ഓണത്തിനിടയില്‍ നിരവധി വാഹനാപകടങ്ങളാണ് ഉണ്ടായത്. തമിഴ്‌നാട്ടില്‍ 4 മലയാളികള്‍ മരിച്ചതിന്റെ ഞെട്ടല്‍ മാറും മുമ്പ് കേരളത്തിലും നിരവധി അപകടങ്ങള്‍. തിരുവനന്തപുരം കഴക്കൂട്ടത്ത് കാറും ബൈക്കും കൂട്ടിയിടിച്ചുണ്ടായ അപകടത്തില്‍ യുവാവിന് ദാരുണാന്ത്യം. വെഞ്ഞാറമൂട് ആലിയാട് സ്വദേശിയായ വിഷ്ണുവാണ് മരിച്ചത്. കഴക്കൂട്ടം സൈനിക സ്‌ക്കൂളിനു സമീപം രാത്രി ഒന്‍പത് മണിയോടെയാണ് അപകടമുണ്ടായത്.

അമിത വേഗതയിലെത്തിയ ബൈക്ക് കാറിലിടിച്ചതിന്റെ ആഘാതത്തില്‍ കത്തിപ്പോയി. യുവാവ് സംഭവ സ്ഥലത്ത് വെച്ച് തന്നെ മരിച്ചു. അമിത വേഗതയിലെത്തിയ ബൈക്ക് എതിര്‍ വശത്തുകൂടി വരികയായിരുന്ന കാറില്‍ ഇടിച്ചു കയറുകയായിരുന്നുവെന്നാണ് ദൃക്‌സാക്ഷികള്‍ അറിയിച്ചത്. കാറിലുള്ളവര്‍ക്ക് പരിക്കില്ല. വാഹനത്തിന് തീപിടിച്ചതോടെ രക്ഷാ പ്രവര്‍ത്തനവും ദുസ്സഹമായി.

അതേസമയം നായ കുറുകെച്ചാടിയതിനെത്തുടര്‍ന്ന് നിയന്ത്രണം വിട്ട ഗുഡ്‌സ് ഓട്ടോറിക്ഷ മറിഞ്ഞുണ്ടായ അപകടത്തില്‍ യുവാവ് മരിച്ചു. മലപ്പുറം ഐക്കരപ്പടി സൗരവാണ് മരിച്ചത്. ഓട്ടോ ഓടിച്ചിരുന്ന കാരാട്പറമ്പ് രാഹുല്‍ ശങ്കറിനെ പരുക്കുകളോടെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.

മലപ്പുറം കാരാട് പറമ്പ് സ്ഥാനാര്‍ത്ഥി പടിയില്‍ ഇന്ന് പുലര്‍ച്ചെ അഞ്ച് മണിയോടെയാണ് അപകടമുണ്ടായത്. നായ കുറുകെ ചാടിയതോടെ നിയന്ത്രണം വിട്ട ഓട്ടോറിക്ഷ സമീപത്തെ വീടിന്റെ ഗേറ്റിന് ഇടിച്ചു മറിയുകയായിരുന്നു. ഡെക്കറേഷന്‍ ജോലി ചെയ്യുന്ന തൊഴിലാളികളായ ഇരുവരും ജോലി കഴിഞ്ഞ് മടങ്ങും വഴിയായിരുന്നു അപകടം.

കഴിഞ്ഞ ദിവസം തമിഴ്‌നാട്ടിലെ ദിണ്ഡിഗലില്‍ കാറും ബസും കൂട്ടിയിടിച്ച് തിരുവനന്തപുരം സ്വദേശികളായ ഒരു കുടുംബത്തിലെ നാലുപേര്‍ മരിച്ചിരുന്നു. ചെറുമകന്റെ മുടികളയാന്‍ പളനിയിലേക്ക് പോയ 11 അംഗ സംഘം സഞ്ചരിച്ച ഇന്നോവയാണ് അപകടത്തില്‍പ്പെട്ടത്.

കുര്യാത്തി റൊട്ടിക്കട സ്വദേശി അശോകന്‍, ഭാര്യ ശൈലജ, കൊച്ചുമകന്‍ ഒന്നരവയസുള്ള ആരവ്, അശോകന്റെ മകന്‍ അഭിജിത്തിന്റെ അമ്മായിയമ്മ ജയ എന്നിവരാണ് മരിച്ചത്. രാവിലെ ഏഴരയോടെയായിരുന്നു അപകടം. ഡിവൈഡറില്‍ ഇടിച്ച് ടയര്‍ പൊട്ടിത്തെറിച്ച് പലതവണ കീഴ്‌മേല്‍ മറിഞ്ഞ് എതിരേ വന്ന ബസില്‍ കാര്‍ ഇടിച്ചെന്നാണ് പ്രാഥമിക നിഗമനം. ആരവിന്റെ മുടി കളയാന്‍ പളനിയിലേക്ക് 11 അംഗ സംഘം യാത്ര തിരിച്ചത് എട്ടിന് രാത്രി ഒമ്പതരയോടെ ഇന്നോവ ടാക്‌സിയിലാണ്.

അഭിജിത്തിനും ഭാര്യ സംഗീതയ്ക്കും മൂന്നരവര്‍ഷത്തിന് ശേഷമാണ് കുഞ്ഞുണ്ടായത്. അമ്പലങ്ങളില്‍ അന്നദാനവും നേര്‍ച്ചയും നടത്തി കാത്തിരുന്നു കിട്ടിയ മകന്റെ മുടി കളയാന്‍ പളനിയില്‍ കൊണ്ടുപോകുമ്പോഴാണ് അപകടമുണ്ടായത്.

അതേസമയം പാറശ്ശാലയില്‍ കുറുംങ്കുട്ടി ചെക്‌പോസ്റ്റിന് സമീപമുണ്ടായ വാഹനാപകടത്തില്‍ മൂന്ന് പേര്‍ക്ക് പരിക്ക്. യാത്രാ പാസിനായി നിര്‍ത്തിയിട്ടിരുന്ന ട്രാവലറിന് പിറകില്‍ കാര്‍ ഇടിച്ചാണ് പുലര്‍ച്ചെ മൂന്നരയ്ക്ക് അപകമുണ്ടായത്. ഗള്‍ഫില്‍ ജോലിചെയ്യുന്ന മകനെ വിമാനത്താവളത്തില്‍ കൊണ്ട് വിട്ട് മടങ്ങവെയാണ് കുടുംബത്തിലെ മൂന്ന് പേര്‍ അപകടത്തില്‍പ്പെട്ടത്. നാഗര്‍കോവില്‍ സ്വദേശികളായ ഷാഹുല്‍ ഹമീദ്, ഭാര്യ ഷക്കീന, മകന്‍ അബ്ദുറഹ്മാന്‍ എന്നിവര്‍ക്കാണ് പരിക്കേറ്റത്. മൂന്ന് പേരെയും തിരുവനന്തപുരം മെഡിക്കല്‍ കോളേജില്‍ പ്രവേശിപ്പിച്ചു. അബ്ദുറഹ്മാന്റെ ആരോഗ്യനില ഗുരുതരമാണ്. ഇടിയില്‍ കാറിന്റെ മുന്‍വശം തകര്‍ന്നു. കാര്‍ ഓടിച്ചിരുന്ന അബ്ദുള്‍ ഹമീദ് ഉറങ്ങിപ്പോയതോ ചെക്‌പോസ്റ്റിലെ വെളിച്ച കുറവും, ചാറ്റല്‍ മഴയുമോ ആകാം അപകട കാരണമെന്നുമാണ് പ്രാഥമിക നിഗമനം.