സംസ്ഥാനത്തിനുള്ള മഴ മുന്നറിയിപ്പില്‍ വീണ്ടും മാറ്റം വരുത്തി കേന്ദ്രകാലാവസ്ഥാ നിരീക്ഷണകേന്ദ്രം. പതിനൊന്ന് ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. തിരുവനന്തപുരം മുതല്‍ കോഴിക്കോട് വരെയുള്ള ജില്ലകളിലാണ് മഴ മുന്നറിയിപ്പ് നല്‍കിയിട്ടുള്ളത്. തിരുവനന്തപുരം, കൊല്ലം, പത്തനംതിട്ട,ഇടുക്കി,കോട്ടയം, ആലപ്പുഴ,എറണാകുളം, പാലക്കാട്, മലപ്പുറം, കോഴിക്കോട് ജില്ലകളിലാണ് നിലവില്‍ യെല്ലോ അലര്‍ട്ട് പ്രഖ്യാപിച്ചിരിക്കുന്നത്.

അതേസമയം കോഴിക്കോട്, കണ്ണൂര്‍, മലപ്പുറം ജില്ലകളുടെ കിഴക്കന്‍ ഭാഗങ്ങളില്‍ മലവെള്ളപ്പാച്ചിലുണ്ടായി. മലയോരമേഖലയില്‍ പലയിടത്തും മഴ തുടരുന്നുണ്ട്. കിഴക്കന്‍ മേഖലയില്‍ കാടിനകത്ത് ശക്തമായ മഴയും ഉരുള്‍പൊട്ടലും ഉണ്ടെന്നാണ് സൂചന.

കോഴിക്കോടിന്റെ കിഴക്കന്‍ മലയോരമേഖലയായ വിലങ്ങാട് പാനോം ഭാഗത്ത് വനമേഖലയില്‍ ഉരുള്‍ പൊട്ടിയതായി സംശയമുണ്ട്. വിലങ്ങാട് പുഴയില്‍ പൊടുന്നനെ ജലനിരപ്പ് ഉയര്‍ന്നതാണ് സംശയത്തിന് കാരണം. വിലങ്ങാട് ടൗണിലെ കടകളില്‍ വെള്ളം കയറിയിട്ടുണ്ട്. മലയോരമേഖലയില്‍ ഇടവിട്ട് മഴ തുടരുന്നുണ്ട്. നേരത്തെ ഉരുള്‍പൊട്ടല്‍ ഉണ്ടായിരുന്ന മേഖലയാണിത്. രണ്ടാഴ്ച മുന്‍പും ഈ മേഖലയില്‍ ശക്തമായ കാറ്റ് വീശി യിരുന്നു. വാണിമേല്‍ പുഴയിലും മലവെള്ളപ്പാച്ചില്‍ ഉണ്ടായിട്ടുണ്ട്.

മലപ്പുറം ജില്ലയിലെ കരുവാരകുണ്ട് ഭാഗത്തും ശക്തമായ മഴയും മലവെള്ളപ്പാച്ചിലും അനുഭവപ്പെടുന്നുണ്ട്. കല്‍ക്കുണ്ട്, കേരളാംകുണ്ട് ഭാഗങ്ങളിലാണ് മലവെളളപ്പാച്ചിലുണ്ടായി. ഒലിപ്പുഴ നിറഞ്ഞു കവിഞ്ഞൊഴുകുകയാണ്. കണ്ണൂരിലും മലവെള്ളപ്പാച്ചിലുണ്ടായി. നെടുംപോയില്‍ ചുരത്തില്‍ മലവെള്ളപ്പാച്ചിലുണ്ടായത്. ഇവിടെ വനത്തില്‍ ഉരുള്‍പൊട്ടിയതായിട്ടാണ് സൂചന. ഇവിടെ മൂന്നാഴ്ച മുന്‍പ് ഉരുള്‍ പൊട്ടി മൂന്നുപേര്‍ മരിച്ചിരുന്നു.