കേരളത്തില്‍ പിടിമുറുക്കി ഭിക്ഷാടന മാഫിയ. ഏജന്റുമാര്‍ ഇവരെ വാഹനത്തില്‍ കൊണ്ടിറക്കും. പിന്നീട് പലവഴികളിലായ് ഭിക്ഷാടനത്തിന് പോകും. പിടികൂടാനെത്തുന്ന പോലീസിനെ വട്ടംകറക്കുന്നു. പൊലീസ് പരിശോധന നടത്തുന്ന വിവരം ഭിക്ഷാടകരുടെ വാട്‌സ് ആപ്പ് ഗ്രൂപ്പുകളിലൂടെ പ്രചരിക്കും. തൊട്ടുപിന്നാലെ ഇവര്‍ കൂട്ടത്തോടെ മുങ്ങും. ക്രിമിനലുകള്‍ ഉള്‍പ്പെടെ ഈ കൂട്ടത്തിലുണ്ട്. കുട്ടികളെ തട്ടിക്കൊണ്ട് പോകുന്ന സംഘങ്ങളും ഇവരുടെ കൂട്ടത്തില്‍ വിലസുന്നു. കേരളം ഇവരുടെ താവളമാണ്. ഇപ്പോള്‍ ഭിക്ഷാടന മാഫിയയെക്കൊണ്ട് പൊറുതിമുട്ടി തൊടുപുഴ.

ഉത്സവങ്ങളും പള്ളി പെരുന്നാളുകളും ഈസ്റ്റര്‍, വിഷു ആഘോഷങ്ങളും ലക്ഷ്യമിട്ട് നഗരത്തില്‍ പിടിമുറുക്കിയ ഭിക്ഷാടന മാഫിയയെ തുരത്താനുള്ള പൊലീസിന്റെ ശ്രമം പരാജയപ്പെട്ടു. പൊലീസ് പരിശോധന നടത്തുന്ന വിവരം ഭിക്ഷാടകരുടെ വാട്‌സ് ആപ്പ് ഗ്രൂപ്പിലൂടെ പ്രചരിച്ചതിനെ തുടര്‍ന്ന് വിവിധ കേന്ദ്രങ്ങളിലുള്ള ഭൂരിഭാഗം പേരും മുങ്ങി. ഇതോടെ ജില്ലാ സാമൂഹികനീതി വകുപ്പുമായി ചേര്‍ന്ന് ഇന്നലെ രാവിലെ 10 മുതല്‍ 'ക്ലീന്‍ തൊടുപുഴ' എന്ന പേരില്‍ നഗരത്തില്‍ പൊലീസ് മിന്നല്‍ പരിശോധന നടത്തിയെങ്കിലും നാല് ഭിക്ഷാടകരെ മാത്രമാണ് കണ്ടെത്താനായത്. സിവില്‍ സ്‌റ്റേഷന്‍ പരിസരം, ശീകൃഷ്ണ സ്വാമി ക്ഷേത്രം, തൊടുപുഴ പാലം, സ്വകാര്യ ബസ് സ്റ്റാന്‍ഡ് തുടങ്ങിയവയുടെ സമീപത്ത് നിന്ന് മൂന്ന് കര്‍ണാടക സ്വദേശികളെയും ഒരു ആന്ധ്രാക്കാരനേയുമാണ് കണ്ടെത്തിയത്. ഇവരില്‍ രണ്ട് പേരെ മുതലക്കോടത്തെ നഗരസഭ വൃദ്ധ സദനത്തിലും മറ്റ് രണ്ട് പേരെ കുമാരമംഗലത്തെ പ്രത്യാശാ ഭവനിലും പ്രവേശിപ്പിച്ചു. ഇവരില്‍ നിന്ന് കൂടുതല്‍ വിവരങ്ങള്‍ മനസിലാക്കാന്‍ ഭാഷ പ്രശ്‌നമാണെന്ന് പൊലീസ് പറഞ്ഞു.

തൊടുപുഴ പ്രൈവറ്റ് ബസ് സ്റ്റാന്റ് പരിസരം, ഗാന്ധി സ്‌ക്വയര്‍, തൊടുപുഴ പാലം, സിവില്‍ സ്റ്റേഷന്‍ പരിസരങ്ങളിലും കഴിഞ്ഞ ദിവസങ്ങളില്‍ ഭിക്ഷാടന സംഘം സജീവമായിരുന്നു. വിവിധ ആഘോഷങ്ങളോടനുബന്ധിച്ച് നഗരത്തിലേയ്ക്ക് വിവിധ ആവശ്യങ്ങള്‍ക്കായി കൂടുതലായി പേര്‍ എത്തുന്ന സ്ഥലങ്ങളിലാണ് ഇവരുടെ ശല്യം രൂക്ഷമാകുന്നത്. ഇപ്പോള്‍ ഈസ്റ്റര്‍, വിഷു ആഘോഷങ്ങളും തൊടുപുഴ ശ്രീകൃഷ്ണ സ്വാമി ക്ഷേത്രത്തിലെ ഉത്സവവും മുതലക്കോടം പള്ളിയിലെ പെരുന്നാള്‍ എന്നിവ ലക്ഷ്യമിട്ടാണ് മാഫിയ കൂടുതല്‍ സജീവമായി രംഗത്തിറങ്ങിയിരിക്കുന്നത്. നോമ്പു കാലമായതിനാല്‍ സക്കാത്തായും യഥേഷ്ടം പണം ലഭിക്കുന്നത് മുതലാക്കി മുസ്ലിംപള്ളികള്‍ കേന്ദ്രീകരിച്ചും ഇവര്‍ പ്രവര്‍ത്തിക്കുന്നുണ്ട്. നഗരത്തിലെ ഭിക്ഷാടനത്തിനെതിരെ പൊലീസ് അടിയന്തര നടപടി സ്വീകരിക്കണമെന്ന് മാസങ്ങള്‍ക്ക് മുമ്പ് നഗരസഭ ചെയര്‍മാന്‍ പൊലീസിനോട് ആവശ്യപ്പെട്ടിരുന്നു.

തൊടുപുഴ നഗരത്തില്‍ മാത്രം മുപ്പതോളം ഭിക്ഷാടകരുണ്ടെന്നാണ് വിവരം. തെലങ്കാന സ്വദേശിയാണ് തങ്ങളുടെ നേതാവെന്ന് പിടിയിലായവര്‍ മൊഴി നല്‍കിയിട്ടുണ്ട്. ഇവരുടെ പക്കല്‍ നിന്ന് വിലകൂടിയ സ്മാര്‍ട്ട് ഫോണുകളും എ.ടി.എം, പാന്‍ കാര്‍ഡുകളും പൊലീസ് കണ്ടെത്തി. ഇതോടെ നഗരത്തില്‍ ഭിക്ഷാടന മാഫിയയുടെ പ്രവര്‍ത്തനം നടക്കുന്നുണ്ടെന്ന് പൊലീസ് സ്ഥിരീകരിച്ചു. ഇവരെ രാവിലെ തൊടുപുഴ സ്വകാര്യ ബസ് സ്റ്റാന്‍ഡിന്റെ പരിസരത്ത് വാഹനത്തില്‍ കൊണ്ടിറക്കുന്നുണ്ടെന്നതായാണ് വിവരം. കൂടുതല്‍ സജ്ജീകരണങ്ങളുമായി വരും ദിവസങ്ങളില്‍ പരിശോധന നടത്താനാണ് പൊലീസിന്റെ തീരുമാനം. ഭിക്ഷാടന മാഫിയയുടെ പ്രവര്‍ത്തനം സജീവമാകുമ്പോഴും ഇതിനുപിന്നിലുള്ളവരെ കണ്ടെത്താനുള്ള ശ്രമം വിജയിച്ചിട്ടില്ല. ഒരുകൂട്ടമായ് ഇവരെ കേരളത്തില്‍ എത്തിച്ച് പല സ്ഥലങ്ങളിലേക്ക് കൊണ്ടുവിടുകയാണ് പതിവ്. കേരളത്തില്‍ ഇവരെക്കൊണ്ടുള്ള ശല്യം പെരുകുകയാണ്.