മണ്ഡലകാല തീര്‍ത്ഥാടനത്തിനൊരുങ്ങി ശബരിമല.... മണ്ഡല പൂജയ്ക്ക് പൊന്നമ്പല നട 16ന് വൈകിട്ട് തുറക്കും.... വെര്‍ച്വല്‍ ബുക്കിംഗ് നിര്‍ബന്ധം, ശബരിമല പാതകളില്‍ ശരണം വിളി മുഴങ്ങാന്‍ ദിവസങ്ങള്‍ മാത്രം.....

ഈ വര്‍ഷത്തെ മണ്ഡല, മകരവിളക്ക് മഹോത്സവത്തിന് ശബരിമലയില്‍ ഒരുക്കങ്ങള്‍ പൂര്‍ത്തിയായി വരുന്നതായി തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് .

16ന് വൈകിട്ട് 5ന് നട തുറക്കും. വൃശ്ചികം ഒന്നായ 17 മുതല്‍ ഡിസംബര്‍ 27 വരെയാണ് മണ്ഡലകാലം. ജനുവരി 14നാണ് മകരവിളക്ക്. തീര്‍ത്ഥാടകര്‍ക്ക് വെര്‍ച്വല്‍ ബുക്കിംഗ് നിര്‍ബന്ധം. ഓണ്‍ലൈനില്‍ ബുക്കിംഗ് സാധിക്കാത്തവര്‍ക്ക് വിവിധ ജില്ലകളില്‍ 13 കേന്ദ്രങ്ങളിലായി 24 മണിക്കൂറും സ്‌പോട്ട് ബുക്കിംഗ് സംവിധാനമുണ്ടാവും. കണ്ണൂര്‍, പാലക്കാട് എന്നിവിടങ്ങളിലും സ്‌പോട്ട് ബുക്കിംഗ് തുടങ്ങുന്നത് ആലോചനയിലാണ്. എരുമേലി വഴി തീര്‍ത്ഥാടനം അനുവദിക്കും.


കൊവിഡ് ഭീതി ഒഴിഞ്ഞതിനാല്‍ തീര്‍ത്ഥാടകരുടെ എണ്ണം നിയന്ത്രിക്കുന്നതിനുള്ള പരിധി ഒഴിവാക്കിയിട്ടുണ്ട്. അരവണ നിര്‍മ്മാണം ആരംഭിച്ചു. കുടിവെള്ളം, വിരി വയ്ക്കാനുളള സൗകര്യം, അന്നദാന വിതരണം, ടോയ്‌ലറ്റ് സൗകര്യം, താമസത്തിനുള്ള മുറികള്‍ എന്നിവയെല്ലാം സജ്ജമാണ്. ശബരിമലയെ പ്ലാസ്റ്റിക് മുക്തമാക്കാന്‍ നടപടി സ്വീകരിക്കും.15 സീറ്റിന് താഴെയുള്ള വാഹനങ്ങള്‍ പമ്പയിലേയ്ക്ക് കടത്തി വിടും. എന്നാല്‍, അവിടെ പാര്‍ക്കിംഗ് അനുവദിക്കില്ല. കെ.എസ്.ആര്‍.ടി.സി 500 ബസുകള്‍ ഓടിക്കും. കൂട്ടമായി എത്തുന്നവര്‍ക്ക് ഗ്രൂപ്പ് ബുക്കിംഗ് ഏര്‍പ്പെടുത്തും. പമ്പ, നിലയ്ക്കല്‍ എന്നിവിടങ്ങളില്‍ 11ന് രണ്ടാംഘട്ട ക്ലീനിംഗ് നടത്തും.


അതേസമയം കൊവിഡിന് ശേഷം തീര്‍ത്ഥാടനം പൂര്‍ണതോതില്‍ പുനരാരംഭിക്കുമ്പോള്‍ ഭക്തജന പ്രവാഹമാണ് സര്‍ക്കാരും ദേവസ്വം ബോര്‍ഡും പ്രതീക്ഷിക്കുന്നത്.