ആര്‍എസ്എസ് നേതാവ് ശ്രീനിവാസനെ കൊലപ്പെടുത്തിയ കേസിലെ പ്രതികള്‍ സഞ്ചരിച്ച ഒരു വാഹനം കൂടി കണ്ടെത്തി. വെള്ള ആക്ടീവയാണ് പോലീസ് കസ്റ്റഡിയിലെടുത്തത്.

കേസില്‍ ഇന്നലെ അറസ്റ്റിലായ ഇഖ്ബാലിനെ മുളയംകുഴിപള്ളി മഖാമിലെത്തിച്ച് നടത്തിയ തെളിവെടുപ്പിനിടെയാണ് വാഹനം കണ്ടെത്തിയത്. പ്രതികള്‍ സഞ്ചരിച്ച മൂന്ന് വാഹനങ്ങളില്‍ ഒന്നാണ് ഈ ആക്ടീവ.

മൂന്ന് വാഹനങ്ങളിലായി ആറ് പേരാണ് കൃത്യം നടത്താനെത്തിയത്. ഇഖ്ബാല്‍ ആണ് ആക്ടീവ ഓടിച്ചിരുന്നത്. 2019ലെ കൊലക്കേസ് പ്രതിയാണ് ഇഖ്ബാല്‍.


അതേസമയം, കേസില്‍ ഇതുവരെ ഒന്‍പത് പേരെയാണ് അറസ്റ്റ് ചെയ്തത്. ബാക്കിയുള്ളവരെ കൂടി ഉടന്‍ അറസ്റ്റ് ചെയ്യുമെന്ന് അധികൃതര്‍ വ്യക്തമാക്കി.