്രശസ്ത സംവിധായകന്‍ റാഫിയുടെ മൊഴി ദീലീപിന് വിനയാകുന്നു. ദിലീപ് നായകനായി അഭിനയിക്കുന്ന ബാലചന്ദ്രകുമാറിന്റെ സിനിമയില്‍നിന്നു പിന്‍വാങ്ങുകയാണെന്നു ബാലചന്ദ്രകുമാറാണ് തന്നെ അറിയിച്ചതെന്ന് സംവിധായകനും തിരക്കഥാകൃത്തുമായ റാഫി പറഞ്ഞത്. സിനിമയില്‍ നിന്നു പിന്‍മാറിയതിന്റെ വൈരാഗ്യമാണ് ബാലചന്ദ്രകുമാറിനെന്ന് ദിലീപും താനാണ് സിനിമയില്‍നിന്നു പിന്‍വാങ്ങിയതെന്ന് ബാലചന്ദ്രകുമാറും പറഞ്ഞ സാഹചര്യത്തില്‍ റാഫിയുടെ മൊഴി നിര്‍ണായകമാകും.

പൊലീസ് ഉദ്യോഗസ്ഥര്‍ക്കെതിരായ വധശ്രമ ഗൂഢാലോചനക്കേസില്‍ സംവിധായകന്‍ ബാലചന്ദ്രകുമാര്‍ െ്രെകംബ്രാഞ്ചിനു കൈമാറിയ ഡിജിറ്റല്‍ തെളിവുകളില്‍ റാഫിയുടെ ശബ്ദവും പതിഞ്ഞിരുന്ന സാഹചര്യത്തില്‍ ഇതു സംബന്ധിച്ച കാര്യങ്ങളറിയാനാണ് അന്വേഷണ സംഘം അദ്ദേഹത്തെ വിളിച്ചുവരുത്തിയത്.

ഒരു പോക്കറ്റടിക്കാരന്റെ ജീവിതത്തെ ആസ്പദമാക്കി ദിലീപിനെ നായകനാക്കി സംവിധാനം ചെയ്യാനിരുന്ന സിനിമയില്‍നിന്നു പിന്‍മാറുന്നതായി ബാലചന്ദ്രകുമാര്‍ തന്നെ ഫോണില്‍ വിളിച്ചു പറയുകയായിരുന്നുവെന്ന് മൊഴിയെടുപ്പിനു ശേഷം റാഫി പറഞ്ഞു. സിനിമയുടെ തിരക്കഥയില്‍ വേണ്ട മാറ്റം വരുത്താന്‍ റാഫിയെയാണ് ചുമതലപ്പെടുത്തിയിരുന്നത്.

നടിയെ ആക്രമിച്ച കേസ് അന്വേഷിച്ച ഉദ്യോഗസ്ഥരെ അപായപ്പെടുത്താന്‍ ഗൂഢാലോചന നടത്തിയെന്ന കേസില്‍ സംവിധായകന്‍ ബാലചന്ദ്രകുമാറിന്റെ വെളിപ്പെടുത്തലുമായി ബന്ധപ്പെട്ട് റാഫിയെ ക്രൈം ബ്രാഞ്ച് ഇന്നലെയാണ് വിളിച്ചുവരുത്തിയത്. ബാലചന്ദ്രകുമാറും ദിലീപും തമ്മിലുള്ള വിഷയത്തില്‍ വ്യക്തത തേടാനാണ് റാഫിയെ വിളിച്ചുവരുത്തിയതെന്നാണ് വിവരം.

ദിലീപുമായി ബന്ധപ്പെട്ട സിനിമയില്‍നിന്ന് പിന്‍മാറിയത് തന്നെ വിളിച്ച് അറിയിച്ചത് ബാലചന്ദ്രകുമാര്‍ ആണെന്ന് റാഫി പറഞ്ഞു. സിനിമ ചെയ്യുന്നില്ല എന്നാണ് ബാലചന്ദ്രകുമാര്‍ പറഞ്ഞത്. അത് ഒരു വര്‍ഷത്തോളം ആയിട്ടില്ല. അതിന്റെ കാരണമെന്തെന്ന് അദ്ദേഹം പറഞ്ഞിരുന്നില്ലെന്ന് റാഫി മാധ്യമങ്ങളോടു പറഞ്ഞു.

ബാലചന്ദ്രകുമാര്‍ സിനിമയുടെ തിരക്കഥ തനിക്ക് നോക്കാന്‍ നല്‍കിയിരുന്നു. ബാലചന്ദ്രകുമാറിന് സിനിമ വൈകുന്നതില്‍ മനഃപ്രയാസം ഉണ്ടായി, ദേഷ്യമുള്ളതായി അറിയില്ല. കാര്‍ണിവല്‍ എന്ന കമ്പനിയാണ് സിനിമ നിര്‍മിക്കാനിരുന്നത്. അവര്‍ തന്നെ നിര്‍മിക്കുന്ന വേറൊരു സിനിമ കൂടിയുണ്ട്. അതിന്റെ തിരക്കഥ ആദ്യം എഴുതാന്‍ പറഞ്ഞു. അത് മുഴുവന്‍ ഗ്രാഫിക്‌സ് വച്ചുള്ള സിനിമയായതിനാല്‍ അതിനായി ഒരു വര്‍ഷത്തോളം പ്രീപ്രെഡക്ഷനു വേണം. അതിനാലാണ് ദിലീപിനെ വച്ചുള്ള'പിക് പോകറ്റ്' എന്ന പ്രോജക്ട് മാറ്റിവച്ചിട്ട് അതെഴുതാന്‍ തുടങ്ങിയതെന്നും അദ്ദേഹം പറഞ്ഞു.

നടിയെ തട്ടിക്കൊണ്ടുപോയി പീഡിപ്പിച്ച കേസിലെ ഒന്നാം പ്രതി സുനില്‍കുമാര്‍ (പള്‍സര്‍ സുനി) കൈമാറിയ ദൃശ്യങ്ങള്‍ വ്യവസായിയായ 'വിഐപി'യുടെ സാന്നിധ്യത്തില്‍ ദിലീപിന്റെ വീട്ടിലെത്തിയത് ആലപ്പുഴയില്‍നിന്നാണെന്ന സൂചന ബാലചന്ദ്രകുമാറിന്റെ മൊഴിയിലുണ്ടായിരുന്നു. ഇതു സാധൂകരിക്കുന്ന ചില വിവരങ്ങള്‍ ഇന്നലെ പ്രതികളുടെ ചോദ്യംചെയ്യലില്‍ പുറത്തുവന്നതായി ക്രൈംബ്രാഞ്ച് വൃത്തങ്ങള്‍ സൂചിപ്പിച്ചു.

നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ അപായപ്പെടുത്താന്‍ ശ്രമിച്ചെന്ന കേസില്‍ നടന്‍ ദിലീപിനെ തുടര്‍ച്ചയാണ് രണ്ട് ദിവസങ്ങളാണ് ചോദ്യം ചെയ്തത്. 2 ദിവസങ്ങളിലായി ചോദ്യംചെയ്തത് 22 മണിക്കൂര്‍. മാധ്യമങ്ങളോട് പ്രതികരിക്കാതെയാണു രണ്ടാം ദിവസവും ദിലീപ് മടങ്ങിയത്. ചോദ്യംചെയ്യലിനുള്ള കോടതി അനുമതി ചൊവ്വാഴ്ച അവസാനിക്കും.

ദിലീപിന്റെ വീട്ടില്‍നിന്ന് പിടിച്ചെടുത്ത ഡിജിറ്റല്‍ രേഖകള്‍ ശാസ്ത്രീയ പരിശോധനയ്ക്കു വിധേയമാക്കിയിരുന്നു. ഇതു മുന്‍നിര്‍ത്തിയാണ് പ്രധാനമായും ചോദ്യം ചെയ്തത്. സംവിധായകന്‍ ബാലചന്ദ്രകുമാറിന്റെ സിനിമയുടെ തിരക്കഥാകൃത്ത് കൂടിയായ റാഫിയെ അന്വേഷണ സംഘം വിളിച്ചുവരുത്തി. ബാലചന്ദ്രകുമാര്‍ നല്‍കിയ ശബ്ദരേഖയിലുള്ളവരെ തിരിച്ചറിയാനാണു റാഫിയുടെ മൊഴിയെടുത്തത്.