നടനും നിര്‍മ്മാതാവുമായ വിജയ് ബാബുവിനെതിരെ ഉയര്‍ന്ന പീഡന പരാതിയെ തുടര്‍ന്ന് അമ്മ എന്ന താര സംഘടനയില്‍ തര്‍ക്കം രൂക്ഷമായിരിക്കുകയാണ്. ചേരി തിരിഞ്ഞാണ് സംഘടനയില്‍ അടി നടക്കുന്നത്. അതേസമയം വിജയ് ബാഹുവിനെതിരെ നടപടി സ്വീകരിക്കാത്തതില്‍ പ്രതിഷേധിച്ച് നടി മാലാ പാര്‍വ്വതി രാജിവെച്ചിരിക്കുന്നു. ആഭ്യന്തര പരിഹാര സമിതിയില്‍ നിന്നാണ് നടി രാജിവെച്ചത്.

നടനെതിരെ നടപടി വേണമെന്ന് ശ്വേത മേനോന്‍ ചെയര്‍പേഴ്‌സനായ ഇന്റേണല്‍ കംപ്ലെയിന്റ്‌സ് കമ്മിറ്റി ശുപാര്‍ശ ചെയ്തിരുന്നു. അമ്മയിലെ എക്‌സിക്യൂട്ടീവ് കമ്മിറ്റി അംഗമായ വിജയ് ബാബുവിനെ സസ്‌പെന്‍ഡ് ചെയ്യുകയോ തരം താഴ്ത്തുകയോ ചെയ്യണമെന്നായിരുന്നു കമ്മിറ്റിയുടെ ആവശ്യം. വിജയ് ബാബു നല്‍കിയ വിശദീകരണം എക്‌സിക്യൂട്ടീവ് കമ്മിറ്റി ചര്‍ച്ച ചെയ്തു. എന്നാല്‍ നടനെ പുറത്താക്കാന്‍ കഴിയില്ലെന്ന് അറിയിച്ചതോടെയാണ് മാലാപാര്‍വ്വതി രാജിക്ക് തയ്യാറായത്.

അതേസമയം താര സംഘടനയായ അമ്മയുടെ എക്‌സിക്യൂട്ടീവ് കമ്മിറ്റിയില്‍നിന്ന് സ്വമേധയാ മാറി നില്‍ക്കാന്‍ തയ്യാറാണെന്ന് വിജയ് ബാബു അറിയിച്ചിട്ടുണ്ട്. തന്റെ നിരപരാധിത്വം തെളിയിക്കുന്നതുവരെ എക്‌സിക്യൂട്ടീവ് കമ്മിറ്റിയില്‍നിന്ന് മാറിനില്‍ക്കുന്നുവെന്ന് വ്യക്തമാക്കി വിജയ് ബാബു കത്ത് നല്‍കിയിരുന്നു. തനിക്കെതിരെ ഉയര്‍ന്ന ആരോപണങ്ങള്‍ സംഘടനയ്ക്ക് അവമതിപ്പ് ഉണ്ടാക്കും എന്നതിനാലാണ് മാറി നില്‍ക്കുന്നതെന്ന് കത്തില്‍ പറഞ്ഞിരുന്നു. കത്തിലെ ആവശ്യം അമ്മ ഭാരവാഹികള്‍ അംഗീകരിക്കുകയും ചെയ്തു.

എന്നാല്‍ അമ്മ നേതൃത്വം വിജയ് ബാബുവിനെ സംരക്ഷിക്കുന്ന നിലപാടാണ് സ്വീകരിച്ചിരുന്നത്. ഇത് തന്നെയാണ് മാലാപാര്‍വ്വതിയേയും ഇപ്പോള്‍ ചൊടിപ്പിച്ചത്. നേരത്തെ അമ്മ നടനെതിരെ നടപടി സ്വീകരിക്കുമെന്നാണ് എല്ലാവരും പ്രതീക്ഷിച്ചിരുന്നത്. എന്നാല്‍ അമ്മ സംഘടന അവിടേയും കാലുമാറുന്ന കാഴ്ചയാണ് ഉണ്ടായത്.

ദിലീപിനെ താര സംഘടനയായ അമ്മയില്‍ നിന്നും പുറത്താകാതിരിക്കാന്‍ ചിലര്‍ കളിച്ച അതേ തന്ത്രമാണ് ഇന്നലേയും അമ്മ യോഗത്തില്‍ കണ്ടത്. താന്‍ സ്വമേധയാ മാറി നില്‍ക്കുന്നു എന്ന് കാണിച്ച് വിജയ് ബാബു സമര്‍പ്പിച്ച കത്ത് മാതൃകാപരമാണെന്ന് ചൂണ്ടിക്കാട്ടി അമ്മയുടെ യോഗത്തില്‍ കയ്യടിച്ച് പാസാക്കുകയാണ് ഉണ്ടായത്.

അതേസമയം നടനെതിരെ നടപടി എടുത്തില്ല എങ്കില്‍ താരങ്ങളും അമ്മ സംഘടനയിലെ എക്‌സിക്യൂട്ടീവ് അംഗങ്ങളായ ശ്വേതമേനോനും ബാബുരാജും രാജിവെക്കുമെന്ന് നേരത്തെ അറിയിച്ചിരുന്നു. ഏപ്രില്‍ 30ന് ശ്വേതാ മേനോന്റെ അദ്ധ്യക്ഷതയില്‍ ചേര്‍ന്ന യോഗത്തില്‍ വിജയ് ബാബുവിനെ പിന്തുണച്ചും എതിര്‍ത്തുമുള്ള അഭിപ്രായങ്ങള്‍ ഉയര്‍ന്നിരുന്നു. അപ്പോഴായിരുന്നു നടനെതിരെ നടപടി സ്വീകരിക്കണമെന്ന് ശ്വേതയും ബാബുരാജും അറിയിച്ചത്.

എന്നാല്‍ നടന്‍ സ്വയമേ മാറി നില്‍ക്കുമെന്ന് അറിയിച്ചതോടെ ഇരുവരും തല്‍കാലത്തേക്ക് ശാന്തരായി. മാത്രമല്ല മോഹന്‍ലാല്‍ കഴിഞ്ഞ ദിവസത്തെ യോഗത്തില്‍ പങ്കെടുത്തിരുന്നില്ല. ഷൂട്ടിങിന്റെ ഭാഗമായി ഗോവിയിലാണ് താന്‍ അതിനാല്‍ യോഗത്തിന് എത്തില്ല എന്നാണ് അറിയിച്ചത്.

ഏപ്രില്‍ 22 നായിരുന്നു യുവതി പീഡന പരാതി നല്‍കിയത്. നിലവില്‍ രണ്ട് കേസുകളാണ് വിജയ്ബാബുവിനെതിരെ ഉള്ളത്. ഒന്ന് നടിയെ ശരീരികമായും മാനസീകമായും പീഡിപ്പിച്ചു എന്നുള്ളത്, രണ്ടാമത്തേത് ലൈവ് വീഡിയോയില്‍ നടിയുടെ പേര് പരാമര്‍ശിച്ചത്. അതിനിടെ നടിയുടെ പേര് വെളിപ്പെടുത്തിയത് വിവാദമായപ്പോള്‍ സോഷ്യല്‍ മീഡിയയില്‍ നിന്ന് വീഡിയോ നടന്‍ നീക്കം ചെയ്തിട്ടുണ്ട.്

അതേസമയം കഴിഞ്ഞ ദിവസം വിജയ് ബാബുവിന്റെ അഭിഭാഷകന്‍ ഹൈക്കോടതിയില്‍ മുന്‍ ജാമ്യത്തിനായുള്ള അപേക്ഷ സമര്‍പ്പിച്ചിട്ടുണ്ട്. എന്നാല്‍ അപേക്ഷ പരിഗണിക്കുന്നത് മേയ് 28 വരെ മാറ്റിവച്ചതിനാല്‍ പിടികൊടുക്കാതിരിക്കാനുള്ള എല്ലാ ശ്രമങ്ങളും വിജയ് ബാബു നടത്തുന്നുമുണ്ട്. എവിടെയാണെന്ന് പോലും പോലീസിന് കണ്ടുപിടിക്കാനായിട്ടില്ല. മുന്‍കൂര്‍ ജാമ്യം ഇനി പരിഗണിക്കുന്നതിന് മുമ്പ് വിജയ് ബാബുവിനെ പിടികൂടാനാണ് നോക്കുന്നത്. ഈ സാഹചര്യം മുന്നില്‍ നില്‍ക്കുമ്പോള്‍ വിദേശാത്താണെങ്കില്‍ പോലും അവിടെ ചെന്ന് അറസ്റ്റ് ചെയ്യാനുള്ള നീക്കത്തിലാണ് പോലീസ്.

അതേസമയം വിജയ് ബാബുവിനെതിരെ ഉയര്‍ന്ന രണ്ടാമത്തെ പീഡന ആരോപണത്തില്‍ പരാതി ലഭിച്ചിട്ടില്ല എന്നാണ് കൊച്ചി സിറ്റി പൊലീസ് കമ്മീഷണര്‍ സി എച്ച് നാഗരാജു അറിയിച്ചിരിക്കുന്നത്. എന്നാല്‍ വിജയ് ബാബു അങ്ങനെ ആശ്വസിക്കേണ്ടതില്ല.

കാരണം, നടനെ അങ്ങനെ വെറുതെ വിടില്ല എന്ന സൂചനയും കമ്മീഷ്ണറിന്റെ വാക്കുകളില്‍ അലയടിച്ചിരുന്നു. അതായത്, വുമണ്‍ എഗൈന്‍സ്റ്റ് സെക്ഷ്വല്‍ ഹരാസ്‌മെന്റ് എന്ന പേജിലൂടെ വിജയ് ബാബുവിനെതിരെ പീഡന ആരേപണം നടത്തിയ അജ്ഞാതയായ യുവതിയെ കണ്ടെത്താനുള്ള ശ്രമങ്ങള്‍ തുടങ്ങിയിട്ടുണ്ട് എന്നാണ് കമ്മീഷ്ണര്‍ പറഞ്ഞത്. അതിനായി ഫെയ്‌സ്ബുക്ക് പേജിന്റെ അഡ്മിനെ കണ്ട് വിവരങ്ങള്‍ ശേഖരിക്കാനും നീക്കമുണ്ട്.