സാമൂഹ്യ സുരക്ഷ, ക്ഷേമനിധി പെന്‍ഷന്‍ വിതരണം ആരംഭിച്ചു. ഒരു മാസത്തെ പെന്‍ഷനാണ് വിതരണം ചെയ്യുന്നത്. ഇതിനായി ധനവകുപ്പ് 900 കോടി രൂപയാണ് അനുവദിച്ചത്. നേരിട്ട് പെന്‍ഷന്‍ ലഭിക്കുന്നവര്‍ക്ക് ബന്ധപ്പെട്ട സഹകരണ സംഘം ജീവനക്കാര്‍ തുക വീട്ടിലെത്തിച്ചു തുടങ്ങി.


രണ്ട് മാസത്തെ കുടിശ്ശികയില്‍ ഡിസംബര്‍ മാസത്തെ പെന്‍ഷനാണ് അനുവദിച്ചത്. നാളെ മുതല്‍ തുക വിതരണം ചെയ്യാനാകുമെന്ന് ധനവകുപ്പ് .സഹകരണ കണ്‍സോര്‍ഷ്യത്തില്‍ നിന്ന് വായ്പയെടുത്താണ് പെന്‍ഷന്‍ നല്‍കുന്നത്. 2000 കോടി വായ്പക്ക് ആവശ്യപ്പെട്ടതില്‍ ഒരുമാസത്തെ ക്ഷേമ പെന്‍ഷന്‍ നല്‍കാനാവശ്യമായ പണം മാത്രമാണ് ഇതുവരെ കിട്ടിയത്.

അതേസമയം കടുത്ത സാമ്പത്തിക പ്രതിസന്ധി നേരിടുന്ന സര്‍ക്കാര്‍ ക്ഷേമ പെന്‍ഷന്‍ അടക്കമുള്ള സാമൂഹ്യക്ഷേമ പദ്ധതികള്‍ക്കായാണ് നേരത്തെ ഇന്ധന സെസ് ഉള്‍പ്പെടെയുള്ള അധിക നികുതി ചുമത്താന്‍ ബജറ്റില്‍ പ്രഖ്യാപനം നടത്തിയത്.

മൂന്നുമാസത്തെ ക്ഷേമ പെന്‍ഷന്‍ കുടിശികയില്‍ ഒരുമാസത്തേതാണ് ഇന്നുമുതല്‍ വിതരണം ചെയ്തത്. കണ്‍സോര്‍ഷ്യമുണ്ടാക്കി സഹകരണ ബാങ്കുകളില്‍ നിന്ന് 800 കോടി വായ്പയെടുത്താണ് വിതരണം.

ശേഷിക്കുന്ന കുടിശിക നല്‍കാനായി സഹകരണ ബാങ്കുകളില്‍ നിന്നുതന്നെ 1200 കോടിയോളം സമാഹരിക്കാനും നീക്കമുണ്ട്. സാമൂഹ്യക്ഷേമ പെന്‍ഷന്‍ വിതരണ കമ്പനി എടുക്കുന്ന വായ്പ സര്‍ക്കാരിന്റെ പൊതുകടത്തിന്റെ കണക്കില്‍പെടുത്തുമെന്ന് കേന്ദ്രം മുന്നറിയിപ്പ് നല്‍കിയതാണ് പ്രതിസന്ധിയിലാക്കിയത്. ഇതോടെ പെന്‍ഷന്‍ കുടിശികയായി. തുടര്‍ന്നാണ് സഹകരണ ബാങ്കുകളെ സമീപിച്ചത്



അതേസമയം 2019 ഡിസംബര്‍ 31 വരെയുള്ള സാമൂഹ്യ സുരക്ഷാ പെന്‍ഷന്‍ ഗുണഭോക്താക്കള്‍ 2022 സെപ്റ്റംബര്‍ 1 മുതല്‍ 2023 ഫെബ്രുവരി 28നുള്ളില്‍ (ആറ് മാസം) ബന്ധപ്പെട്ട പ്രാദേശിക സര്‍ക്കാരില്‍ പുതിയ വരുമാന സര്‍ട്ടിഫിക്കറ്റ് സമര്‍പ്പിക്കേണ്ടതാണ്. നിശ്ചിത സമയപരിധിക്കുള്ളില്‍ വരുമാന സര്‍ട്ടിഫിക്കറ്റ് സമര്‍പ്പിക്കാത്തവരെ സാമൂഹ്യ സുരക്ഷാ പെന്‍ഷന്‍ ഗുണഭോക്തൃ ലിസ്റ്റില്‍ നിന്നും സസ്പെന്റ് ചെയ്യുന്നതും അത്തരക്കാര്‍ക്ക് 2023 മാര്‍ച്ച് മാസം മുതല്‍ പെന്‍ഷനുകള്‍ അനുവദിക്കുന്നതുമല്ല.

സര്‍ട്ടിഫിക്കറ്റുകള്‍ ഹാജരാക്കുന്ന മുറയ്ക്ക് പ്രാദേശിക സര്‍ക്കാര്‍ സെക്രട്ടറി പെന്‍ഷന്‍ പുനസ്ഥാപിച്ചു നല്‍കുന്നതാണ്. എന്നാല്‍ വരുമാന സര്‍ട്ടിഫിക്കറ്റ് യഥാസമയം ഹാജരാക്കാത്ത കാരണത്താല്‍ തടയപ്പെടുന്ന പെന്‍ഷന്‍ കുടിശ്ശികയ്ക്ക് ഗുണഭോക്താവിന് അര്‍ഹതയുണ്ടായിരിക്കില്ല.