കഴിഞ്ഞ ദിവസങ്ങളിൽ മുഖ്യമന്ത്രിയും നാല് മന്ത്രിമാരും നടത്തിയ വിദേശ യാത്ര സംസ്ഥാനത്ത് വലിയ രാഷ്ട്രീയ വിവാദങ്ങള്‍ക്കായിരുന്നു വഴി വെച്ചത്. കാരണം മുഖ്യമന്ത്രി പിണറായി വിജയനെതിരെ രാഷ്ട്രപതിക്ക് ഗവര്‍ണര്‍ ആരിഫ് മുഹമ്മദ് ഖാന്‍ കത്തു നല്‍കിയിരുന്നു. മുഖ്യമന്ത്രിയും മന്ത്രിമാരും വിദേശയാത്ര പോയത് അറിയിക്കാതെയാണെന്നാണ് കത്തില്‍ പറയുന്നത്.

അതേസമയം തന്നെ സംസ്ഥാന സാമ്പത്തിക പ്രതിസന്ധിയില്‍ അകപ്പെട്ടിരിക്കുമ്പോള്‍ നടത്തിയ വിദേശ യാത്രയ്ക്കെതിരെ പ്രതിപക്ഷം രൂക്ഷമായി വിമർശനമാണ് നടത്തിയത്. എന്നാല്‍ വിമർശനം ഉയരുമ്പോഴും വിദേശ യാത്രയിലൂടെ ഒട്ടനവധി നേട്ടങ്ങള്‍ സ്വന്തമാക്കാന്‍ കഴിഞ്ഞെന്നായിരുന്നു സർക്കാറിന്റേയും സർക്കാർ അനുകൂലികളുടേയും പ്രചരണം.

ഇതിനു പിന്നാലെയാണ് വിദേശയാത്ര ഉൾപ്പെടെയുള്ള ചെലവുകൾ കർശനമായി വിലക്കി എല്ലാ വകുപ്പുകൾക്കും ചീഫ് സെക്രട്ടറിയുടെ ഉത്തരവ് പുറത്ത് വരുന്നത്. എന്നാൽ ആ ഉത്തരവ് പുറത്തിറങ്ങുമ്പോഴും പൊതുമരാമത്ത് ടൂറിസം വകുപ്പ് മന്ത്രി മുഹമ്മദ് റിയാസ് വിദേശത്താണുള്ളതെന്നാണ് ശ്രദ്ധേയം. ഇതിനെ പരിഹസിച്ചുകൊണ്ട് ജനങ്ങൾ ഉൾപ്പടെ രംഗത്ത് എത്തിയിട്ടുമുണ്ട്.