വീട്ടമ്മയെ ഭീഷണിപ്പെടുത്തി പതിനാറുകാരി ആഭരണങ്ങള്‍ കവര്‍ന്നശേഷം ചുറ്റിക കൊണ്ട് തലയ്ക്കടിച്ചു വീഴ്ത്തി കടന്നുകളഞ്ഞു.... തന്ത്ര പൂര്‍വ്വത്തില്‍ പിടികൂടി പോലീസ്.

വീട്ടമ്മയും സമീപവാസിയും നല്‍കിയ മൊഴിയുടെ അടിസ്ഥാനത്തിലാണ് പെണ്‍കുട്ടിയെ പോലീസ് തന്ത്രപരമായി പിടികൂടുകയും ചെയ്തു. ആദ്യം കുറ്റം നിഷേധിച്ച പെണ്‍കുട്ടി പോലീസ് ചോദിച്ചതോടെ സമ്മതിക്കുകയുണ്ടായി.

മൂവാറ്റുപുഴ പായിപ്ര 12-ാം വാര്‍ഡില്‍ സൗത്ത് പായിപ്ര കോളനി ഭാഗത്ത് ജ്യോതിസ് വീട്ടില്‍ ജലജ (60) യെയാണ് പെണ്‍കുട്ടി മാലയും കമ്മലും മോതിരവും അടക്കമുള്ള ആഭരണങ്ങള്‍ കൈക്കലാക്കി, തലയ്ക്കു പുറകില്‍ ചുറ്റികകൊണ്ട് അടിച്ചുവീഴ്ത്തിയത്. ഇന്നലെ ഉച്ചയ്ക്ക് ഒരു മണിയോടെയാണ് നാടിനെ നടുക്കിയ സംഭവം അരങ്ങേറിയത്.

സഹോദരനോടൊപ്പമാണ് ജലജ താമസിക്കുന്നത്. സംഭവം നടക്കുമ്പോള്‍ വീട്ടില്‍ ആരുമുണ്ടായിരുന്നില്ല. ചോര വാര്‍ന്നൊഴുകിക്കൊണ്ടിരിക്കേ നിലവിളിച്ച് ജലജ പുറത്തിറങ്ങിയതോടെ നാട്ടുകാര്‍ ഓടിയെത്തി. ഉടന്‍ മൂവാറ്റുപുഴ ജനറല്‍ ആശുപത്രിയിലെത്തിച്ചു. മുറിവ് ആഴത്തിലുള്ളതായതിനാല്‍ കോട്ടയം മെഡിക്കല്‍ കോളേജിലേക്ക് മാറ്റി. നാട്ടുകാര്‍ പറഞ്ഞതനുസരിച്ച് പോലീസ് പെണ്‍കുട്ടിയുടെ വീട്ടുകാരെ കൊണ്ടുതന്നെ ഫോണില്‍ വിളിപ്പിച്ചു.

അപ്പോള്‍ ടൗണിലായിരുന്ന പെണ്‍കുട്ടി ഓട്ടോറിക്ഷയില്‍ വീട്ടിലെത്തി. പെരുമറ്റത്തേക്കെന്നു പറഞ്ഞ് പോസ്റ്റ് ഓഫീസ് കവലയില്‍നിന്ന് ഓട്ടോ വിളിച്ച പെണ്‍കുട്ടി ഫോണ്‍ വന്നതോടെ പായിപ്രയിലേക്ക് പോയി. അതിനിടെ ഓട്ടോയിലുണ്ടായിരുന്ന ആണ്‍കുട്ടി വാഴപ്പിള്ളി കവലയില്‍ ഇറങ്ങിയതായും പോലീസിന് വിവരം കിട്ടി.


കുറ്റകൃത്യത്തില്‍ പെണ്‍കുട്ടിയല്ലാതെ മറ്റാരും ഉള്‍പ്പെട്ടിട്ടില്ലെന്ന പ്രാഥമിക നിഗമനത്തിലാണ് പോലീസ്. അന്വേഷണത്തില്‍ ആഭരണങ്ങളില്‍ ചിലത് കണ്ടെടുത്തിട്ടുണ്ട്. പെണ്‍കുട്ടി ഉപയോഗിച്ചതെന്നു കരുതുന്ന ഗ്ലൗസില്‍ പൊതിഞ്ഞ് എറിഞ്ഞുകളഞ്ഞ നിലയില്‍ വഴിയരികില്‍ നിന്നാണ് മോതിരവും കമ്മലും പോലീസ് കണ്ടെടുത്തത്.കുറ്റകൃത്യത്തിനുപയോഗിച്ച ചുറ്റികയും മുളകുപൊടിയടക്കമുള്ള സാധനങ്ങളും കണ്ടെടുത്തു.

കൃത്യമായ മുന്നൊരുക്കത്തോടെയാണ് കുറ്റകൃത്യം നടത്തിയിരിക്കുന്നത് എന്നതിനാല്‍ പെണ്‍കുട്ടി മുന്‍പ് ഏതെങ്കിലും കേസില്‍ പെട്ടിട്ടുണ്ടോയെന്നും പോലീസ് പരിശോധിക്കുന്നു്.