കേരളത്തിൽ സർക്കാരും പാർട്ടിയും കടുത്ത വിമർശനത്തിലൂടെയും സമ്മർദ്ദത്തിലൂടെയും കടന്നു പോകുമ്പോൾ മാധ്യമനിയന്ത്രണ വ്യവസ്ഥകള്‍ വീണ്ടും കൊണ്ടുവരാന്‍ സംസ്ഥാനസര്‍ക്കാര്‍ നീക്കം. ഇതിനായി വിമർശനങ്ങളെത്തുടർന്ന് പിൻവലിക്കേണ്ടിവന്ന പോലീസ് നിയമഭേദഗതിയിലെ മാധ്യമനിയന്ത്രണ വ്യവസ്ഥകൾ വീണ്ടും കൊണ്ടുവരാനാണ് സർക്കാർ നീക്കം. നേരത്തേ പിൻവലിച്ച അതേ വ്യവസ്ഥകളാണ് പുതിയ നിയമത്തിലുമുള്ളത്. ഈ നിയമം പ്രാബല്യത്തിലാക്കാൻ ഇന്ത്യൻ പീനൽ കോഡ് നിയമം ഭേദഗതിചെയ്യാനുള്ള ബിൽ തയ്യാറാക്കി കഴിഞ്ഞു.

ആരെയെങ്കിലും ഭീഷണിപ്പെടുത്താനോ, അപമാനിക്കാനോ, അപകീർത്തിപ്പെടുത്താനോ ഉദ്ദേശിച്ച് ഏതെങ്കിലും വിനിമയ ഉപാധികളിലൂടെ ഉള്ളടക്കം നിർമിക്കുകയോ, പ്രസിദ്ധീകരിക്കുകയോ ചെയ്യുന്നത് ശിക്ഷാർഹമാകുമെന്നാണ് പുതിയ വ്യവസ്ഥ. ഐ.പി.സി. 292-ാം വകുപ്പ് ഭേദഗതിചെയ്ത് 292 എ എന്ന വകുപ്പായാണ് പുതിയ ഭേദഗതി കൊണ്ടുവരുന്നത്. രണ്ടുവർഷംമുമ്പ് പോലീസ് നിയമത്തിലെ 118 എ വകുപ്പായി സൈബർ ആക്രമണങ്ങൾ തടയാനെന്നപേരിലാണ് ഇതുകൊണ്ടുവന്നത്. എന്നാൽ മാധ്യമ വാർത്തകൾക്കെതിരേയും ഈ നിയമം പ്രയോഗിക്കാമെന്ന വിമശനം ഉയർന്നതിനെതുടർന്ന് പിൻവലിക്കേണ്ടിവന്നു. ഓർഡിനൻസായി കൊണ്ടുവന്ന നിയമം മറ്റൊരു ഓർഡിനൻസ് കൊണ്ടുവന്നു പിൻവലിക്കേണ്ടിവന്ന അപൂർവതയും അന്നുണ്ടായി.

2000-ലെ ഐ.ടി. നിയമത്തിലെ 66 എ വകുപ്പും 2011-ലെ പോലീസ് നിയമത്തിലെ 118 ഡി വകുപ്പും അഭിപ്രായസ്വാതന്ത്ര്യത്തിന് എതിരാണെന്നു കണ്ട് സുപ്രീംകോടതി റദ്ദാക്കിയിരുന്നു. ഈ വിധിയെ മറികടക്കാനാണ് പോലീസ് നിയമഭേദഗതിക്ക് സർക്കാർ ശ്രമിച്ചത്.

നിയമവകുപ്പ് തയാറാക്കിയ ബില്ലാണ് മന്ത്രിസഭയുടെ പരിഗണനയിലുള്ളത്. കുറ്റകൃത്യം സംബന്ധിച്ച വിഷയം സമാവർത്തി പട്ടികയിലായതിനാൽ സംസ്ഥാനത്തിന് നിയമനിർമാണം നടത്താമെന്നാണ് നിയമവകുപ്പിന്റെ ശുപാർശ. ബില്ലിലെ വ്യവസ്ഥകൾ ഐ.പി.സി.ക്കും കോഡ് ഓഫ് ക്രിമിനൽ പ്രോസീജറിനും വിരുദ്ധമാകുമെന്നതിനാൽ ബിൽ സഭ പാസാക്കി രാഷ്ട്രപതിയുടെ അംഗീകാരത്തിന് അയക്കണമെന്നും നിയമവകുപ്പ് ശുപാർശചെയ്തു.

അശ്ലീലവും അപമാനകരവുമായതോ, ബ്ലാക്‌മെയിൽ ചെയ്യാനുള്ളതോ ആയ ഉള്ളടക്കമോ, ചിത്രമോ ഏതെങ്കിലും ദിനപത്രം, ആനുകാലിക പ്രസിദ്ധീകരണങ്ങൾ, സർക്കുലർ എന്നിവയിൽ അച്ചടിക്കുകയോ, അച്ചടിക്കാൻ ഉദ്ദേശിച്ച് തയാറാക്കുകയോ പൊതുജനങ്ങൾക്ക് കാണുംവിധം പ്രദർശിപ്പിക്കുകയോ, വിതരണം നടത്തുകയോ ചെയ്യുന്നത് 292 എ വകുപ്പുപ്രകാരം കുറ്റകരമാണെന്നാണ് നിർദേശിച്ചിരിക്കുന്ന ഭേദഗതി.

സാമൂഹികമാധ്യമങ്ങളും ഈ നിയമത്തിന്റെ പരിധിയിൽവരും. ചിത്രങ്ങളും ഉള്ളടക്കവും ഉപയോഗിച്ച് ഭീഷണിപ്പെടുത്തുക, അവ കൈമാറ്റംചെയ്യുക, സാമ്പത്തിക നേട്ടമുണ്ടാക്കുക, പ്രസിദ്ധപ്പെടുത്തുക, അവയ്ക്ക് പരസ്യംനൽകുക എന്നിവയും കുറ്റകരമാണ്. ഇത്തരം കുറ്റകൃത്യങ്ങൾക്ക് രണ്ടുവർഷം തടവോ, പിഴയോ, രണ്ടുംകൂടിയോ ലഭിക്കാം.