ബധിരയും മൂകയുമായ വീട്ടമ്മയ്ക്ക് നേരെ തോക്ക് ചൂണ്ടി കമ്മല്‍ കവര്‍ന്ന കേസില്‍ പ്രതിയെന്ന കരുതുന്നയാളിന്റെ രേഖാചിത്രം തയ്യാറാക്കി പോലീസ്.

മോഷ്ടാവെന്ന് കരുതുന്ന വ്യക്തി കവര്‍ച്ചയ്ക്ക് മുമ്പായി പ്രദേശത്തെ ഒരു കടയിലെത്തി വീട് അന്വേഷിച്ചിരുന്നു. കടയുടമയെ കണ്ട് ഏകദേശ രൂപം മനസ്സിലാക്കിയാണ് രേഖാചിത്രം പൊലീസ് തയ്യാറാക്കിയത്.

കഴിഞ്ഞ ഞായറാഴ്ച രാവിലെ ഏഴു മണിയോടെയാണ് മുതിയാവിള കളിയാകോട് ഷാലോം നിവാസില്‍ കുമാരി(53)യെ തോക്ക് ചൂണ്ടി മര്‍ദിച്ച് ഇവര്‍ ധരിച്ചിരുന്ന മുക്കപണ്ട കമ്മല്‍ ഊരി വാങ്ങിച്ചത്. മകള്‍ ജ്യോതിയും മരുമകന്‍ രതീഷും പള്ളിയില്‍ പോയ സമയത്തായിരുന്നു മുഖംമൂടിയും കയ്യുറയും ധരിച്ചെത്തിയ മോഷ്ടാവ് വീട്ടില്‍ കടന്നുകൂടിയത്.

ശബ്ദമുണ്ടാക്കരുതെന്ന് ആംഗ്യഭാഷയില്‍ പറഞ്ഞശേഷം മോഷ്ടാവ് കമ്മല്‍ ആവശ്യപ്പെട്ടു. ഊരി കൊടുക്കാന്‍ വിസമ്മതിച്ചപ്പോള്‍ മുടിയില്‍ പിടിച്ച് കുനിച്ച് മുതുകില്‍ ഇടിച്ചു. ഇതോടെ പേടിച്ച് കമ്മല്‍ ഊരി നല്‍കി. ഇതിനുശേഷം മുറിക്കുള്ളിലെ അലമാര തുറന്ന് സാധനങ്ങള്‍ വാരി വലിച്ചിട്ട് പരിശോധിച്ചെങ്കിലും ഒന്നു തന്നെ കിട്ടിയില്ല.

തുടര്‍ന്ന് പിന്‍ വാതിലിലൂടെ മോഷ്ടാവ് രക്ഷപ്പെടുകയും ചെയ്തു. സംഭവം നടന്ന് ഒരാഴ്ച പിന്നിട്ടിട്ടും കേസില്‍ കാര്യമായ തുമ്പ് ഒന്നും തന്നെ കിട്ടിയില്ല. ഡിവൈഎസ്പി കെ.എസ്.പ്രശാന്തിന്റെ നേതൃത്വത്തില്‍ പ്രത്യേക അന്വേഷണ സംഘമാണ് കേസ് അന്വേഷിക്കുന്നത്. ഷാഡോ പൊലീസ് സംഘവും അന്വേഷണത്തിനു പിന്നാലെയുണ്ട്.

സംഭവ ദിവസം രതീഷിന്റെ വീട് അന്വേഷിച്ച് രാവിലെ ഒരാള്‍ ബൈക്കില്‍ എത്തിയെന്ന് പ്രദേശത്തുള്ള ഒരു കടയുടമ പൊലീസിനു മൊഴി നല്‍കിയിരുന്നു. കുമാരിയുടെ മരുമകന്‍ രതീഷിന് ശനിയാഴ്ച സഹകരണ ബാങ്കില്‍ നിന്ന് ചിട്ടി നറുക്കില്‍ ലഭിച്ചു.എന്നാല്‍ പണം ലഭിച്ചില്ല. ഇത് അറിയാവുന്നവര്‍ ആരെങ്കിലുമാണോ കവര്‍ച്ചയ്ക്ക് പിന്നിലെന്ന് പൊലീസിന്റെ സംശയം. ഉള്‍പ്രദേശമായതിനാല്‍ മോഷ്ടാവ് കയറിയ വീടിന്റെ പരിസരത്ത് സിസിടിവി ക്യാമറകളൊന്നുമില്ല എന്നാല്‍ പ്രധാന റോഡിന്റെ പല ഭാഗത്തും ക്യാമറകളുണ്ട്. ഇതില്‍ നിന്നുള്ള ദൃശ്യങ്ങളും പോലീസ് ശേഖരിച്ചതിനു പിന്നാലെയാണ് രേഖാചിത്രം വരച്ചത്.