തലസ്ഥാന നഗരത്തില്‍ പട്ടാപ്പകല്‍ യുവാവിനെ ഇഷ്ടിക കൊണ്ട് ആക്രമിച്ച് ബൈക്കും സ്വര്‍ണ്ണമാലയും ടച്ച് മൊബൈല്‍ ഫോണും കവര്‍ന്ന സിറ്റി ഫോര്‍ട്ട് ശ്രീവരാഹം കവര്‍ച്ചാ കേസില്‍ 4 പ്രതികള്‍ക്ക് മുന്‍കൂര്‍ ജാമ്യം നിരസിച്ചു. തിരുവനന്തപുരം അഡീ. ജില്ലാ സെഷന്‍സ് കോടതിയാണ് പ്രതികള്‍ക്ക് ജാമ്യം നിഷേധിച്ചത്. കവര്‍ച്ചാ കേസില്‍ 1 മുതല്‍ 4 വരെ പ്രതികളായ മുക്കോലക്കല്‍ സാദേശി പ്രകാശ് കുമാര്‍ (50) , ശ്രീവരാഹം സ്വദേശി അജിത് (23) , സംഗമ നഗര്‍ സ്വദേശി മനു (23) , ശ്രീവരാഹം സ്വദേശി അനന്തപത്മനാഭന്‍ (23) എന്നിവരുടെ ജാമ്യഹര്‍ജികളാണ് തള്ളിയത്.


2022 ജൂലൈ 6 ന് ശ്രീവരാഹത്ത് വച്ച് രാവിലെ 9.30 മണിക്കാണ് ദേഹോപദ്രവം ചെയ്തുള്ള പിടിച്ചുപറി സംഭവം നടന്നത്. 1 മുതല്‍ 4 വരെ പ്രതികള്‍ വാദിക്കെതിരെ കുറ്റകൃത്യം ചെയ്യണമെന്ന പൊതു ഉദ്ദേശ്യകാര്യ സാദ്ധ്യത്തിനായി ആവലാതിക്കാരനെ തടഞ്ഞു നിര്‍ത്തി അസഭ്യവാക്കുകള്‍ വിളിക്കുകയും ഒന്നാം പ്രതി കൈമുറുക്കി നെഞ്ചില്‍ ഇടിക്കുകയും ഇഷ്ടിക കൊണ്ട് ഇടിക്കുകയും ചെയ്തു.


2 മുതല്‍ 4 വരെ പ്രതികള്‍ നെഞ്ചിലും മുതുകിലും അടിവയറ്റിലും കൈ മുറുക്കി ഇടിക്കുകയും തുടര്‍ന്ന് എല്ലാവരും ചേര്‍ന്ന് ബലം പ്രയോഗിച്ച് ആവലാതിക്കാരന്റെ കെ എല്‍ 01- സിഡി - 2476 നമ്പര്‍ മോട്ടോര്‍ സൈക്കിള്‍ , ഒരു പവന്‍ സ്വര്‍ണ്ണമാല , ടച്ച് മൊബൈല്‍ ഫോണ്‍ എന്നിവ പിടിച്ചു പറിച്ചു കൊണ്ടുപോയി കൃത്യത്തിന് പരസ്പരം ഉത്സാഹികളും സഹായികളുമായി നിന്ന് പ്രവര്‍ത്തിച്ചെന്നാണ് കേസ്.


ഫോര്‍ട്ട് പോലീസ് റിപ്പോര്‍ട്ടും കേസ് ഡയറിയും പരിശോധിച്ച കോടതി പ്രതികള്‍ക്കെതിരായ കവര്‍ച്ചാ ആരോപണം അത്യന്തം ഗൗരവമേറിയതാണെന്ന് വിലയിരുത്തി. പ്രതികളെ ജാമ്യത്തില്‍ വിട്ടയച്ചാല്‍ കുറ്റകൃത്യം ആവര്‍ത്തിക്കാനുള്ള സാധ്യതയുണ്ട്. രണ്ടാം പ്രതിക്ക് ക്രിമിനല്‍ പശ്ചാത്തലമുള്ളതും ഫോര്‍ട്ട് സ്റ്റേഷനിലെ 3 കിമിനല്‍ കേസുകളില്‍ പ്രതിയുമാണ്. അന്വേഷണം പ്രാരംഭ ദിശയിലാണ്.


സ്വര്‍ണ്ണമാലയും ടച്ച് ഫോണും വീണ്ടെടുക്കേണ്ടതുണ്ട്. ജൂലൈ 9 ന് കൃത്യ സ്ഥലത്ത് ഉപേക്ഷിച്ച നിലയില്‍ മോട്ടോര്‍ സൈക്കിള്‍ പോലീസ് പിടിച്ചെടുത്തിട്ടുണ്ട്. എന്നാല്‍ മോഷ്ടിച്ച 2 വകകള്‍ വീണ്ടെടുക്കേണ്ട ഗൗരവമേറിയ കവര്‍ച്ച കേസില്‍ അന്വേഷണം പുരോഗമിക്കുന്ന ഘട്ടത്തില്‍ ജാമ്യം അനുവദിക്കുന്നത് ഉചിതമല്ല. 4 പ്രതികളും ഗ്യാംഗായി കൃത്യ സ്ഥലത്ത് എത്തിയത് കുറ്റകൃത്യത്തിന്റെ സ്വഭാവവും കഠിന്യവും പ്രഥമദൃഷ്ട്യാ വെളിവാക്കുന്നതും ഇത്തരം കേസുകളില്‍ ജാമ്യം നല്‍കുന്നത് ശരിയല്ലെന്നും നിരീക്ഷിച്ചാണ് ജാമ്യ ഹര്‍ജി തള്ളി ഉത്തരവായത്.