കേന്ദ്രത്തില് പറ്റിയ പറ്റുതന്നെ കോണ്ഗ്രസിന് കേരളത്തിലും; പിണറായി വിജയന്റെയും ഇടതുസര്ക്കാരിന്റെയും അനന്തമായ ജനവിരുദ്ധ നയങ്ങള്ക്കെതിരെ ആഞ്ഞടിക്കാനുള്ള ത്രാണി പ്രതിപക്ഷമായ കോണ്ഗ്രസിനില്ലാതെ പോയി, തിരുവനന്തപുരം കോര്പറേഷനിലെ സിപിഎം തന്നിഷ്ടനിയമനം വരെയുള്ള എണ്ണമറ്റ സംഭവങ്ങളില് ഒന്നില്പ്പോലും ജനങ്ങളെ ഇളക്കിമറിക്കാനുള്ള ആക്കവും തൂക്കവും വിഡി സതീശനും കെ സുധാകരനും ഇല്ല
കേന്ദ്രത്തില് പറ്റിയ പറ്റുതന്നെ കോണ്ഗ്രസിന് കേരളത്തിലും സംഭവിച്ചുകൊണ്ടിരിക്കുന്നു. പിണറായി വിജയന്റെയും ഇടതുസര്ക്കാരിന്റെയും അനന്തമായ ജനവിരുദ്ധ നയങ്ങള്ക്കെതിരെ ആഞ്ഞടിക്കാനുള്ള ത്രാണി പ്രതിപക്ഷമായ കോണ്ഗ്രസിനില്ലാതെ പോയി. തിരുവനന്തപുരം കോര്പറേഷനിലെ സിപിഎം തന്നിഷ്ടനിയമനം വരെയുള്ള എണ്ണമറ്റ സംഭവങ്ങളില് ഒന്നില്പ്പോലും ജനങ്ങളെ ഇളക്കിമറിക്കാനുള്ള ആക്കവും തൂക്കവും വിഡി സതീശനും കെ സുധാകരനും ഇല്ലാതെ പോയി.
രാഷ്ട്രീയചതുരംഗക്കളിയില് ഒതുങ്ങിപ്പോയ രമേശ് ചെന്നിത്തല കുറെക്കാലമായി നിര്വികാരനായി പാര്ട്ടിയില് ഒതുങ്ങിനില്ക്കുന്നു. കെ മുരളീധരനും കുറെക്കാലമായി കളത്തിനു പുറത്തു നിന്ന് ഒറ്റയാനായാണ് കളി തുടരുന്നത്.എകെ ആന്റണി വിശ്രമത്തിലേക്കും ഉമ്മന് ചാണ്ടി ചികിത്സയിലേക്കും മാറിയതോടെ പ്രതിപക്ഷനേതാവ് എന്നു പറയാനൊരു തുര്ക്കി കോണ്ഗ്രസിനില്ലാതെ പോയി. പി.ടി തോമസ് എന്ന ചീറ്റപ്പുലി അകാലത്തില് കൊഴിഞ്ഞതും കോണ്ഗ്രസിന് വന്നഷ്ടമായി.
തിരുവനന്തപുരം കോര്പറേഷനിലെ ജോലി തസ്തികകളില് കറതീര്ന്ന വിശ്വസ്ത സഖാക്കളെ തിരുകിക്കയറ്റി എക്കാലത്തും നഗരഭരണത്തിന്റെ ഫയലുകള് ചെങ്കൊടിയില് പൊതിഞ്ഞുകെട്ടാനുള്ള പാര്ട്ടിനീക്കത്തില് ബിജെപി നടത്തിയ പ്രതിഷേധത്തിന്റെ തലം പോലും കോണ്ഗ്രസില് നിന്നുണ്ടായില്ല. സിപിഎം പോലും ഇതിനെക്കാള് വലിയ പ്രതിഷേധം ഉയരുമെന്ന ആശങ്കയില് നില്ക്കുമ്പോഴാണ് കോണ്ഗ്രസ് ഞങ്ങള്ക്കിതൊന്നും വലിയ വിഷയമല്ലെന്ന മട്ടില് മാളത്തില് ഒളിച്ചിരിക്കുന്നത്. പേരിനു മാത്രമൊരു പ്രതിഷേധമല്ലാതെ കോണ്ഗ്രസിന്റെ നേതൃത്വം നാണംകെട്ട നിര്വികാരതയില് മുന്നോട്ടുപോവുകയാണ്.
പിണറായി വിജയനെയും ഇടതുഭരണത്തെയും ഇന്ന് അല്പമെങ്കിലും വിറപ്പിക്കുന്നുണ്ടെങ്കില് അത് സ്വപ്നാ സുരേഷും പിന്നെ സംസ്ഥാന ഗവര്ണര് ആരിഫ് മുഹമ്മദ് ഖാനുമാണ്. വലിയൊരളവോളം കേരളത്തില് പ്രതിപക്ഷം ആരെന്നു ചോദിച്ചാല് ഈയിടയായി ഉത്തര് പ്രദേശില് നിന്ന് കേരളത്തിലെത്തി സഖാക്കളെ വിറപ്പിക്കുന്ന ആരിഫ് മുഹമ്മദ് ഖാന് എന്നു പറയേണ്ടിവരും. സര്വകലാശാലാ നിയമനങ്ങളില് മാത്രമല്ല കേരളത്തിലെ ഇടതുഭരണം വട്ടപ്പൂജ്യമാണെന്നും പറയാനുള്ള ചങ്കൂറ്റം ആരിഫിനു മാത്രമേയുണ്ടായുള്ളു. സ്വര്ണക്കള്ളക്കടത്ത്, മുഖ്യമന്ത്രിയുടെ കുടുംബത്തിന്റെ അനധികൃത സാമ്പത്തിക ഇടപാടുകള്, ദുബായ് ആസ്ഥാനമായ ബിസിനസ് എന്നിവയൊക്കെ അക്കമിട്ടു നിരത്താന് സ്വപ്നാ സുരേഷ് കാണിച്ച ആര്ജവത്തംപോലും കോണ്ഗ്രസിനില്ല. സ്വപ്നയ്ക്ക് ശക്തി പകരുന്നത് ബിജെപിയാണെന്ന ഏക കാരണത്താല് കോണ്ഗ്രസിന് സ്വപ്ന ചതുര്ഥിയായി.
മുന്പൊരു സരിതയെ കളത്തിലിറങ്ങി ആളും ആര്ഥവും നല്കി സിപിഎം ഉമ്മന് ചാണ്ടിയെ മാത്രമല്ല യുഡിഎഫ് ഭരണംതന്നെ തകര്ത്തുതരിപ്പണമാക്കി. അതേ ഡോസില് പിണറായിയെ തരിപ്പണമാക്കാനുള്ള സര്വ തെളിവുകളും നാക്കും സ്വന്തമായുള്ള സ്വപ്നയ്ക്ക് കരുതലാകേന് കോണ്ഗ്രസ് നേതാക്കള്ക്ക് കഴിയാതെ പോയി. എന്തിനേറെ സ്വപ്ന പി ശ്രീരാമകൃഷ്ണന്, കടകംപള്ളി സുരേന്ദ്രന്, തോമസ് ഐസക് തുടങ്ങിയ തലമൂത്തു നരച്ച സഖാക്കള്ക്കളുടെ തനിനിറം വെളിപ്പെടുത്തിയ വേളയില്പോലും കമാന്ന് ഒരക്ഷരം ഉരിയാടാനുള്ള നേരും നെറിവും പ്രതിപക്ഷത്തെ വീരശൂരപരാക്രമികള്ക്കില്ലാതെപോയി.
സര്കലാശാലകളിലും കോളജുകളിലും സിപിഎമ്മിലെ യുവനേതാതാക്കളുടെ അയോഗ്യരായ ഭാര്യമാരെ ലക്ഷം ശമ്പളമുള്ള തസ്തികകളില് ഒട്ടിച്ചുചേര്ത്തവേളയില്പോലും വേണ്ടവിധം നാവനക്കാന് കോണ്ഗ്രസിനായില്ല. ചത്ത കുതിരപോലെയായ കോണ്ഗ്രസിലെ നേതാക്കള്ക്കുണ്ടായ നിശ്ചലാവസ്ഥയാണ് അണികളെ ഈ പാര്ട്ടിയില്നിന്ന് അകറ്റിക്കൊണ്ടിരിക്കുന്നത്. ഒരു പഞ്ചായത്ത് വാര്ഡില്പോലും ജയിക്കാന്ഡ സാധിക്കാത്ത വിധം അണികളില്ലാത്ത പാര്ട്ടിയായി കോണ്ഗ്രസ് ശോഷിക്കുകയും ചെയ്തു. ഒരു കൊല്ലത്തിനുള്ളില് ലോക്സഭാ തെരഞ്ഞെടുപ്പ് വരാനിരിക്കെ അണികളെ ശക്തിപ്പെടുത്താതെ കേരളത്തില് കോണ്ഗ്രസിനു രക്ഷയില്ല. നിലവിലെ സാഹചര്യത്തില് അഞ്ചോ ആറോ ലോക്സഭാ സീറ്റുകളിലേക്ക് ചുരുങ്ങുന്ന വിധം കേരളത്തില് കോണ്ഗ്രസ് ദുര്ബലപ്പെട്ടുകഴിഞ്ഞു.
വാര്ഡുതലത്തില് ഒരു യോഗം വിളിച്ചാല് അഞ്ചു പേരെ പോലും കിട്ടാനാവാത്തവിധം ദുര്ബലമാണിന്ന് കോണ്ഗ്രസ്. ബ്ലോക്ക്, ജില്ലാതല സമ്മേളനങ്ങള് നടന്നിട്ട് ഏറെക്കാലം പിന്നിടുന്നു. സ്ഥാനമാനങ്ങള്ക്കായുള്ള നേതാക്കളുടെ ഗുസ്തിയല്ലാതെ ജനകീയമായ ഒരു പ്രവര്ത്തനത്തിലും കോണ്ഗ്രസിന്റെ താഴേത്തട്ടിലുള്ള നേതാക്കളെ കിട്ടാനില്ലാത്ത സാഹചര്യമാണുള്ളത്. കോവിഡ് നിയന്ത്രണങ്ങള് മാറിയ സാഹചര്യത്തില് പോലും കേരളത്തില് പ്രതിപക്ഷമായി കോണ്ഗ്രസ് ഉണരുന്നില്ല. രണ്ടാം പിണറായി സര്ക്കാര് വന് പരാജയമാണെന്ന തിരിച്ചറിവ് ജനങ്ങളെ അറിയിക്കാനുള്ള ത്രാണിയും കോണ്ഗ്രസിനില്ല. അരിയ്ക്കും അവശ്യസാധനങ്ങള്ക്കും കൈപൊള്ളിക്കും വിധം വില ഉയര്ന്ന സാഹചര്യത്തിലും കമാന്ന് ഒരക്ഷരം മിണ്ടാന് സാധിക്കാത്ത വിധം പ്രതിപക്ഷ നേതാക്കളുടെ നാവിറങ്ങിപ്പോയിരിക്കുന്നു.
https://www.facebook.com/Malayalivartha
