കേരളത്തില്‍ ഉല്‍പാദിപ്പിക്കുന്ന പഴവര്‍ഗ്ഗങ്ങളില്‍ നിന്ന് വൈന്‍ നിര്‍മ്മിക്കാനുള്ള പദ്ധതി സംബന്ധിച്ച ഉത്തരവ് വൈകാതെ ഇറങ്ങിയേക്കും. പൈനാപ്പിള്‍, ചക്ക തുടങ്ങിയവയില്‍ നിന്ന് ഉത്പാദിപ്പിക്കാനാണ് ഉദ്ദേശിക്കുന്നത്. ജാതിക്കയുടെ തോടില്‍ നിന്ന് ഉണ്ടാക്കുന്നതും പരിഗണിച്ചേക്കും.

വൈന്‍ നിര്‍മ്മാണ യൂണിറ്റ് തുടങ്ങാന്‍ എക്‌സൈസ് വകുപ്പ് തയ്യാറാക്കിയ ചട്ടത്തിന് നിയമവകുപ്പ് അംഗീകാരം നല്‍കി.

ഫയല്‍ നിയമസഭ സബ്ജക്റ്റ് കമ്മിറ്റി കൂടി കണ്ട ശേഷമാവും ഉത്തരവിറക്കുക. പുതിയ ചട്ടങ്ങള്‍ തയ്യാറാക്കുമ്പോള്‍ കമ്മിറ്റിയെ അറിയിക്കണമെന്ന നിര്‍ദ്ദേശമുള്ളതിനാലാണിത്.

വൈന്‍ നിര്‍മ്മാണ യൂണിറ്റുകള്‍ക്ക് മൂന്ന് വര്‍ഷമാണ് ലൈസന്‍സ് കാലാവധിയുള്ളത്. വാര്‍ഷിക ഫീസ് 50,000 രൂപ. വൈന്‍ ബോട്ട്ലിംഗ് ലൈസന്‍സിന് 5000 രൂപ ഫീസ്. ലൈസന്‍സ് പുതുക്കി നല്‍കാനുള്ള അധികാരം എക്സൈസ് ഡെപ്യൂട്ടി കമ്മിഷണര്‍ക്കായിരിക്കും.

കേരളത്തില്‍ നിലവില്‍ വൈന്‍ നിര്‍മ്മാണ യൂണിറ്റുകളില്ല. എക്സൈസ് കമ്മിഷണറുടെ നിര്‍ദ്ദേശാനുസരണം കാര്‍ഷിക വകുപ്പ് അസിസ്റ്റന്റ് ഡയറക്ടര്‍ ചെയര്‍മാനായി ഭക്ഷ്യ സുരക്ഷാ വകുപ്പ് അസിസ്റ്റന്റ് കമ്മിഷണര്‍, പൊതുമരാമത്ത് വകുപ്പ് അസിസ്റ്റന്റ് എക്സിക്യൂട്ടീവ് എന്‍ജിനിയര്‍, ഫാക്ടറീസ് ആന്‍ഡ് ബോയിലേഴ്സ് വകുപ്പ് ഇന്‍സ്പെക്ടര്‍ എന്നിവര്‍ അംഗങ്ങളായ കമ്മിറ്റി ശുപാര്‍ശ ചെയ്താലേ ലൈസന്‍സ് ലഭിക്കൂ.

അതേസമയം യൂണിറ്റ് ആരംഭിക്കാനായി കുറഞ്ഞത് അഞ്ച് ലക്ഷം രൂപയെങ്കിലും വേണ്ടിവരും. മഹാരാഷ്ട്ര, കര്‍ണാടക എന്നിവിടങ്ങളില്‍ നിന്നാണ് ഇപ്പോള്‍ വൈന്‍ എത്തുന്നത്. മുന്തിരിയില്‍ നിന്ന് ഉത്പാദിപ്പിക്കുന്ന വൈനാണിത്.


എഥനോള്‍ ഉത്പാദനം വൈകും അതേസമയം പൈലറ്റ് പ്രോജക്ടായി തിരുവനന്തപുരം കിഴങ്ങ് ഗവേഷണ കേന്ദ്രത്തില്‍ മരച്ചീനിയില്‍ നിന്ന് എഥനോളും മൂല്യവര്‍ദ്ധിത ഉത്പന്നങ്ങളും നിര്‍മ്മിക്കാനുള്ള പ്രധാന നടപടികള്‍ തുടങ്ങിയില്ല. ലാബ് ജോലികള്‍ നടക്കുന്നുണ്ട്. ഇതിന് രണ്ട് കോടി അനുവദിച്ചെങ്കിലും ഗവേഷണ കേന്ദ്രത്തിന് കൈമാറിയിട്ടില്ല. കശുമാങ്ങ, കൈതച്ചക്ക, ചക്ക, വാഴപ്പഴം, ജാതിത്തൊണ്ട് തുടങ്ങിയ വിഭവങ്ങളാണ് ഉപയോഗിക്കുക.