കണ്ണീരടക്കാനാവാതെ.... പഴനിയില്‍ ദര്‍ശനത്തിനായി പോയ പതിനൊന്നംഗ സംഘം സഞ്ചരിച്ച ഇന്നോവ കാര്‍ തമിഴ്‌നാട്ടിലെ ഡിണ്ടിഗലിന് സമീപം ബസ്സുമായി കൂട്ടിയിടിച്ച് പിഞ്ചുകുഞ്ഞടക്കം ഒരു കുടുംബത്തിലെ മൂന്നുപേര്‍ക്ക് ദാരുണാന്ത്യം. എട്ടു പേര്‍ക്ക് പരിക്കേറ്റു.


മണക്കാട് കുര്യാത്തി റൊട്ടിക്കടമുക്ക് പണയില്‍വീട്ടില്‍ അശോകന്റെ ഭാര്യ ശൈലജ (48), മകന്‍ അഭിജിത്തിന്റെ ഒന്നരവയസ്സുള്ള മകന്‍ ആരവ്, അഭിജിത്തിന്റെ ഭാര്യ സംഗീതയുടെ അമ്മയും ലാകോളേജ് ജീവനക്കാരിയുമായ ജയ (52) എന്നിവരാണ് മരിച്ചത്. ഡിണ്ടിഗല്‍ -പഴനി റോഡില്‍ പണ്ണൈപ്പട്ടിയില്‍ ഇന്നലെ രാവിലെ എട്ടിനായിരുന്നു അപകടമുണ്ടായത്.


ആരവിന്റെ മുടിയെടുക്കുന്നതിനാണ് കുടുംബം പഴനിയിലേക്ക് പോയത്. കാറിന്റെ മുന്നിലെ വലതുഭാഗത്തുള്ള ടയര്‍ പഞ്ചറായതാണ് അപകടത്തിന് കാരണമായത്.

നിയന്ത്രണം വിട്ട കാര്‍ നാലുവരി റോഡിന്റെ മറുഭാഗത്ത് തമിഴ്‌നാട് ട്രാന്‍സ്പോര്‍ട്ട് ബസ്സിലിടിച്ച് തിരിഞ്ഞ് ഡിവൈഡറില്‍ ഇടിച്ച് മറിഞ്ഞു. കാറിന്റെ മുന്‍ഭാഗം പൂര്‍ണമായും തകര്‍ന്നു. ബസ്സിന്റെ മുന്‍വശവും തകര്‍ന്നു. ഓടിക്കൂടിയ നാട്ടുകാരാണ് ഡോര്‍ തകര്‍ത്ത് ഉള്ളിലുള്ളവരെ പുറത്തെടുത്തത്. മൂന്നുപേരും സംഭവസ്ഥലത്തു തന്നെ മരിച്ചിരുന്നു.

അശോകന്‍ (62), മക്കളായ അഭിജിത്ത് (28), അനീഷ് (26), ആദര്‍ശ് (24), അഭിജിത്തിന്റെ ഭാര്യ സംഗീത (27), മരിച്ച ജയയുടെ ചെറുമകന്‍ സിദ്ധാര്‍ത്ഥ് (9), മണക്കാട് കെ.എന്‍.മണി റോഡില്‍ ദേവന്‍ (20), ഡ്രൈവര്‍ കണ്ണന്‍ എന്നിവരെ കന്നിവാടി പൊലീസും അഗ്‌നിരക്ഷാസേനയുമെത്തി മധുര, ഡിണ്ടിഗല്‍ മെഡിക്കല്‍ കോളേജ് ആശുപത്രികളില്‍ പ്രവേശിപ്പിച്ചു. മൃതദേഹങ്ങള്‍ ഇന്ന് പോസ്റ്റുമോര്‍ട്ടം പൂര്‍ത്തിയാക്കി നാട്ടിലെത്തിക്കും.