മൂന്നരവര്‍ഷത്തെ കാത്തിരിപ്പിനുശേഷം ജനിച്ച കുഞ്ഞായതുകൊണ്ട് നേര്‍ച്ചനേര്‍ന്ന പ്രകാരം കുഞ്ഞിന്റെ മുടി കളയാന്‍ പഴനിയിലേക്ക് പോയ കുടുംബത്തിന്റെ യാത്ര പാതിവഴിയില്‍. കുരുന്നടക്കം മൂന്നുപേരുടെ അപ്രതീക്ഷിത വിയോഗം നാടിനെ സങ്കടകടലിലാക്കിയിരിക്കുകയാണ്.

ദിണ്ടിഗല്‍പളനി റോഡില്‍ പണൈപ്പട്ടി എന്ന സ്ഥലത്ത് വെള്ളിയാഴ്ച പുലര്‍ച്ചെയാണ് തിരുവനന്തപുരത്തുനിന്ന് തീര്‍ഥാടനത്തിന് പോയ സംഘം സഞ്ചരിച്ച കാര്‍ ബസുമായി ഇടിച്ച് അപകടമുണ്ടാകുന്നത്. ശൈലജ, ഒന്നരവയസ്സുള്ള ആരവ്, ജയ എന്നിവരാണ് മരിച്ചത്. കാറിലുണ്ടായിരുന്ന മറ്റു എട്ടുപേര്‍ പരിക്കുകളോടെ ആശുപത്രിയിലാണ്.

ട്രെയിന്‍ മാര്‍ഗം പഴനിയിലേക്ക് പോകാനായിരുന്നു കുടുംബത്തിന്റെ ആദ്യ തീരുമാനമെന്ന് നാട്ടുകാര്‍ പറയുന്നു. എന്നാല്‍ തിരക്കുകാരണം ടിക്കറ്റ് കിട്ടാഞ്ഞതിനാല്‍ യാത്ര ഉപേക്ഷിച്ചു. പിന്നീടാണ് കാര്‍ മാര്‍ഗം പോകാമെന്ന തീരുമാനമെടുത്ത്. കാര്‍ വാടകക്കെടുത്തായിരുന്നു യാത്ര. സംഘത്തിലുണ്ടായിരുന്നവരെല്ലാം ബന്ധുക്കളാണ്. വ്യാഴാഴ്ച രാത്രി 11 ഓടെയാണ് സംഘം യാത്ര തിരിച്ചത്.

ഓണത്തിന് കുടുംബാംഗങ്ങളെല്ലാം ഒത്തുചേര്‍ന്നതിന്റെയും ഒപ്പം തീര്‍ഥാടനത്തിന്റെയും സന്തോഷത്തിലായിരുന്നു കുടുംബം. അഭിജിത്ത്‌സംഗീത ദമ്ബതികള്‍ക്ക് മൂന്നരവര്‍ഷത്തെ കാത്തിരിപ്പിനുശേഷം ജനിച്ച കുഞ്ഞാണ് ആരവെന്ന് ബന്ധുക്കള്‍ പറയുന്നു. അതുകൊണ്ട് തന്നെ പഴനിയിലെത്തി മുടി കളയാമെന്ന് നേര്‍ച്ച നേര്‍ന്നിരുന്നു.

ഇത് നിറവേറ്റാണുള്ള യാത്രയാണ് നാടിനെയാകെ നൊമ്ബരത്തിലാഴ്ത്തിയത്. യാത്രാമധ്യേ വാഹനത്തിന്റെ ടയര്‍ പൊട്ടി ഡിവൈഡര്‍ മറികടന്ന് എതിരെ വന്ന ബസില്‍ ഇടിക്കുകയായിരുന്നു. ഇതിനുശേഷം ദിശ തിരിഞ്ഞ കാര്‍ റോഡിലെ ഡിവൈഡറില്‍ ഇടിച്ച് മറിഞ്ഞു. കാറിന്റെ മുന്‍ഭാഗം പൂര്‍ണമായും തകര്‍ന്നു. മൃതദേഹങ്ങള്‍ ശനിയാഴ്ച നാട്ടിലെത്തിക്കുമെന്നാണ് വിവരം.