വിഴിഞ്ഞം തുറമുഖത്തിനെതിരെ സഭയുടെ നേതൃത്വത്തില്‍ തന്നെ പ്രക്ഷോഭം ആരംഭിച്ചതോടെ രാഷ്ട്രീയ പാര്‍ട്ടികളും വെട്ടിലാണ്. രാഷ്ട്രീയ പാര്‍ട്ടികളെ സമരത്തില്‍ അടുപ്പിക്കുന്നുമില്ല. ലത്തീന്‍ അതിരൂപതയുടെ നേതൃത്വത്തിലുള്ള മത്സ്യത്തൊഴിലാളി സമരം പതിമൂന്നാം ദിനത്തിലേക്ക് നീങ്ങുകയാണ്.

വിവിധ സംഘടനകളുടെ നേതൃത്വത്തില്‍ ഇന്ന് പ്രാര്‍ഥനാ ദിനമായി ആചരിക്കുകയാണ്. നാളെ വീണ്ടും കടല്‍ മാര്‍ഗവും കരമാര്‍ഗവും വിഴിഞ്ഞം തുറമുഖം ഉപരോധിക്കാന്‍ ആണ് തീരുമാനം. ആവശ്യങ്ങളില്‍ അനുകൂല തീരുമാനം ഉണ്ടാകും വരെ സമരം തുടരുമെന്നും പിന്തിരിപ്പിക്കാനും വിഭജിക്കാനുമുള്ള ശ്രമത്തില്‍ വീഴരുതെന്നുമുള്ള സര്‍ക്കുലര്‍ തിരുവനന്തപുരം ലത്തീന്‍ അതിരൂപതയ്ക്ക് കീഴിലെ പള്ളികളില്‍ വായിക്കും.

ആര്‍ച്ച് ബിഷപ്പ് ഡോ.തോമസ് ജെ.നെറ്റോയുടെ സര്‍ക്കുലര്‍ ആണിത്. തീരത്ത് ജീവിക്കാനുള്ള അവകാശം ഭരണഘടനാപരമാണെന്നും ഇതുറപ്പാക്കാന്‍ നിയമപരമായ സംരക്ഷണം തേടുമെന്നും സര്‍ക്കുലറിലുണ്ട്. ഉപരോധ സമരം തുടരുന്നതും വിജയം കാണും വരെ പോരാടണമെന്നും സര്‍ക്കുലറില്‍ പറയുന്നു. അതേസമയം സമരക്കാരുമായി ഇന്ന് വീണ്ടും മന്ത്രിതല ചര്‍ച്ച നടക്കും.

വൈകീട്ട് ആറ് മണിക്കാണ് ചര്‍ച്ച. മന്ത്രിമാരായ വി.അബ്ദുറഹ്മാന്‍, ആന്റണി രാജു എന്നിവരുടെ നേതൃത്വത്തിലാണ് ചര്‍ച്ച. മുഖ്യമന്ത്രിയുമായുള്ള ചര്‍ച്ച ഫലം കാണാത്തതിന് പിന്നാലെയാണ് മന്ത്രിതല ഉപസമിതിയുമായി വീണ്ടും ചര്‍ച്ച നടത്തുന്നത്. അതേസമയം തിരുവനന്തപുരത്ത് വിഴിഞ്ഞം തുറമുഖ നിര്‍മ്മാണത്തെ തുടര്‍ന്ന് തീരത്ത് ഉണ്ടായിട്ടുള്ള തീരശോഷണവും പ്രത്യാഘാതങ്ങളും സംബന്ധിച്ച് ശാസ്ത്രീയവും സുതാര്യവുമായ പഠനം നടത്തണമെന്ന് കേരള ലത്തീന്‍ കത്തോലിക്ക മെത്രാന്‍ സമിതി ആവശ്യപ്പെട്ടു.

അടുത്ത കാലത്ത് കോവളം, ശംഖുമുഖം, പൂന്തുറ, വലിയതുറ തുടങ്ങിയ തീരങ്ങളില്‍ ഉണ്ടായിട്ടുള്ള നാശനഷ്ടങ്ങള്‍ക്ക് കാരണം തുറമുഖ നിര്‍മ്മാണമാണ്. ഈ പ്രത്യാഘാതങ്ങള്‍ പരിഹരിക്കപ്പെടുന്നതുവരെ തുറമുഖ നിര്‍മ്മാണം നിര്‍ത്തി വയ്ക്കണമെന്നും മെത്രാന്‍ സമിതി കൊച്ചിയില്‍ ആവശ്യപെട്ടു.

തിരുവനന്തപുരം അതിരുപതയുടെ നേതൃത്വത്തില്‍ നടക്കുന്ന സമരങ്ങള്‍ക്ക് ലത്തീന്‍സഭയുടെ പൂര്‍ണ പിന്തുണയുണ്ടെന്ന് യോഗം വ്യക്തമാക്കി. വിഴിഞ്ഞം തുറമുഖസമരം ശക്തമായി തുടരുകയാണ്. പ്രതിഷേധക്കാര്‍ ഇന്നലേയും ബാരിക്കേഡ് തകര്‍ത്ത് അകത്ത് കടന്ന് കൊടികുത്തി. മര്യനാട്, വെട്ടുതുറ, പുത്തന്‍തോപ്പ്, ഫാത്തിമാപുരം, സെന്റ് ആന്‍ഡ്രൂസ് എന്നീ ഇടവകയിലെ ആളുകളാണ് ഇന്നലെ പ്രതിഷേധവുമായി എത്തിയത്. സമരത്തിന് അഭിവാദ്യമര്‍പ്പിച്ച് കുമാരപുരം ഇടവകയില്‍ നിന്നും പേട്ട ഫെറോനയില്‍ നിന്നും ആളുകളെത്തി. തുറമുഖനിര്‍മാണം നിര്‍ത്തണമെന്ന ആവശ്യം അംഗികരിക്കും വരെ സമരം ശക്തമായി തുടരാനാണ് സമരസമിതിടെ തീരുമാനം

അതേസമയം വിഴിഞ്ഞം തുറമുഖ പദ്ധതിക്കെതിരായ സമരത്തില്‍ ക്രമസമാധാന പ്രശ്‌നങ്ങള്‍ ഉണ്ടാകാതെ നോക്കണമെന്ന് പൊലീസിന് ഹൈക്കോടതിയുടെ നിര്‍ദേശം. സംരക്ഷണം ആവശ്യപ്പെട്ട് അദാനി ഗ്രൂപ്പും കരാര്‍ കമ്പനിയും സമര്‍പ്പിച്ച ഹര്‍ജിയിലാണ് കോടതി നടപടി. സമരം മൂലം പദ്ധതി തടസപ്പെടുത്തുന്നത് പൊതുതാല്‍പര്യത്തിന് വിരുദ്ധമാണെന്ന് അദാനി ഗ്രൂപ്പ് നിലപാടെടുത്തു. പ്രശ്‌നം പരിഹരിക്കേണ്ടത് സര്‍ക്കാരാണ്. സുരക്ഷയുടെ ഉത്തരവാദിത്തം കേന്ദ്രസര്‍ക്കാരിനുമുണ്ട്. 2014ല്‍ പാരിസ്ഥിതിക അനുമതി ലഭിച്ചതാണെന്നും ഇനിയും പഠനത്തിന്റെ ആവശ്യമില്ലെന്നും അദാനി ഗ്രൂപ്പ് വ്യക്തമാക്കി. പ്രശ്‌നം പരിഹരിക്കാന്‍ ശ്രമിക്കുന്നുണ്ടെന്നും നിലവില്‍ കേന്ദ്ര പൊലീസിന്റെ ആവശ്യമില്ലെന്നും സംസ്ഥാന സര്‍ക്കാര്‍ നിലപാടെടുത്തു. കേന്ദ്ര സേനയുടെ കാര്യത്തിലുള്ള ഹര്‍ജി തിങ്കളാഴ്ച വീണ്ടും പരിഗണിക്കും.